?Oli Hu?

OL WITNES BLONG JEOVA oli wantem we yu yu save olgeta. Maet yu save sam long olgeta from we oli laef klosap long yu, no maet i gat sam we oli wok wetem yu, no maet yu bin mitim olgeta long narafala ples bakegen. Maet yu bin luk olgeta long rod, taem oli stap givim ol buk long ol man. No maet yu bin stori smol wetem olgeta taem oli kam long haos blong yu.

Ol Witnes blong Jeova oli intres long yu mo oli wantem we yu gat wan gudfala laef. Oli wantem kam fren blong yu mo oli wantem talem long yu se oli hu, oli bilif long wanem, olsem wanem oli mekem wok blong olgeta, mo wanem filing blong olgeta long saed blong ol man mo wol ya tu we yumi evriwan i stap long hem. From samting ya nao, mifala i wokem smol buk ya blong givim ol save ya long yu.

Ol Witnes blong Jeova oli sem mak nomo olsem ol narafala man. Ol trabol we man i fesem long saed blong mane, sik, mo filing, i kasem olgeta tu. Oli no stretgud olgeta, oli no ol tabu man we neva oli save gorong, taswe samtaem oli mestem. Be taem oli mekem mastik oli traem lanem wan lesen long mastik ya blong oli no mekem sem mastik bakegen, mo oli stadi plante long Baebol blong traem jenisim fasin blong olgeta. Oli givim laef blong olgeta long God blong mekem ol samting we hem i wantem, mo oli traehad blong holem promes ya we oli mekem long Hem. Long evri samting we oli mekem, oli letem Tok blong God mo tabu spirit i lidim olgeta.

Long lukluk blong olgeta, i impoten tumas we evri bilif blong olgeta i mas stanap long Baebol, i no long tingting blong man mo i no folem doktrin blong wan jos. Oli gat sem tingting ya we aposol Pol i gat taem tabu spirit i pusum hem blong raetem se: “Nating we olgeta man oli save giaman, be God i no save giaman, hem i tru oltaem nomo.” (Rom 3:4, Baebol long Bislamaa) Taem oli tijim wan trutok blong Baebol, oli mas meksua se tijing ya i laenap fulwan wetem Baebol. Oli mekem sem fasin ya we ol man Berea bifo oli mekem taem aposol Pol i prij long olgeta: ‘Oli wantem tumas blong harem tok ya, mo evri dei, oli stap ridimgud ol tok blong Baebol, blong faenemaot se ol tok ya i tru no i no tru.’ (Ol Wok 17:11) Ol Witnes blong Jeova oli bilif strong se olgeta tijing oli mas laenap wetem evri haf blong Baebol, hemia i min se ful Baebol i mas sapotem tijing ya—nating se i tijing blong olgeta no tijing blong narafala man. Taem oli storian wetem yu, oli wantem se yu yu mas ridim mo skelem ol vas blong Baebol.

From samting ya, i klia we ol Witnes blong Jeova oli bilif long Baebol se hem i Tok blong God. Oli bilif se ol 66 buk insaed long Baebol oli kamaot long God stret mo oli laenap wetem wanem we i bin hapen long histri. Tufala haf blong Baebol we plante man oli talem se hem i Niutesteman mo Oltesteman, be olgeta oli kolem tufala haf ya se Kristin Grik haf blong Baebol mo Hibru haf blong Baebol. Oli trastem tugeta haf ya, Grik haf mo Hibru haf mo oli bilivim evri toktok blong Baebol olsem we oli raetem i stap, be oli save tu se sam haf blong Baebol oli ol pijatok nomo no oli saen blong samting we i mas kamtru. Oli kasem save se plante profet tok long Baebol oli bin kamtru finis, i gat sam we oli stap kamtru naoia, be i gat sam we oli mas kamtru yet long fiuja.

NEM BLONG OLGETA

Witnes blong Jeova. Yes, hemia nem we oli karem. Nem ya i talemaot wan samting long saed blong olgeta. Hem i talem se oli givim witnes, no oli talemaot tok, long saed blong Jeova, se hem i God, mo wanem ol stamba tingting blong hem. Tok ya “God,” “Masta,” mo “Bigman”—sem mak olsem tok ya “Presiden,” “King,” mo “Minista”— oli ol taetel nomo mo plante defdefren kaen man oli save holem ol taetel olsem. Be “Jeova” i wan nem mo hem i nem blong God ya we i gat Olgeta Paoa mo we hem i Wokem Olgeta samting long heven mo long wol. Hemia nao save we i stap long Ol Sam 83:18, we long Baebol ya New World Translation yumi ridim se: “Plis yu mekem olgeta oli save se yu, we nem blong yu JEOVA, yu nomo yu Hae God long olgeta ples long wol.”

Nem ya Jeova (no Yahweh, olsem we Jerusalem Bible blong Katolik Jos mo sam man blong hae save oli laekem blong talem) i kamaot bitim 7,000 taem long olfala hanraet long Hibru lanwis. Bighaf blong ol Baebol oli karemaot nem ya mo oli putum ol taetel olsem “Hae God” no “Masta” long ples blong hem. Be, nating se ol Baebol ya oli karemaot nem ya Jeova, we i bin stap long Hibru lanwis, yumi naf yet blong save se nem ya i bin stap long wanem vas from we oli putum ol tok olsem GOD, no MASTA we oli raetem long bigfala leta, long ples we nem ya Jeova i bin stap long hem. Be i gat sam Baebol yet tede we oli putum nem ya Jeova no nem ya Yahweh long hem. Taswe Aesea 42:8 long Baebol ya New World Translation i raetem se: “Mi mi Jeova. Hemia nao nem blong mi.”

Nem ya ol Witnes blong Jeova i kamaot long Baebol, long buk blong Aesea japta 43. Japta ya i storebaot ol samting olsem we i hapen long kot: Ol god blong wol ya oli pas long kot mo oli mas karem ol witnes blong olgeta i kam blong pruvum se toktok blong olgeta i tru, mo oli mas harem ol witnes we oli toktok long saed blong Jeova mo oli mas luksave trutok. Long vas ya Jeova i talem long ol man blong hem se: “Yufala i witnes blong mi. Mi mi jusumaot yufala blong yufala i man blong wok blong mi, blong bambae yufala i savegud mi, mo blong yufala i save bilif long mi, mo blong yufala i savegud we mi nomo mi God. I no gat narafala god i stap. Kam kasem naoia, neva i gat narafala god i stap, mo long fiuja, bambae i no gat narafala god bakegen samtaem. Mi nomo mi Hae God [“Jeova,” New World Translation (NW)], mi nomo mi save sevem yufala.”—Aesea 43:10, 11.

Plante yia bifo we Jisas i kam long wol, Jeova God i gat ol witnes blong hem finis long wol ya, ol man blong talemaot tok blong hem. Hibrus japta 11 i givim lis blong nem blong plante long ol man ya we oli strong long bilif. Nao long Hibrus 12:1 yumi ridim se: “Olgeta ya we oli stap bilif strong long God, mo oli witnes blong hem, olgeta oli stap raonabaot long yumi we oli plante we plante. Nao from samting ya, yumi mas lego ol samting we oli stap blokem yumi, mo ol sin we oli stap holemtaet yumi, nao yumi mas mekem tingting blong yumi i strong, blong yumi resis long rod ya we i stap long fes blong yumi.” Jisas i talem long Ponjes Paelat se: “Mi mi bon, mi kam long wol ya blong wan samting nomo, blong mi talemaot ol tok we i tru [“blong mi witnes long trutok,” NW].” Mo bakegen Baebol i kolem Jisas ya se “witnes ya we i tru mo we i no save tanem tok blong hem.” (Jon 18:37; Revelesen 3:14, Good News Bible) Jisas i talem long ol disaepol blong hem se: ‘Taem tabu spirit i kam kasem yufala, bambae yufala i gat paoa. Nao bambae yufala i mas go talemaot mi [“yufala i witnes blong mi,” Good News Bible] long Jerusalem, mo long olgeta ples long Judia mo Sameria, gogo yufala i finisim olgeta ples long wol.’—Ol Wok 1:8.

Taswe, i gat samwe long 6,000,000 man tede we oli stap talemaot gud nius blong Kingdom blong Jeova, we Jisas Kraes i king long hem. Oli mekem wok ya long bitim 230 kantri mo oli harem se i stret nomo blong oli karem nem ya se Witnes blong Jeova.

[Futnot]

[Tok blong makem poen long pej 4]

Oli givim laef blong olgeta long God blong oli mekem ol samting we hem i wantem

[Tok blong makem poen long pej 4]

Oli bilif long Baebol se hem i Tok blong God

[Tok blong makem poen long pej 5]

Nem blong olgeta i stanap long wan vas blong Baebol

[Tok blong makem poen long pej 5]

I gat samwe long 6,000,000 Witnes long bitim 230 kantri

[Tok blong pija long pej 3]

Oli intres long yu

[Tok blong pija long pej 4]

Hemia prapa nem blong God olsem we oli raetem long lanwis ya Hibru