Baebol i Talem Wanem

?Olsem Wanem? ?God i Wan Paoa Nomo?

OL MAN oli sapraes taem oli luk ol samting we i stap raonabaot long yumi. Ol samting ya i pulum olgeta blong bilif long wan paoa we i bitim paoa blong yumi, no wan god. ?Olsem wanem? ?Yu yu sapraes taem yu tingbaot ol samting long yunivesa we oli wok long wan fasin we yu no naf blong save long hem? ?Yu yu sapraes taem yu luk ol gudgudfala samting blong wol ya mo nambawan wei we bodi i wok?

Sipos i olsem, ating yu yu bilif se i gat wan God we i stap. Sam skul oli tijim se God i olsem wan paoa we i stap long ol hil, long ol tri, long skae, mo long ol narafala samting long yunives. !Sam narafala oli bilif se ol spirit blong ol bubu bifo, sam we oli gud mo sam we oli nogud, oli joen wanples, nao oli fomemap bigfala paoa ya, we i God!

Ol man we oli bilif olsem, oli bilif se paoa ya we i bigwan, i no gat ol prapa fasin blong hem mo ol filing. Sam man oli no save bilif se God i gat ol tingting, ol filing, wan stamba tingting blong hem, mo i wantem ol samting tu. ?Olsem wanem? ?God i gat ol prapa fasin blong hem mo ol filing? Baebol, wan buk we i olfala moa i winim ol narafala buk long wol, we i kamaot long God mo we tede, plante man oli gat, i givim ol ansa we i klia.

Fasin Blong Man i Soemaot Fasin Blong God

Baebol i tijim se God i mekem man, blong man i soemaot ol fasin blong hem. Jenesis 1:27 i talem se “Nao [God] i mekem man, mo man ya i tekem fasin blong hem, i olsem hem stret.”

I klia long ol tok ya se, bodi blong faswan man mo woman i no sem mak long God. Baebol i talem se God i wan spirit man we yumi no save luk. Be God i yusum ol samting blong wol ya, we yumi save luk, blong mekem man long hem. (Jenesis 2:7; Jon 4:24) Nating we bodi blong God mo bodi blong man i defren, be sipos yumi lukluk gud long ol fasin blong man, oli halpem yumi blong luksave ol fasin blong God.

Ol man oli save yusum paoa blong mekem ol wok we oli wantem mekem. Oli save plan blong mekem samting, mo oli save tingting gud fastaem bifo we oli tekem wan desisen. Kaen fasin, fasin blong skelem samting, waes, mo fasin blong wantem mekem i stret, i pulum man blong mekem ol plan no desisen ya. Ol man oli save harem se oli lavem narafala man mo oli save harem tu se oli no laekem man nating mo oli save kros bigwan long man. Sam long yumi i strong blong soemaot wan kaen fasin be narafala maet i strong blong soemaot narafala fasin, mo from samting ya nao yumi wanwan i defren long narawan. Yes, yumi wanwan yumi gat prapa fasin blong yumi we i mekem yumi defren long wan narafala man. Ol man oli gat tingting mo filing.

Sipos God i wan paoa nomo, we i no gat tingting mo filing, mo i stap olbaot olsem win, ?yu ting se hem i save mekem yumi we yumi gat tingting mo filing? Sipos God i mekem man blong i tekem fasin blong hem, hemia i min se long plante rod, fasin blong God i sem mak long fasin blong man. I gud yumi tingbaot ol samting we oli kam biaen.

God i gat wan prapa nem blong hem. Baebol i talem long Aesea 42:8 se: “!Mi nomo mi Hae God [“Jeova,” NW]! !Hemia nao nem blong mi!” God i wantem se ol man oli save nem ya. Baebol i talem tu se: “Bambae yumi presem nem blong hem [“Jeova,” NW] oltaem, i stat naoia, gogo i no save finis. Yumi evriwan, i stat long is, i go kasem long wes, yumi presem nem blong Hae God [“Jeova,” NW].” (Ol Sam 113:2, 3) Taem ol man blong God oli yusum nem blong God oltaem, hemia i min se oli tingbaot God olsem wan man we i tru, we i gat tingting mo filing blong hem.

Jeova hem wan nomo i God. Baebol i tijim se i gat wan God nomo. (1 Korin 8:5, 6) Baebol i talem olsem se: “!Hae God, Masta blong mi, yu yu hae we yu hae! I no gat man we i olsem yu. Oltaem mifala i save we yu nomo yu God.” (2 Samuel 7:22) Mo tu, Baebol i tokbaot Jeova olsem, se: “Hem i God blong heven mo blong wol, mo i no gat narafala god bakegen i stap.”—Dutronome 4:39.

Jeova God i no laekem nating ol rabis fasin. Sipos God i wan paoa nomo, bambae hem i no save harem se hem i no laekem nating sam samting. Be Baebol i talem se God ya we i Mekem yumi, hem i no laekem nating ol fasin olsem “fasin blong praod, mo fasin blong giaman, mo fasin blong kilim man we i no mekem samting nogud, mo fasin blong mekem ol rabis plan, mo fasin blong go kwik blong mekem ol samting nogud, mo fasin blong giaman insaed long kot, mo fasin blong mekem ol fren oli harem nogud, oli seraot.” (Ol Proveb 6:16-19) Yumi makem se God i no laekem nating ol fasin we man i mekem blong spolem narafala man. From samting ya, yumi save se God i kea long yumi mo se hem i no laekem nating ol samting we i save spolem yumi.

Jeova i God we i gat lav. Baebol i talem se God i lavem tumas “ol man long wol.” (Jon 3:16) Baebol i soemaot se God i gat fasin olsem wan gudfala papa we i wantem se ol pikinini blong hem long wol ya oli gat wan gudfala laef. (Aesea 64:8) Ol man oli save kasem plante blesing sipos oli tingbaot God olsem papa we i lavem tumas olgeta.

Yu Save Kam Fren Blong God

Yes, Baebol i tijim se God i gat prapa tingting mo filing blong hem. Hem i gat wan nem blong hem. Hem i yusum paoa blong hem blong mekem ol wok we hem i wantem. Hem i save plan blong mekem samting mo i save tingting gud fastaem bifo we hem i tekem desisen. Be taem hem i mekem olsem, oltaem hem i gat kaen fasin, waes, mo fasin blong mekem i stret. Hem i no stap longwe tumas long yumi, mo i no hadwok tu long yumi blong kam long hem. Defren olgeta, hem i talem se: “!Mi mi Hae God, mi God blong yufala! Mi nao mi stap mekem yufala i strong, mo mi stap talem long yufala se, ‘!Yufala i no fraet! !Mi bambae mi givhan long yufala!’”—Aesea 41:13.

God i gat wan stamba tingting long saed blong ol man. Baebol i talem se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” (Ol Sam 37:29) Taem yumi save se Jeova hem wan nomo i God mo hem i gat prapa fasin blong hem, hemia bambae i mekem we yumi fren wetem hem mo harem gud long ol blesing we hem bambae i givim long ol man we oli kam ol fren blong hem.—Dutronome 6:4, 5; 1 Pita 5:6, 7.

[Futnot]

?YU YU BIN TINGBAOT?

● ?God i gat wan prapa nem blong hem?—Aesea 42:8, NW.

● ?Olsem wanem? ?I gat plante god?—1 Korin 8:5, 6.

● ?Ol man oli save fren wetem God ya we i tru?—1 Pita 5:6, 7.

[Tok blong pija long pej 29]

Sipos God i wan paoa nomo, we hem i no gat tingting mo filing blong hem, ?yu ting se hem i save mekem yumi we yumi gat tingting mo filing?