?Hu i Givim Paoa Blong Mekem Majik Mo Ol Wok We Oli Narakaen?

GOD i mekem yumi mo olgeta samting we oli stap. Baebol i tokbaot God se: “Hem i olsem delaet, i no gat tudak nating i stap long hem.” (1 Jon 1:5) Hemia i min se olgeta wok blong God oli stret mo oli gud. ?Olsem wanem nao long ol narakaen wok ya we yumi tokbaot finis? ?Yu ting se God ya we i tru, hem nao i stap givim paoa long sam man blong mekem ol narakaen wok ya? ?Sipos i no God, be hu?

Sam man oli talem se oli save talem fiuja blong man taem oli lukluk long ol sta, no taem oli lukluk long han blong man. Sam man oli talem se oli save mekem majik, oli save toktok wetem man we i ded finis, mo oli save mekem nakaemas. Longtaem bifo finis, ol man oli stap talem se oli gat paoa blong mekem ol samting olsem. Bighaf blong ol wok ya oli kamaot long taon ya Babilon. Taon ya i lus finis, be ol man oli save faenem ol mak blong taon ya yet long kantri ya Irak. (Aesea 47:1, 12, 13) Fasin ya we man i save mekem majik mo i gat paoa blong mekem ol narakaen wok, hem i stat long Babilon bifo, nao i go kasem olgeta ples blong wol. Ale long sam ples long wol, olkaen fasin ya oli kam olsem stamba blong plante kalja mo kastom.

Tingbaot wan samting we i hapen long taon ya Filipae long Masedonia bifo. Aposol Pol wetem Luk mo sam narafala Kristin man, oli stap wokbaot long taon ya nao oli mitim wan gel we hem i gat paoa blong talem samting we bambae i save kamtru. Luk nao i raetem stori blong gel ya long Baebol. I gud blong ridim tok we hem i talem long saed blong paoa we gel ya i gat. Hem i raetem se: “Wan gel we i stap wok slef i faenem mifala long rod. Gel ya i gat devel i stap long hem, we i stap soemaot long hem ol samting we bambae i save kamtru. Gel ya i stap winim plante mane blong ol masta blong hem, from we ol man oli stap pem olgeta blong harem tok blong hem.”—Ol Wok 16:16-18.

Yes, paoa we gel ya i gat, i no kamaot long tru God, Jehova, be i kamaot long wan devel. Taswe Pol mo ol narafala Kristin ya oli no wantem harem tok blong gel ya. Be maet yu stap tingting se: ‘?Hu ya ol devel? ?Oli kam wea?’ I gud yumi luk wanem we Baebol i talem long saed ya.

?Hu Ya Ol Devel?

Longtaem bifo we Jehova i mekem ol man, hem i mekem plante “enjel” long heven. Baebol i no talem se oli hamas evriwan, be oli pikinini blong God mo oli waes. (Job 38:4, 7) God i mekem ol enjel ya oli gat save mo oli naf blong jusum rod we oli wantem folem, sem mak olsem we ol man long wol tu oli fri blong jusum rod blong olgeta. Ale ol enjel ya oli mekem ol samting we God i wantem. Be wan samting i hapen we i spolem gudfala wok ya blong God. ?Wanem i hapen?

Afta we God i mekem fas man mo woman long wol, wan long ol enjel ya blong God i stat kavetem wan samting we hem i no gat raet long hem. Samting ya hemia wosip. Ale enjel ya i yusum wan snek blong toktok long Iv, mo i pulum hem blong brekem loa blong God ya we i givim laef long hem. (Jenesis 3:1-6) Baebol i talem se stronghed enjel ya hem i “snek ya blong bifo we nem blong hem ‘Setan’ no ‘Man we i agensem man.’” (Revelesen 12:9) Jisas i tokbaot enjel ya se hem i “man blong kilim man,” mo i talem tu se: “Taem we hem i stap giaman, hem i stap mekem fasin blong hem nomo, from we hem i man blong giaman, we i stamba blong ol giaman toktok.”—Jon 8:44.

Afta we Setan i mekem stronghed, sam narafala “enjel blong God” oli folem hem blong agensem God. (Jenesis 6:1, 2) Baebol i tokbaot olgeta se oli ‘ol enjel ya we oli mekem sin,’ mo oli “ol enjel ya we oli no glad blong holem hae nem we God i givim long olgeta, nao oli livim prapa ples blong olgeta,” long heven. (2 Pita 2:4; Jud 6) Ol rabis enjel ya nao we long Baebol long Bislama oli singaot olgeta se ol devel. (Jemes 2:19) Olgeta ya oli gat strong tingting blong pulum plante man oli gowe long wosip we i tru. Hemia nao samting we oli bin mekem long ol man Isrel bifo. (Dutronome 32:16, 17) Ale, tede tu, Setan mo ol rabis enjel ya oli yusum ol giaman tijing blong trikim man.—2 Korin 11:14, 15.

!Yu Mas Blokem Ol Trik Blong Setan!

Nating se ol rabis enjel oli gat moa paoa i bitim yumi man, be God i save halpem yumi blong ‘stanap strong blong blokem olgeta.’ (1 Pita 5:9) Be sipos yumi wantem we God i halpem yumi, yumi mas gat save long ol samting we God i wantem yumi blong mekem, mo yumi mas mekem ol samting ya i wok long laef blong yumi. Aposol Pol i raet i go long ol Kristin long taem blong hem se: “Oltaem mitufala i stap prea from yufala . . . Mitufala i stap askem long God, blong Tabu Spirit i mekem yufala i waes, yufala i luksave olgeta samting we God i wantem, blong bambae yufala i savegud olgeta. Nao bambae yufala i save mekem laef blong yufala i kam stret gud olsem we Masta blong yumi i wantem . . . nao hem bambae i save glad long yufala from ol samting ya.”—Kolosi 1:9, 10.

Plante long ol man ya we oli ‘luksave mo oli savegud olgeta samting we God i wantem,’ oli blong taon ya Efesas. Bifo, olgeta ya oli stap mekem wok blong majik mo kleva. ?Taem oli kasem save long ol samting we God i wantem, oli mekem wanem? Baebol i talem se: “Plante long olgeta we bifo oli gat posen mo oli stap mekem majik, oli tekem ol buk blong ol samting ya i kam, nao oli bonem long fes blong ol man.” !Praes blong olgeta buk ya “i moa long fifti milian vatu”! !Hemia wan bigfala mane tumas! (Ol Wok 19:17-19) Stori blong olgeta ya we oli no fraet blong tekem desisen olsem, i wan gudfala eksampol we i stap long Baebol blong givhan long yumi tede.—2 Timoti 3:16.

Ol Advaes We Yumi Mas Folem Blong Blokem Setan

I gat sam narafala samting we yumi mas mekem blong ol rabis enjel oli no spolem yumi. Hemia sam advaes we oli kamaot long Baebol.

“I gat plante profet we oli stap talem se Spirit blong God i stap long olgeta, be yufala i no mas bilif long olgeta evriwan. Yufala i mas traem olgeta fastaem, blong faenemaot se spirit we i stap long olgeta i kamaot long God, no nogat.” (1 Jon 4:1) Samtaem wan kleva no wan man i save talem se wan samting bambae i kamtru, mo samting ya i kamtru stret olsem we hem i talem. Yu tingbaot gel ya long Filipae. Hem i talem tru nomo se Pol mo ol narafala Kristin ya oli “man blong wok blong God ya we i hae we i hae. Oli stap talemaot rod long yufala, blong God i sevem yufala.” (Ol Wok 16:17) Nating se tok blong gel ya i tru, Pol mo ol narafala Kristin oli no wantem we hem i stap folem olgeta, oli no wantem fren wetem hem. Defren nao, Pol i tok long rabis enjel we i stap long gel ya, mo i talem long hem blong kamaot long gel ya. Tru ya, yu mas jekem toktok we ol man oli talem long yu blong faenemaot sipos toktok blong olgeta i laenap wetem tijing we i stap long Baebol no nogat.—Ol Wok 17:11.

“Yufala i mas putum yufala i stap daon, aninit long han blong God. Yufala i mas blokem Setan, nao hem bambae i ronwe long yufala.” (Jemes 4:7) Ol rabis enjel oli enemi blong God mo oli enemi blong yu tu. I nogud yu stap intres long wok blong ol rabis enjel mo i nogud yu traem faenemaot se wok blong olgeta i olsem wanem. Defren olgeta, yu mas folem ol loa blong God ya we i gat lav. Ol loa ya oli no strong tumas blong folem mo taem yu folem ol loa ya, yu stap putum yu yu stap daon, aninit long han blong God. (1 Jon 5:3) Tingbaot loa ya we God i givim long neson blong Isrel bifo: “Yufala i mas lukaot gud blong yufala i no folem fasin blong olgeta [ol hiten man] blong go luk ol kleva, mo blong makemgud ol smosmol saen we oli luk, mo blong mekem singsing long man, mo blong wokem ol bisnes blong masing mo posen, mo blong singaot long ol devel blong dedman blong oli givhan long olgeta. Ol fasin ya i nogud we i nogud, Hae God i no laekem nating ol man we oli stap mekem olsem, i agens long olgeta.” (Dutronome 18:10-12) Tingting blong God long saed ya i no jenis.—Galesia 5:19, 20.

“I no gat man i save wokem posen long [ol man blong Jehova], mo i no gat kleva we paoa blong hem i save spolem olgeta.” (Namba 23:23) Ol man we oli wantem mekem God i glad, oli no mas fraet long ol rabis spirit. Ol rabis spirit ya nao we oli fraet, “oli stap seksek,” from we oli save se God i stap mo i gat bigfala paoa moa i winim olgeta. Ol rabis enjel ya oli save se, i gat taem i stap kam we bambae God i yusum bigfala paoa blong hem blong spolem olgeta. (Jemes 2:19) God i stap “luklukgud long olgeta samting long wol ya, blong i save givim paoa long ol man we oli ona long hem long olgeta tingting blong olgeta,” mo “Hem i no save letem stret man i lus.”—2 Kronikel 16:9; Ol Sam 55:22.

“Ol man we oli laef yet oli save se bambae oli ded, be ol man we oli ded finis oli no moa save wan samting.” (Prija 9:5) Tok blong God i tijim se taem man i ded, hem i no moa laef. I nogud yumi fraet long dedman from we oli no save mekem trabol long yumi. (Prija 9:10) Ol rabis enjel oli wantem trikim man, ale oli tekem fasin mo voes blong man we i ded mo oli traem toktok wetem yumi. Taswe sam man we oli talem se oli stap toktok wetem wan fren no famle blong olgeta we i ded, maet oli sek blong luk we fasin blong man ya we i ded i defren lelebet. Maet man ya we i ded hem i wan man we i kaen gud, be taem oli stap toktok wetem hem oli luk se hem i no moa kaen gud tumas olsem bifo. Hemia from we i no rili dedman ya we i stap toktok wetem olgeta, be hemia ol rabis enjel nomo.

“Yufala i no save sidaon blong kakae long tebol blong Masta blong yumi, mo bakegen long tebol blong ol devel.” (1 Korin 10:21, 22) Olgeta man we oli laekem Jehova bambae oli no save ridim ol buk, wajem ol muvi, mo plei ol video gem we oli soemaot wok blong ol rabis enjel mo we oli leftemap paoa blong ol rabis enjel ya.a Ol Sam 101:3 (King James Version) i talem se: “Mi no save letem ae blong mi i lukluk ol rabis fasin.” Plante taem, ol buk, ol muvi, mo ol video gem oli leftemap raf fasin mo rabis fasin blong man wetem woman olsem se i wan pleplei nomo. Ol man we oli “lavem Jehova,” oli agens long ol fasin ya we oli nogud.—Ol Sam 97:10, NW.

Ol rabis enjel oli no wantem we ol man oli save tru fasin blong olgeta. Oli traem haedem fasin blong olgeta, be oli no save haed. Jehova i putum ol tok blong hem long Baebol blong soemaot klia se ol rabis enjel ya oli man blong giaman mo oli enemi blong man. Fasin blong olgeta ya i defren olgeta long fasin blong Jehova, God ya we i mekem yumi. Nekis haf bambae i soemaot se God i lavem yumi, hem i talem trutok long yumi, mo hem i wantem we yumi laef olwe we yumi hapi.—Jon 3:16; 17:17.

[Futnot]