Ol Yangfala Oli Askem

?Olsem Wanem? ?Yumitu Gud Fren Nomo?, Haf 2

LONG HAF 1, yumi bin tokbaot tu samting we i stap hapen long laef.

● Boe no gel we i no rere blong mared i save spolem hem wan, sipos hem i stat blong lavem narafala be narafala i no lavem hem.—Ol Proveb 6:27.

● Boe no gel we i no rere blong mared i save lusum wan gudfala fren, sipos hem i stat blong lavem fren ya be fren ya i no lavem hem.a—Ol Proveb 18:24.

LONG HAF 2 YA, bambae yumi tokbaot

● Namba tri samting we i stap hapen long laef, we i joen wetem filing blong ol yangfala

● Mo olsem wanem blong faenemaot sipos yu stat blong gat filing long boe no gel we i gudfren blong yu

LAEF I OLSEM NAO: Boe no gel we i no rere blong mared, i save spolem gudnem blong hem sipos hem i stat blong lavem narafala, be narafala i no lavem hem. Merib i talem se: “Mi luk ol boe we oli frenem plante gel. Be plante taem, ol boe ya oli stap “pleplei” nomo. Ol gel oli ting se ol boe ya oli laekem olgeta, be nogat. Oli wantem nomo se ol gel ya oli intres long olgeta.

Yu traem tingbaot:

● Taem wan boe i joen oltaem wetem wan gel, no wan gel i joen oltaem wetem wan boe, ?olsem wanem samting ya i save spolem gudnem blong hem?

“Sipos yu stat blong sanem teks mesej long ol boe, hemia i save kam olsem wan bigfala trap. Fastaem yu sanem smol mesej long wan boe nomo, be i no longtaem afta, yu sanem mesej long plante boe. Maet yu no luksave, be yu stap frenem tri defren boe wantaem. Mo wanwan long trifala i ting se hem nao i spesel boe we yu yu laekem. Taem trifala i faenemaot samting we yu yu stap mekem, trifala i harem nogud tumas, mo trifala i talem se yu stap pleplei wetem filing blong olgeta nomo. Samting ya i spolem gudnem blong yu.”—Lara.

Baebol i talem se: “Nating we smol pikinini nomo, be ol samting we hem i mekem i stap soemaot fasin blong hem. Sipos hem i no save giaman, mo fasin blong hem i stret, bambae yu save wantaem nomo.”—Ol Proveb 20:11.

Stamba poen: I no rong blong wan boe i joen wetem ol gel no wan gel i joen wetem ol boe. Be sipos yu no putum ol rul we yu mas folem, yu save kasem trabol, yu lusum wan gudfala fren, mo yu spolem gudnem blong yu.

?Yu save luksave olsem wanem se yu bitim mak? Sipos yu yu wan gel, i gud yu askem kwestin ya se: “?Mi mi talemaot ol tingting blong mi long boe ya nomo?” Wan gel we nem blong hem Emma, i talem se: “Sipos yu mo wan boe yutufala i gud fren nomo, bambae yu no toktok long hem evri dei, mo yu no ring long hem kwiktaem blong talemaot ol laswan nius we yu kasem. Mo bambae yu no go luk hem blong i leftemap tingting blong yu.”

Yu traem tingbaot:

● Maet yu ting se i gud nomo blong yu talemaot ol tingting blong yu long sem boe oltaem. ?Be from wanem i wan denja?

“Ol boe we mi mi save olgeta, mifala i gud fren nomo. Mi mi no spenem plante aoa wetem olgeta long telefon, olsem we mi mi mekem wetem ol gel. Mo i gat sam samting we mi no save tokbaot wetem ol boe ya.”—Rina.

Baebol i talem se: “Man we i stap tingting gud fastaem, nao biaen i tok, hem i stap lukaot gud long laef blong hem, be man we i no kea long ol tok we hem i stap sakem, hem i stap spolem hem nomo.”—Ol Proveb 13:3.

Yu traem tingbaot: ?I tru se yu save kasem trabol sipos yu talemaot evri samting long saed blong yu long wan boe? ?Olsem wanem sipos yutufala i no moa fren? ?Bambae yu yu harem nogud se yu talemaot ol samting ya long hem?

Wan yangfala we nem blong hem Alice i talem se: “Yu no mas fraet long ol boe. Be sipos yu laekem wan boe, yu no mas giaman se yutufala i gud fren nomo. Yu mas blokem ol filing blong yu, olsem nao yu no save harem nogud.”

[Ol futnot]

[Bokis blong pija long pej 17]

TRU STORI: “Mi mo wan boe mitufala i gud fren mo mitufala i joen gud. Be afta mi luk se mitufala i stap storian longtaem moa, mo mitufala i tokbaot ol tingting blong mitufala. Mi kasem save se mitufala i bitim mak, from we hem i stap talem ol wari blong hem long mi. Ale wan dei, hem i sanem wan imel long mi mo i talem se hem i laekem mi. Mi no save se bambae mi talem wanem. Long wan saed mi harem gud, from we hem i ting se mi mi spesel. Be mi wari tu. Mi save se mitufala i no moa save stap olsem ‘gud fren,’ from we hem i ting se mitufala i laeklaekem mitufala. Sipos mi talem long hem se mitufala i yang tumas blong laeklaekem mitufala, bambae hem i harem nogud. Ale, mi talemaot evri samting long papa mo mama blong mi. Tufala i soemaot klia from wanem mi mas stop blong toktok wetem boe ya. Samting ya i tijim mi se fasin fren blong wan boe mo wan gel i save jenis kwiktaem. Fastaem tufala i gud fren, be kwiktaem nomo tufala i save laeklaekem tufala. Stat long taem ya, mi lukaot gud taem mi joen wetem ol boe, speseli taem mi sanem teks mesej long olgeta. Mo mi joen wetem ol boe long grup, i bitim we mi storian oltaem wetem sem boe nomo. Long rod ya, mi no save talemaot ol samting long saed blong mi, mo mi no bitim mak taem mi fren wetem ol boe.”—Elena.

[Bokis blong pija long pej 18]

I GUD YU ASKEM LONG PAPA MO MAMA BLONG YU

Yu traem askem long papa mo mama blong yu, blong tufala i talem tingting blong tufala long ol kwestin we oli stap aninit long toktok ya, “Yu traem tingbaot.” ?Tingting blong tufala i defren long tingting blong yu? Sipos yes, ?i defren olsem wanem? ?Wanem gudfala samting we yu save faenem long tingting blong tufala?—Ol Proveb 1:8.

[Bokis/​Tok blong pija long pej 18]

SAMTING WE OL NARAFALA YANGFALA OLI TALEM

Andre​—Sipos yu spenem plante taem wetem wan gel, i isi moa blong filing blong yu i stap kam strong, mo gel ya bambae i ting se yu yu laekem hem. Sipos yu no rere yet blong mared, yu no mas mekem wan gel i ting se yu wantem frenem hem.

Cassidy​—Mi mi fren gud kwiktaem nomo wetem eni man, mo mi gruap wetem ol boe nomo. Taswe mi mi no sem blong joen wetem ol boe. Fasin ya i gud, be i nogud tu. Sipos mi stap wetem wan boe, mo mi toktok long hem olsem we hem i wan gel, hemia i save givim rong tingting long hem. !I moa gud mi luk hem olsem we hem i brata blong mi!

[Bokis blong pija long pej 19]

ADVAES I GO LONG OL PAPA MO MAMA

I no rong blong wan yangfala i joen wetem ol boe no ol gel. Be olgeta we oli no rere yet blong mared, oli mas putum sam rul we oli mas folem.c Oli mas tingbaot se oli save stap olsem wan gud fren nomo blong narafala boe no gel.

?Wanem i save kamaot taem wan boe mo wan gel tufala i laeklaekem tufala, bifo we tufala i rere blong mared? Maet fastaem tufala i harem gud, be sloslo glad ya i lus. Hemia i sem mak long man we i sidaon insaed long wan trak we i no gat wil. Sloslo, boe mo gel ya i luksave se i no gat wan gudfala samting i save kamaot from fasin fren blong tufala. Samfala oli stat blong fren long fasin haed. Sam narafala oli no moa fren, ale oli harem olsem se narafala i giaman long olgeta, i spolem filing blong olgeta, mo tingting blong olgeta i foldaon. ?Yutufala i save mekem wanem blong givhan long yangfala blong yutufala, blong hem i no frenem wan boe no wan gel taem hem i no naf yet blong mared?—Prija 11:10.

Impoten samting se, yutufala i mas soemaot se yutufala i rere blong lesin long boe no gel blong yutufala, taem hem i wantem tokbaot ol fren blong hem. Olsem nao, yutufala i save luksave sipos hem i stat blong laekem narafala, mo yutufala i save givhan long hem.

Sam papa mo mama, oli no luksave se oli blokem boe no gel blong olgeta, taem hem i wantem tokbaot fren blong hem. Yutufala i traem tingbaot sam samting we sam yangfala oli talem.

“Mi mi wantem tokbaot boe we mi laekem long mama blong mi, be mi no talem from we mi fraet se bambae hem i kros.”—Cara.

“Taem mi talem long mama blong mi se mi intres long wan boe, mama i talem se: ‘!Yu no ting se bambae mi kam long mared blong yu!’ Hem i no talem se: ‘Ale, yu traem tokbaot fren blong yu long mi. ?Yu yu laekem wanem long saed blong hem?’ Sipos mama blong mi i askem kwestin olsem, bambae mi lesin moa long ol advaes blong hem.”—Nadeine.

Naoia yutufala i traem makem samting we i hapen taem papa mo mama tufala i lesin wetem longfala tingting, mo biaen tufala i givim advaes.

“Papa mo mama blong mi, tufala i no kros taem mi talemaot se mi mi intres long wan boe. Tufala i talem wanem we mi mas harem, be tufala i kasem save long filing blong mi tu. From samting ya, i isi blong mi lesin long ol advaes blong tufala. Mo hemia i mekem se mi save talemaot ol tingting blong mi.”—Corrina.

“Papa mo mama tufala i tokbaot boe mo gel we tufala i laekem taem tufala i yang. Tufala i eksplenem from wanem samtaem wan boe mo wan gel i no moa fren. Hemia i givhan long mi blong mi talemaot long tufala se mi laekem wan boe.”—Linette.

I gud blong luksave se i gat sam samting we i mekem se wan boe no wan gel we i no rere yet blong mared, i laekem narafala.

“Mi mi stap fren wetem wan boe long fasin haed, from we hem i mekem mi mi glad, mo hem i lesin long mi.”—Annette.

“I gat wan boe we mi laekem joen wetem. Oltaem hem i lesin long mi. Mi mi laekem taem narafala i lukluk long mi, nomata se hem i gud, no i nogud.”—Amy.

“Taem papa mo mama tufala i talem se mi mi naes, no sam klos we mi werem oli mekem mi naes, mi no nidim blong wan boe i talem sem toktok olsem long mi.”—Karen.

Yutufala i traem tingbaot ol kwestin ya:

?Mi save mekem wanem blong yangfala blong mi i no fraet blong toktok wetem mi?—Filipae 4:5.

?Mi mi ‘rere oltaem blong lesin, mo mi no hareap blong toktok’?—Jemes 1:19.

?Mi save mekem wanem blong yangfala blong mi i save se mi mi laekem hem mo mi glad long hem, nao hem i no go luk narafala blong i soemaot fasin ya long hem?—Kolosi 3:21.

Stamba poen: Yutufala i givhan long yangfala blong yutufala, blong hem i lanem se taem hem i gud fren wetem narafala, hem i mas lukaot gud se i no gat problem. Hemia wan fasin we i save givhan long hem taem hem i kam bigman.—Kolosi 3:5; 1 Tesalonaeka 4:3-6.

[Futnot]

[Chart long pej 17]

(Lukluk niuspepa)

BOUNDARIES

I GUD BLONG I NOGUD BLONG

✔ joen wanples wetem ol boe mo ol gel long grup  X joen oltaem wetem sem boe no sem gel nomo

✔ kasem save long olgeta  X talemaot ol tingting blong yu long hem

✔ harem gud blong storian wetem olgeta  X pleplei wetem filing blong hem

[Diagram long pej 18]

(Lukluk nuispepa)

JOEN LONG GRUP

PLEPLEI WETEM FILING

TAJEM

HOLHOLEM HAN

KISIM