Feta Blong Pengwen

PENGWEN ya we i laef long ol ples we i gat plante aes, i swim spid long solwota, nao wantaem nomo, hem i jamaot i go antap long aes. ?Wanem i mekem se hem i save spid olsem?

Tingbaot: Ol feta oli kavremap skin blong pengwen ya olsem wul. Ol feta oli holemtaet win, nao oli kam olsem wan kot we i mekem se pengwen i stap wom oltaem. Mo tu, ol feta ya oli mekem se hem i save swim spid, maet tu no tri taem moa kwik. ?Samting ya i hapen olsem wanem? Ol man we oli stadi long ol samting long solwota oli ting se smol win i stap kamaot long medel blong ol feta, we i mekem se solwota raon long hem i boel smol. Nao solwota i no moa holemtaet hem. Ale, hem i save brekem solwota isi nomo, nao hem i swim spid.

Ol man blong wokem sip oli stap traem blong folem sem fasin ya blong mekem ol sip oli spid moa. Oli wantem wokem sip long fasin we i save mekem solwota i boel raon long botom blong hem. Olsemia, solwota i no moa holemtaet sip, be sip i brekem solwota isi nomo nao i save spid we i spid. Be oli luk se i no isi blong mekem wan sip olsem. Oli stap traem blong mekem “wan skin no wan net blong kavremap botom blong sip we i olsem feta blong pengwen, be tingting blong olgeta i fasfas. Oli luk se i had blong mekem i sem mak.”

?Wanem Tingting Blong Yu? ?Feta blong pengwen i kamaot olsem nomo, no i gat wan Man we i wokem?