1 Ol Samting Oli Stap Jenis
“Plante taem, mifala i gat trabol, be neva tingting blong mifala i foldaon. Sam taem, mifala i no save rod, be neva mifala i lus olgeta.”—2 KORIN 4:8.
Ol man oli talem se fasin ya we man i kilim hem wan i ded, hem i wan “rod blong winim wan trabol we i stap blong smoltaem nomo.” Maet yu ting se trabol we yu fesem bambae i stap longtaem, mo i no gat rod blong stretem. Be maet trabol ya i blong smoltaem nomo. Mo tu, trabol ya i save kam gud long wan taem we yu no tingbaot.—Yu luk bokis ya “Ol Samting Long Laef Blong Olgeta i Jenis.”
Nating se ol trabol ya oli no jenis, i gud yu stretem olgeta sloslo, wan afta narawan. Baebol i talem se: “I nogud yufala i stap tingting tumas from ol samting blong tumora. Ol bisnes blong tumora i blong tumora. Trabol blong wan dei, hem i naf finis blong dei ya.”—Matiu 6:34.
?Be olsem wanem sipos yu fesem sam trabol we oli no save jenis, olsem wan sik we i stap longtaem, mared blong yu i brok, no wan we yu laekem hem tumas i ded?
Long ol taem olsem, i gat wan samting we yu save jenisim. Hemia tingting we yu gat long trabol blong yu. Taem yu lanem blong laef wetem wan trabol we yu no save jenisim, yu stap lanem blong gat stret tingting long ol samting. (Ol Proveb 15:15, King James Version) Mo tu, bambae yu naf blong faenem rod blong yu stanap strong, i bitim we yu wantem kilim yu wan i ded. Sipos yu mekem olsem, bambae yu naf blong gat stret tingting long ol trabol we yu no save jenisim.—Job 2:10.
TINGBAOT SAMTING YA: Yu no save go antap long wan bigfala hil, sipos yu mekem wan step nomo. Be yu save go antap long bigfala hil ya sipos yu mekem plante step. Yu save mekem sem samting taem yu fesem wan trabol we i olsem wan bigfala hil.
?YU SAVE MEKEM WANEM?: I gud yu tokbaot trabol blong yu long wan fren no famle blong yu. Olgeta ya bambae oli glad blong givhan long yu blong yu gat stret tingting long trabol we yu fesem.—Ol Proveb 11:14.