SAMTING WE GOD I MEKEM
Flaengfokis i Saksakem Sid Long Dakbus
OL MAN blong wokem garen oli save se oli mas planem kakae long stret ples mo long stret taem, sipos no, bambae i no gru gud. Be long dakbus, i gat wan narakaen samting i stap hapen. Samting we i flae antap long naet i saksakem ol sid, nao oli gru i kam ol bigfala tri. ?Hu i mekem wok ya? Ol flaengfokis.a
Oli Saksakem Sid
Plante flaengfokis oli stap flae olbaot long dakbus long naet, blong lukaot ol tri we frut blong olgeta mo wota blong flaoa blong olgeta i swit. Taem oli stap flae, bel blong olgeta i tantanem ol frut we oli kakae finis. Ol sid mo frut we oli kakae be bel i no tantanem, i kamkamaot long sitsit blong olgeta, i folfoldaon long graon mo i gru. Ol flaengfokis oli mekem wan narafala wok bakegen. Taem oli stap dring swit wota blong ol flaoa, oli stap maredem ol flaoa ya tu.
Ol flaengfokis oli stap flae i go longwe long naet, taswe oli saksakem sid olbaot long plante ples. Mo ol frut we bel blong olgeta i tantanem nao i kamaot long sitsit blong olgeta, hem i rij we i rij mo i mekem ol sid oli gru hareap. I klia se i nidim ol flaengfokis, blong maredem ol flaoa mo blong saksakem sid blong plante tri long dakbus.
Ol flaengfokis oli save gud rod blong olgeta, mo oli lukluk klia. Oli nidim tufala fasin ya taem oli stap flae i go longwe. Long naet, oli lukluk samting i klia moa bitim ol man. Mo tu, oli luksave defdefren kala. Be oli no flae long naet nomo, oli laekem blong flae long dei tu.
Insaed Long Famle
?YU YU SAVE? Taem flaengfokis i lukaot kakae, hem i lukluk mo i smelem blong save weples i stap. Be ol narafala bat oli defren. Oli singaot, mo taem voes blong olgeta i kasem wan tri we i gat frut long hem, signol i kambak long olgeta, nao oli save se i gat kakae long ples ya. Ol bigbigfala ae blong flaengfokis oli stret blong givhan long hem blong i wok long naet.
Long Samoa, i gat wan kaen flaengfokis we man mo woman tufala i stap tugeta ful laef blong tufala. Long sam kaen flaengfokis, mama i lukaot gud long pikinini blong hem. Hem i karem pikinini wetem hem blong plante wik, mo i givim titi long hem gogo i kam bigwan. I gat tu kaen flaengfokis we, taem wan mama i bonem pikinini, narafala mama i givhan long hem.
Sore tumas, plante kaen flaengfokis oli stap lus. Wan risen se, ol man oli stap spolem ples blong olgeta. Long ol aelan blong Saot Pasifik, sam tri mo flaoa oli dipen long flaengfokis nomo blong maredem. Taswe, sipos i no moa gat flaengfokis, ol tri mo flaoa ya tu bambae oli lus. I klia se wok blong ol flaengfokis blong lukaot long dakbus i impoten tumas.
a Ol flaengfokis oli stap long plante ples, olsem Afrika, Esia, Ostrelia, mo sam aelan long Pasifik.