Nius Blong Medel Is

Ol Man Blong Wokem Waen Long Kenan

Long yia 2013, ol man blong digim graon oli faenem wan bigfala rum aninit long graon. Samwe long 3,700 yia bifo, ol man Kenan oli wokem waen insaed long rum ya. Mo oli faenem 40 bigfala botel we oli graonpot. Waen we i stap long ol botel ya i naf blong fulumap 3,000 botel tede. Wan man blong digim graon i stadi gud long ol doti blong waen we i stap long ol botel ya. Nao hem i tokbaot ol man Kenan olsem ol gudfala man blong wokem waen, i se: “Oli lukaot gud se waen we i stap long ol botel ya i sem mak nomo.”

YU TRAEM TINGBAOT: Baebol i talem se ol man Isrel bifo oli wokem “waen we i beswan,” mo oli putum gud i stap long ol bigfala botel.—Sing blong Solomon 7:9; Jeremaea 13:12, NW.

Namba Blong Ol Man i Kam Antap

Niuspepa ya (Guardian) i talem se, namba blong ol pikinini we oli bon long Ijip long yia 2012, i 560,000 moa i bitim yia 2010. Man ya Magued Osman, we i wok blong wan kampani blong stadi long samting ya, nem blong kampani ya Baseera, i talem se: “Long olgeta yia bifo, i no gat wan taem we namba blong ol man long Ijip i go antap kwiktaem olsem.” Sam man we oli gat save, oli talem se sipos namba blong man i stap gohed blong kam antap kwiktaem olsem, Ijip bambae i trabol moa from wota, paoa, mo kakae.

YU TRAEM TINGBAOT: Baebol i talem se God i wantem we ol man oli kam plante mo oli “go stap long olgeta ples long wol.” Be hem i no wantem we oli bitim mak, nao oli no moa gat naf kakae mo ol narafala samting we oli nidim.—Jenesis 1:28; Ol Sam 72:16.

Oli Faenem Plante Mane

Klosap long wan bigfala rod long Isrel, ol man blong digim graon oli faenem bitim 100 kopa mane, we i gat tok ya “Namba Fo Yia” i stap long hem. Hemia namba fo yia we ol man Jiu oli rebel agens long ol man Rom (stat long yia 69 go kasem yia 70). Samting ya nao i mekem se ol ami blong Rom oli kam spolem Jerusalem. Bos blong ol man we oli digim graon, nem blong hem Pablo Betzer, i talem se: “Ating wan man i luksave se i no longtaem Jerusalem bambae i lus. Maet hem i luk ol ami blong Rom oli stap kam klosap long taon ya, . . . ale hem i go haedem mane blong hem. Hem i gat tingting blong kam karem bakegen, afta we faet i finis.”

YU TRAEM TINGBAOT: Long yia 33, Jisas i talem se ol ami blong Rom bambae oli raonem Jerusalem. Hem i talem long ol Kristin se oli mas ronwe i go antap long ol hil blong oli stap sef.—Luk 21:20-24.