Oli Ting Se Hem Nao Pasta

Osman wetem waef blong hem mo gel blong tufala oli stap prij wetem troli aotsaed long wan yad blong beregraon long Jili. Wantaem nomo wan bigfala grup blong ol man oli kam from wan ded, mo oli stap plei miusik we i laod we i laod. Sam long ol man ya oli ting se Osman hem i pasta blong evanjelik jos blong olgeta, nao oli kam luk hem oli putum han i goraon long hem mo oli stap talem se, “!Tangkiu tumas blong kam long stret taem, Pasta, mifala i save se bambae mifala i luk yu!”

Osman i traem blong talem se hem i no pasta blong olgeta, be from we i gat tumas noes, ol man ya oli no save harem hem. Sam minit i pas afta we ol man ya oli go long beregraon, samfala oli kambak luk hem mo oli talem long hem se: “Pasta, mifala i stap wet long yu long beregraon.”

Taem we noes i godaon, Osman i jes eksplenem long olgeta from wanem hem i kam long beregraon. Afta we ol man ya oli kros long pasta blong olgeta from we hem i no kam, oli askem long Osman se, “?Yu save kam talem sam tok blong Baebol long mifala?” Osman i agri.

Taem Osman i stap wokbaot i go long ples we bambae oli berem dedbodi long hem, hem i askem sam kwestin long saed blong woman ya we i ded, mo hem i tingbaot ol vas we hem i save serem wetem ol man ya. Afta we hem i kasem ples ya, hem i eksplenem se hem i hu mo i eksplenem se from we hem i wan Witnes blong Jehova, hem i joen long wok ya blong talemaot gud nius long ol man.

Afta we hem i ridim Revelesen 21:3, 4 mo Jon 5:28, 29, hem i eksplenem se i no tingting blong God we ol man oli stap ded. Be hem i eksplenem tu se God bambae i mekem ol dedman oli laef bakegen mo oli gat hop ya blong laef olwe long wol ya. Taem Osman i finisim tok blong hem, plante man oli kam putum han i goraon long hem, mo oli talem tangkiu long hem from “mesej blong gud nius blong Jehova.” Biaen, hem i gobak stanap long troli.

Afta long funerol ya, sam man mo woman oli kam long troli mo oli askem plante kwestin long saed blong Baebol long Osman mo famle blong hem. Oli gat wan longfala storian long taem ya, mo taem ol man ya oli aot, klosap oli karem evri buk we i stap long troli.