Oli Winim Nating Se i No Isi

RAON long wol, i gat bitim 7,000 defdefren lanwis. Ol defdefren lanwis ya i mekem i had long ol gavman, ol bisnes, ol skul mo olgeta we oli stap go long ol defren kantri oli toktok gud tugeta. Problem ya i stap long taem bifo finis. Eksampol, long yia 475 B.K.T, taem King Sekses i rul, ol man Pesia oli sanemaot ol leta we oli raetem long nem blong king i go long “wan handred twanti seven provins blong hem, i stat long kantri ya India long is, i go kasem kantri ya Itiopia long wes. . . Oli stap raetemdaon ol tok blong hem, mo oli tanem tok ya i go long ol lanwis blong evri provins, mo oli raetem long ol fasin blong raet blong ol lanwis ya wanwan.”a

Tede, plante ogenaesesen mo ol gavman oli no save mekem wan bigfala wok olsem. Be wan ogenaesesen nomo i mekem samting ya. Ol Witnes blong Jehova oli wokem ol magasin, ol rikoding, ol video, mo plante narafala buk wetem Baebol long bitim 750 lanwis. Hemia i minim tu samwe 80 saen lanwis we oli transletem. Oli wokem tu plante buk blong ol blaen man.

Antap long samting ya, ol Witnes oli no mekem wok ya blong kasem mane. Olgeta we oli mekem wok ya blong transletem ol buk mo ol narafala we oli kam blong givhan, oli volontia nomo. ?From wanem oli traehad blong tanem ol tok i go long plante lanwis? ?Mo olsem wanem oli mekem wok ya?