?Olsem Wanem Blong Soemaot Respek?

SAMTING WE I HAD

Hasban i talem se: “Taem mi mo waef blong mi mitufala i mared, mitufala i gat defren tingting long fasin ya blong soemaot respek. I no se tingting blong wan i stret mo tingting blong narawan i rong, nogat, be tingting blong mitufala i defren nomo. Oltaem mi harem se waef blong mi i sud respektem mi moa taem hem i toktok long mi.”

Waef i talem se: “Mi mi gruap long wan ples we ol man oli stap toktok strong, oli mufmuvum ol han mo fes blong olgeta, mo taem ol narafala oli stap storian, oli save katem toktok blong olgeta. Long tingting blong mifala, hemia i oraet nomo. Be fasin ya i defren olgeta long fasin we hasban blong mi i gruap long hem.”

Respek insaed long mared i no wan fasin we yu soemaot wanwan taem nomo; yu mas soemaot oltaem. ?Olsem wanem yu save respektem long hasban no waef blong yu?

SAMTING WE YU MAS SAVE

Hasban oli nidim respek. Baebol i talem long ol hasban se: “Man i mas lavem woman blong hem, i mas lukaot gud long hem olsem we i stap lukaot gud long bodi blong hem nomo.” Be hem i gohed i se: ‘Woman i mas gat bigfala respek long man blong hem.’ (Efesas 5:33) Tufala tugeta i wantem se narawan i lavem mo i respektem hem, be hasban i nidim moa we waef i respektem hem. Wan hasban we nem blong hem Carlos,a i talem se: “Hasban i mas haremsave se waef blong hem i trastem hem se i naf blong mekem ol samting, stretem ol problem, mo lukaot gud long famle.” Taem waef i respektem hasban blong hem mo i trastem hem se i naf blong mekem ol samting ya, hem i mekem i gud long hasban mo long hem tu. Wan waef we nem blong hem Corrine, i talem se: “Hasban blong mi i lavem mi moa taem mi respektem hem.”

I tru se waef tu i nidim respek. Hemia i tru from we hasban i no save lavem waef blong hem sipos i no respektem hem. Daniel i talem se: “Mi mas respektem tingting blong waef blong mi mo samting we hem i talem. Mo mi mas respektem filing blong hem. Nating se mi no kasem save from wanem hem i gat filing olsem, be hemia i no min se mi ting nating long filing blong hem.”

Tingting we narafala i gat long respek. Samting we i impoten, hemia se narawan i mas haremsave se yu respektem hem, be i no se yu yu ting se yu respektem hem. Hemia wan lesen we waef ya we yumi tokbaot hem long stat, i lanem. Hem i talem se: “Nating sipos mi ting se mi mekem samting we i oraet nomo, be sipos hasban blong mi i harem se mi no respektem hem, ale mi nao mi mas jenisim fasin blong mi.”

SAMTING WE YU SAVE MEKEM

• Yu raetemdaon tri fasin we yu laekem long hasban no waef blong yu. Ol fasin ya nao bambae oli givhan long yu blong yu respektem hem.

• Blong wan wik, yu traem makem fasin blong yu (be i no blong hasban no waef blong yu) folem ol samting ya daon.

Ol toktok blong yu. Wan stadi i soemaot se “long wan mared we i strong mo i hapi, taem hasban mo waef tufala i tokbaot wan problem, nao tufala i talem wan nogud toktok, be tufala i talem faef gudfala toktok antap long hem. Be long wan mared we bambae i brok, taem hasban mo waef tufala i talem wan nogud toktok, tufala i no talem wan gudfala toktok antap long hem.”b—Rul blong Baebol: Ol Proveb 12:18.

Yu askem se: ‘?Mi mi respektem hasban no waef long mi taem mi toktok? ?Mi mi stap faenem poen oltaem long hem, i bitim we mi talem wan gudfala toktok long hem? ?Voes blong mi i olsem wanem taem mi talem wan samting we mi luk, no mi komplen?’ ?Hasban no waef blong yu bambae i agri long ol ansa blong yu?—Rul blong Baebol: Kolosi 3:13.

Yu traem rod ya: Yu traem putum mak se evri dei, yu talem wan gudfala toktok long hasban no waef blong yu. Wan tingting se: Yu luklukbak long ol gudfala fasin blong hem we yu raetemdaon finis. Mo yu talemaot long hem wan fasin we yu laekem long hem, mo yu traem mekem samting ya oltaem.—Rul blong Baebol: 1 Korin 8:1.

Ol aksen blong yu. Wan waef we nem blong hem Alicia, i talem se: “Mi mi spenem plante taem blong mekem ol wok long haos, mo taem hasban blong mi i respektem ol wok blong mi, nao i putum ol samting long stret ples blong olgeta mo i wasem plet blong hem, mi mi harem se wok blong mi i no blong nating, mo mi harem se mi mi impoten long mared blong mitufala.”

Yu askem se: ‘?Ol aksen blong mi oli soemaot klia long hasban no waef blong mi se mi respektem hem? ?Mi mi spenem i naf taem wetem hem mo mi intres long hem?’ ?Hasban no waef blong yu bambae i agri long ol ansa blong yu?

Yu traem rod ya: Yu raetemdaon tri samting we yu wantem se narawan i mekem blong soemaot respek long yu. Mo narawan tu i mas mekem sem mak. Nao yu givim lis blong yu long hem mo hem i givim lis blong hem long yu. Ale yutufala wanwan i traem blong mekem ol samting ya blong soemaot respek long yutufala. Mo yu putum tingting blong yu long samting we yu mas mekem blong soem respek. Taem wan long yutufala i statem, narawan tu bambae i mekem sem mak.