Ol toktok we oli soemaot respek, oli olsem simen we i joenem ol brikis
OLGETA WE OLI MARED
3 Respek
?I MINIM WANEM?
Hasban mo waef we i gat respek, tufala i tingbaot tufala oltaem, hemia long taem ya tu we tufala i no gat sem tingting. Wan buk (Ten Lessons to Transform Your Marriage) i talem se: “Tufala i rere blong lego prapa tingting blong tufala. Tufala i gohed blong tokbaot defdefren tingting we tufala i gat. Tufala i lesin wetem respek, mo tufala i traem faenem rod we tufala tugeta i glad long hem blong winim problem.”
RUL BLONG BAEBOL: “Man we i gat lav . . . hem i no tingbaot hem wan nomo.”—1 Korin 13:4, 5.
“Respek i min se mi tingbaot waef blong mi olsem wan samting we i sas we i sas, mo mi no wantem mekem wan samting blong spolem hem o mared blong mitufala.”—Maeka.
?FROM WANEM I IMPOTEN?
Taem tufala i gat respek, tufala i no talem ol tok agens, mo ol tok blong jikim mo daonem narawan. Ol man we oli stadi long ol trabol long mared, oli talem se ol tok olsem hemia fas saen se tufala i stap long rod blong divos.
“Sipos yu talem ol tok we i no kaen, maet long fasin we i no klia o yu tok plei, bambae waef blong yu i no moa trastem yu. Bambae hem i harem se hem i nating nomo, mo yu bambae yu spolem mared blong yu.”—Bryan.
?YU SAVE MEKEM WANEM?
JEKEM YU WAN
Makem gud ol toktok mo aksen blong yu blong wan wik. Nao yu askem se:
‘?Hamas tok we mi talem agensem hasban o waef blong mi, mo hamas tok we mi talem blong leftemap hem?’
‘?Mi mekem wanem blong soemaot respek long hem?’
YUTUFALA I TOKBAOT
?Wanem ol toktok mo aksen blong mitufala we i soemaot respek?
?Wanem ol toktok mo aksen blong mitufala we i no soemaot respek?
TRAEM HEMIA
Yu raetemdaon tri rod we yu wantem se hasban o waef blong yu i soemaot respek long yu, mo yu givim long hem. Hem i mekem sem samting mo i givim long yu, ale yutufala tugeta i traehad blong folem ol rod ya.
Mekem wan lis blong ol gudfala fasin blong hasban o waef blong yu. Talem long hem se yu laekem ol fasin ya.
“Blong respektem hasban blong mi, mi soemaot long ol aksen blong mi se mi tinghae long hem mo mi wantem we hem i glad. Plante taem ol smol samting nomo we yu talem o mekem, i soemaot respek.”—Megan.
I no yu we yu talem se yu respektem hasban o waef blong yu, be hem nao i mas harem olsem.
RUL BLONG BAEBOL: ‘Yufala i mas werem ol fasin ya olsem we oli klos blong yufala: Yufala i mas sore long ol man, kaen, tingting i mas stap daon, yufala i mas kwaet man mo gat longfala tingting.’—Kolosi 3:12.