Tingting Daon

?I MINIM WANEM?

Man we i gat tingting daon i gat respek. Hem i no flas, o i no ting se hem i moa impoten. Be, hem i soem intres long narafala, mo hem i glad blong lanem samting.

Samfala oli ting se man we i gat tingting daon i wan slak man, be hemia i no tru. Blong talem stret, tingting daon i halpem man blong i luksave mastik blong hem, mo samting we hem i no naf blong mekem.

?FROM WANEM I IMPOTEN?

• Tingting daon i mekem ol man oli joen gud. Buk ya The Narcissism Epidemic i talem se: “Man we i gat tingting daon, i isi blong hem i faenem ol fren. Mo i isi blong hem i joen wetem narafala.”

• Tingting daon i save givhan long pikinini blong yu. Taem pikinini i lanem blong gat tingting daon, bambae i isi blong hem i faenem wan wok taem hem i kam bigwan. Dokta Leonard Sax i talem se: “I had blong wan yangfala i faenem wok sipos hem i tingbaot hem wan tumas mo i no luksave samting we hem i no naf blong mekem. Be sipos hem i tingbaot tingting blong narafala, bae hem i gat moa janis blong kasem wan wok.”a

TIJIM PIKININI

Tijim hem blong i no tingbaot hem wan nomo.

ADVAES BLONG BAEBOL: “Sipos wan man i stap ting se, “Mi mi wan man ya,” be hem i nating nomo, hem i stap giaman nomo long hem.” —Galesia 6:3.

• No talem ol tok we i givim rong tingting. Ol tok olsem, “Yu save kasem evri samting we yu wantem” mo “Yu save mekem eni samting we yu wantem,” oli ol gudfala toktok, be oli no save givhan long hem. Pikinini i save glad moa sipos hem i putum sam mak mo i wok had blong kasem ol mak ya.

• Talem gudfala tok from stret samting we hem i mekem. Sipos yu talem long pikinini se “yu yu taf tumas,” hemia i no givhan long hem blong i gat tingting daon. Yu mas talem gudfala toktok from stret samting we hem i mekem.

• Putum rul taem pikinini i yusum sosol media. Long sosol media, ol man oli laekem blong leftemap olgeta mo tokbaot ol gudfala samting we oli save mekem. Hemia i no tingting daon.

• Tijim hem blong i kwik blong talem sori. Halpem pikinini blong i luksave mastik blong hem mo talem sori.

Soemaot fasin tangkiu.

ADVAES BLONG BAEBOL: ‘Yufala i mas gat fasin ya blong talem tangkiu.’—Kolosi 3:15.

• Talem tangkiu from ol samting we God i wokem. Pikinini i mas lanem blong glad from ol samting we oli stap raonabaot long hem, mo hem i mas kasemsave se yumi nidim ol samting ya blong stap laef. Yumi nidim blong pulum win, wota blong dring, mo kakae. Yu tokbaot ol samting ya wetem pikinini blong hem i gat tangkiu from ol samting we God i wokem.

• Glad long samting we narafala i mekem. Yu rimaendem pikinini blong i luk narafala se i gud moa. Mo i gud we hem i lanem samting long narafala, i bitim we hem i jalus.

• Talem tangkiu. Tijim pikinini blong i talem “tangkiu” we i kamaot long hat. Hemia bambae i halpem hem blong i gat tingting daon.

Tijim pikinini blong i halpem narafala.

ADVAES BLONG BAEBOL: “Yufala i mas mekem tingting blong yufala i stap daon mo yufala i mas luk ol narafala man se oli hae moa long yufala. Mo long semtaem, yufala i no mas tingbaot yufala nomo, be yufala i mas tingbaot ol narafala man tu.”—Filipae 2:3, 4.

• Lanem hem blong i mekem ol wok long haos. Sipos yu talem long pikinini se i no nid blong hem i mekem ol wok long haos, bambae hem i ting se ol samting we hem nomo i wantem, oli moa impoten. Ol wok long haos oli mas stap fasples mo pleplei long seken ples. Yu givhan long hem blong i luksave se taem hem i mekem wan wok blong givhan long narafala, narafala bambae i glad mo i respektem hem.

• Talem long hem se i wan blesing blong halpem narafala. Hemia wan rod blong givhan long pikinini blong i kam bigman long tingting. I gud yu halpem hem blong i faenem man we i gat nid, mo yu talem samting we hem i save mekem blong givhan long man ya. Talem tangkiu mo sapotem hem taem hem i givhan long narafala.