Bilif Blong Samfala

Ol Hindu

oli bilif se man i bon bakegen plante taem long ol defdefren bodi o laef. Mo taem man i safa, hemia from we hem i mekem wan nogud samting long laef ya o long wan narafala laef bifo. Sipos man i kasem mak we i no moa tingbaot ol samting blong wol ya, bambae hem i no moa bon bakegen (moksha).

Ol Muslim

oli ting se taem man i safa, hemia i blong panisim hem o traem bilif blong hem. Presiden blong Sosaeti blong Islam long Not Amerika, Dokta Sayed Sayid, i talem se ol trabol we oli mekem yumi safa, oli tijim yumi “blong stap glad long ol blesing we God i givim, mo blong tingbaot ol man we oli trabol.”

Ol Man Jiu

oli ting se man i safa from ol samting we hem nomo i mekem. Sam man Jiu oli talem se gudfala man we i safa, bambae i kasem plante blesing taem hem i laef bakegen. Wan skul blong ol man Jiu (Kabala), i tijim se man i bon bakegen plante taem long ol defren bodi o laef. Hemia i min se hem i gat plante janis blong sore from ol sin blong hem.

Ol Budis

tu oli bilif se man i bon bakegen plante taem. Oli talem se man ya bambae i gohed blong safa gogo hem i no moa gat ol nogud tingting, filing, mo fasin. Sipos hem i kam waes, i mekem ol gudfala wok, mo i gat tingting we i klin, hem i save kasem nirvana, hemia i min se bambae i no moa safa.

Ol Konfusenis

oli ting se bighaf blong ol man oli safa from we “oli mekem ol bigfala mastik” (A Dictionary of Comparative Religion). Oli tijim se sipos man i mekem ol gudfala fasin, bambae hem i no safa tumas. Be oli ting se plante taem man i safa from wan samting we “ol spirit oli mekem blong kontrolem laef blong hem. Long taem olsem, man i mas akseptem nomo samting we ol spirit ya oli mekem.”

Ol Man Blong Kastom

oli ting se ol rabis spirit oli mekem yumi safa. Oli bilif se ol rabis spirit ya oli save givim gudlak o badlak, mo man i save mekem sam kastom blong i no moa safa tumas. Taem man i sik, oli ting se ol kastom mo meresin blong kleva oli save agensem wok we ol rabis spirit oli mekem long hem.

Ol Kristin

oli bilif se sin blong fas man mo woman i mekem yumi safa, olsem Baebol i tokbaot long buk blong Jenesis. Be plante skul oli ademap sam moa tingting blong olgeta. Sam Katolik oli talem se taem man i safa, hemia i olsem ‘wan presen we hem i givim long God,’ nao God i save yusum presen ya blong givhan long jos o sevem wan narafala man.