?Olsem Wanem Blong Glad Long Laef?

Wok Had

“Hem i mas wok had, mo i mas yusum han blong hem blong mekem ol gudfala wok. Olsemia, hem i save gat samting blong serem wetem man we i gat nid.”—EFESAS 4:28.

Krieta blong yumi i enkarejem yumi blong gat gudfala tingting long saed blong wok. ?From wanem? Man we i wok had i glad from we hem i save gat samting mo i save givim samting we famle blong hem i nidim. Hem i save givhan tu long man we i gat nid. Mo bos blong hem bambae i glad long hem. Taswe wan gudfala man blong wok bambae i no lusum wok blong hem. Baebol i talem se ol frut blong hadwok oli “ol presen we i kam long God.”—Prija 3:13.

Tok Tru

“Mifala i sua gud se tingting blong mifala we i stap stikim mifala i klin nomo. Mifala i wantem tumas we oltaem mifala i stap mekem i stret nomo long olgeta samting.” —HIBRU 13:18.

Sipos yumi mekem i stret long evri samting, bambae yumi no ting nating long yumi wan, yumi gat pis, mo yumi slip gud long naet. Mo tu, ol narafala bambae oli trastem mo respektem yumi. Ol man blong giaman mo stil, oli no save kasem ol gudfala samting ya. Mo tu, tingting blong olgeta i stikim olgeta, mo maet oli fraet se wan dei ol man bambae oli faenemaot samting we oli stap mekem.

Gat Stret Tingting Long Saed Blong Mane

“I nogud yufala i gat fasin ya blong laekem mane tumas. Sipos yufala i gat wanem samting, be yufala i mas harem gud long hem.”—HIBRU 13:5.

Yumi nidim mane blong pem kakae mo ol narafala samting we yumi nidim. Be “fasin blong laekem mane tumas” hem i wan denja. Hem i save mekem wan man i yusum olgeta taem mo paoa blong hem blong kasem mane. Taswe, bambae samting ya i save afektem mared blong hem, ol pikinini, mo helt blong hem. (1 Timoti 6:9, 10) Antap long samting ya, man we i laekem mane tumas i save gat tingting blong mekem ol raf wok. Wan waes man i talem se: “Man we i mekem gud wok blong hem, bambae hem i kasem plante blesing, be man we i kwik blong kam rij, bambae oli faenemaot yet se hem i rong.”—Ol Proveb 28:20.

Jusum Beswan Edukesen

“Yu mas holemgud waestok we i wok gud, mo fasin blong yusum gud tingting.”—OL PROVEB 3:21.

Wan gudfala edukesen i save givhan long yumi blong karem ol responsabiliti blong yumi, taem yumi kam bigman o kam papa mama. Be gudfala edukesen nomo, i no save mekem se yumi gat evri samting we yumi nidim, mo yumi hapi. Taswe blong haremgud long evri samting long laef, yumi nidim blong kasem edukesen we God i givim. Baebol i tokbaot wan man we i obei long God se: “Evri samting we hem i mekem, bambae i go gud.”—Ol Sam 1:1-3.