?Olsem Wanem Teknoloji I Save Afektem Tingting Blong Yu?

Ol man oli nidim blong lanem plante samting long saed blong skul, wok, o sam narafala samting, mo teknoloji i save givhan long olgeta. Tede i moa isi blong kasem ol infomesen i bitim bifo, mo yu save kasem olgeta nating se yu stap nomo long haos.

Be ol man we oli spenem tumas taem long teknoloji, oli faenemaot se . . .

oli no save tingting gud long samting we oli stap ridim.
i had blong oli fokas long wan samting nomo.
oli les hariap nomo taem oli stap olgeta wan.

SAMTING WE YU MAS SAVE

Wan yangfala gel i mekem plante samting wantaem. Hem i stap teks long fon, i video kol wetem wan fren, mo i yusum kompiuta mo buk blong stadi.

TAEM YU RID

Ol man we oli yusum divaes blong olgeta oltaem, samtaem oli nogat longfala tingting blong ridim wan ful atikol, taswe bambae oli rid hariap nomo blong kasem ol men tingting.

Fasin blong rid hariap i save givhan long yu blong faenem wan ansa kwiktaem. Be i no givhan sipos yu wantem kasemsave gud long wan topik.

BLONG TINGBAOT: ?Yu yu naf blong tingting gud taem yu ridim wan longfala teks? ?Olsem wanem fasin ya i save halpem yu blong lanem moa samting?—OL PROVEB 18:15.

TAEM YU FOKAS

Sam man oli yusum teknoloji blong mekem plante samting wantaem. Eksampol, oli stadi mo long semtaem oli teksem ol fren. Be taem man i mekem olsem, tingting blong hem bambae i olbaot, nao bambae hem i no save mekemgud tufala samting ya.

I tru se i had blong fokas long wan samting nomo, be fasin ya i save halpem yu blong lanem samting. Wan yangfala we nem blong hem Grace i talem se: “Hemia i mekem se yu no mekem tumas mastik mo no stres tumas. Mi lanem se i moagud blong fokas long wan samting nomo, mo blokem ol samting we oli save distebem mi.”

BLONG TINGBAOT: ?Teknoloji i mekem se i had blong fokas mo rimemba ol samting we yu stadi long hem? —OL PROVEB 17:24.

TAEM YU STAP YU WAN

Sam man oli no laekem blong stap olgeta wan, nao oli yusum teknoloji blong mekem se oli bisi. Wan woman we nem blong hem Olivia i talem se: “Sipos mi stap nomo blong 15 minit we mi no jekem fon, tablet o onem TV, mi harem se mi les we.”

Be sipos man i wantem lanem samting, hem i nidim blong stap hem wan blong i save tingting dip.

BLONG TINGBAOT: Taem yu stap yu wan, ?yu stap yusum taem ya blong tingting? —1 TIMOTI 4:15.

SAMTING WE YU SAVE MEKEM

?YU YU STAP YUSUMGUD TEKNOLOJI?

?Olsem wanem yu save yusum teknoloji blong lanem samting? ?Olsem wanem teknoloji i save spolem fasin ya blong tingting gud mo lanem samting?

ADVAES BLONG BAEBOL: “Yu mas holemgud waestok we i wok gud, mo fasin blong yusum gud tingting.” —OL PROVEB 3:21.

ASKEM YU WAN SE . . .

?I had blong tingting gud taem mi ridim wan longfala mesej long wan divaes? Sipos yes, ?wanem i stap distebem mi?
?Mi save mekem wanem blong ol samting ya oli no distebem mi?

Traem hemia: Ridim wan paragraf fastaem mo biaen yu ridim plante moa. Rid laod mo sloslo blong yu save fokas long samting we yu stap ridim.

?Mi mi tekem taem blong tingting gud long ol samting we mi stap ridim?

Traem hemia: Long en blong stadi, tekem ten minit blong tingtingbak long ol samting we yu bin lanem.

?Wanem situesen i mekem se yu wantem mekem plante samting long semtaem?
?Wanem i save givhan long yu blong fokas long wan samting nomo?

Traem hemia: Taem yu stadi, tekemaot ol samting we i save distebem yu, nao yu save fokas moa long samting we yu stap ridim.

ADVAES BLONG BAEBOL: “Yu mas kasem waes mo yu mas kasemsave samting.”—OL PROVEB 4:5.