?WOL BLONG YUMI BAMBAE I LUS?
FRESWOTA
LAEF long wol ya bambae i no posibol sipos i no gat wota. I tru se, long olgeta laef samting we God i wokem, bighaf hem i wota. I gat ol lek, ol reva, ol swam, mo ol wota aninit long graon, we i mekem se ol man mo ol animol oli gat wota blong dring, mo i mekem se samting we yumi planem oli gru.
Ol Samting We i Mekem Se i No Gat Naf Freswota
Bighaf blong planet blong yumi, i fulap long wota. Be World Meteorological Organization i talem se i gat “0.5 pesen nomo blong wota long wol we yumi save yusum, mo freswota.” Nating se i olsem, hemia i naf blong ol laef samting long wol. Be bighaf blong ol wota long wol, oli kam nogud o man i no save kasem, from we i no gat naf wota mo i gat klaemet jenis. Ol saentis oli talem se long ol 30 yia we i kam, faef bilian man bambae oli no gat naf wota.
Wol Blong Yumi—God i Krietem Blong i Stap Olwe
God i krietem wol ya long wan fasin we oltaem bambae i gat wota. Mo tu, graon, ol laef samting long wota, mo san, oli wok gud tugeta blong mekem se wota i stap klin oltaem. Traem luk sam pruf we i soemaot se God i krietem planet blong yumi blong i stap olwe.
Ol saentis oli faenemaot se graon i save givhan blong karemaot plante samting we i save mekem wota i doti. Sam plant we oli gru long ol swam, oli save karemaot naetrojin, mo ol kemikol olsem phosphorus mo pesticides.
Ol saentis oli bin faenemaot olsem wanem ol samting long neija oli save mekem se wota i gohed blong stap klin. Taem wota i ron kwik, hemia i mekem se ol doti we oli stap long hem, oli kam slak mo sofsof, biaen ol smosmol bebet oli kakae ol doti ya.
Sam kaen sel blong freswota oli save tekemaot sam rabis kemikol long wota long sam dei nomo, mo maet wok we oli mekem i gud moa i bitim ol meresin we oli putum long wota blong klinim.
Planet blong yumi i gohed blong holem wota, from i gat wota saekol. Wota saekol mo ol narafala wok we wota i mekem blong klinim hem wan, oli mekem se wota i no goaot long wol, o i finis.
Samting We Ol Man Oli Traem Mekem
Taem yumi fiksim ol oel we i lik, mo yumi sakem ol samting we i posen long stret ples blong olgeta, yumi givhan blong mekem se ol freswota oli stap klin oltaem
Sam man blong stadi oli talem se yumi mas lukaot gud oltaem blong no westem wota. Mo blong mekem se wota i no kam doti tumas, oli givim advaes ya se yumi mas fiksimap trak blong yumi sipos oel i lik, mo yumi no mas sakem ol meresin i go long wota blong toelet, o kafsaedem wan samting we i posen i go long dren blong wota.
Ol saentis oli faenemaot sam niufala rod blong karemaot sol long solwota. Mak blong olgeta, hemia blong mekem se i gat plante moa freswota blong dring.
Be blong karemaot sol long solwota hemia i had, from i nidim plante mane mo paoa. Long 2021, long wan ripot we oli tokbaot olsem wanem blong protektem ol wota blong dring, wan oganaesesen we Yunaeted Nesen i stanemap, i talem se: “Raon long wol, namba blong ol masin we oli stap mekem wok ya i mas dabol.”
Ol Risen We i Givim Hop—Samting We Baebol i Talem
“God . . . i pulum ol drop blong wota i go antap, oli kam klaod mo oli jenis i kam ren. Ale ol klaod ya oli kafsaedem ren i kamdaon, nao oli folfoldaon i kamdaon long ol man.”—Job 36:26-28.
God i krietem wan naturol saekol blong protektem ol wota.—Prija 1:7.
Traem tingbaot: From we God i krietem wol long wan fasin we wota i save gohed blong stap klin, i stret nomo blong bilivim se hem i rere mo i gat paoa blong stretem olgeta problem we man i mekem. Yu luk haf ya “God i Promes Se Wol Blong Yumi Bambae i Stap,” long pej 15.