Stadi 8

Frut i Kamaot Taem Yu Mekemrere

1-5. ?Fasin blong mekemrere i impoten long hu, mo from wanem?

¹ Aposol Pol we i prij long ol hiten man, i talem long Taetas we i stap kampani wetem hem long minista wok, se hem i mas gohed blong “talemgud long ol [Kristin] . . . oli mas stap rere oltaem blong mekem ol gudfala wok.” (Taet. 3:1) Hemia i min se oli mas rere long tingting mo long ol fasin blong olgeta, blong mekem sam wok long fyuja.

² Blong mekem enikaen tiokratik wok, i impoten blong rere fastaem. I tru, taem yu wantem mekem wan wok we neva yu mekem bifo, yu mas reregud fastaem from we hemia i wan nyufala ekspiryens. Be taem bambae save blong yu i gru moa, yu save yusum ol save ya we yu kasem finis long ol stadi blong yu mo ol ekspiryens we yu bin kasem. Nating se plante taem yu mekem wan kaen wok, be i gud blong mekemrere wok ya oltaem.

³ Olgeta we oli gat tok oli mas mekemrere tok ya. Be i no olgeta nomo. Enikaen man we i wantem kamgud moa long minista wok blong talemaot gud nyus i mas mekemrere. I tru, sipos yu yu mekem wok blong prij long ol haos wanwan long plante manis no plante yia finis, yu yu no moa tekem plante taem blong mekemrere bifo yu go blong prij. Nating se i olsem be taem yu mekemrere fastaem, yu yu save kamgud moa oltaem. I sem mak taem yu mekem wan Baebol stadi. Taem yu bin mekem faswan Baebol stadi wetem wan man, yu yu tekem plante taem blong reregud long hem. Nating se plante taem yu stadi long wan japta bakegen, be bambae yu yu save lidim moa gud wan Baebol stadi sipos yu mekemrere fastaem mo yu stap tingbaot studen blong yu. Samting ya i tru tu taem yu mekem wan tok long kongregesen. Ol ekspiryens we yu kasem long plante yia finis oli save givhan bigwan long yu. Be sipos yu mas mekem wan tok, i nogud sipos yu yu no mekemrere tok ya fastaem. Yu no mas traem mekem olsem.

⁴ Long Tiokratik Skul, i gud blong yumi evriwan i mekemrere ol tok. Yumi wanwan yumi gat program blong skul mo yumi save ridim ol japta blong Baebol mo ol narafala buk we oli yusum long ol miting. Sipos yumi mekemrere gud ol samting ya, bambae yumi kasem moa gudfala frut from. Be sipos yumi no luksave se i gud blong mekemrere fastaem, yumi save mestem ol gudfala blesing blong skul ya.

⁵ I tekem taem blong mekemrere, be frut we i kamaot long hem i gud. Fasin blong mekemrere i no givhan nomo blong givim ol gudfala ansa, be hem i givhan long yumi tu blong kasem save long tingting blong Jeova mo toktok moa gud “klin lanwis,” hemia trutok. (Sef. 3:9) Blong mekemrere tiokratik skul oltaem, maet fastaem yu save ridim mo stadi ol samting we bambae skul i tokbaot wetem ol memba blong famle blong yu no wetem sam fren. Evriwan we oli givim nem blong olgeta long skul ya oli gat jans blong givim ol tok. Hemia nao sam advaes blong soemaot olsem wanem yu save mekem olgeta oli reregud.

6. ?Olsem wanem yumi save mekemrere Baebol riding we yumi mekem long Tiokratik Skul?

⁶ Ol Baebol riding. Long Tiokratik Skul i gat wan haf we man i mas ridim Baebol long bigfala voes. Blong mekemrere tok olsem, yu mas ridimgud haf ya we oli givim long yu. Yu mas save olsem wanem blong talem ol nem mo ol tok we oli strong blong talemaot. Yu mas tren blong rid long bigfala voes blong tok blong yu i rongud mo yu save talemgud ol tok wanwan. Mo yu mas lukaotgud se tok blong yu i no bitim taem.

7-11. ?Taem yumi mekemrere wan tok we i stanap long wan buk no magasin, wanem tingting yumi mas gat we bambae i givhan long yumi blong jusum ol poen we yumi wantem yusum?

⁷ Wan tok we i stanap long haf blong wan buk no magasin. Faswan samting se yu mas ridimgud haf ya we bambae yu mekem tok long hem. Makem ol bigfala poen no raetemdaon ol bigfala poen long wan pepa. Yu mas kasem save long ol bigfala tingting we i stap long haf ya. ?Nao, bambae yu jusum wanem haf? Yu mas tingbaot se bambae yu no save talemaot evri tingting from we yu no mas bitim taem. Blong givhan long yu blong jusum, tingbaot ol poen ya: (1) Wanem kaen man we bambae oli lesin long tok blong yu, mo wanem fasin blong tok blong yu we i save givhan long olgeta long laef blong olgeta, mo (2) wanem stampa tok blong yu mo olsem wanem tok ya i save wok long laef blong man.

⁸ Tingbaot ol man we bambae oli lesin long yu, yu wantem jusum ol haf long wan magasin no buk we bambae oli intres long hem mo i save givhan long olgeta. Sipos yu faenem se sam haf long buk no magasin we yu yu yusum oli hevi tumas long ol man we bambae oli lesin long tok blong yu, i gud yu yu tingting long ol narafala haf. Mo tu yu save jusum ol vas blong Baebol we bambae oli pruvum gud ol poen long tok blong yu. Sipos yu stap tingbaot ol man we bambae oli lesin long yu, bambae yu no save traem blong putum tumas tingting long tok blong yu. From we sipos yu mekem olsem bambae yu mas toktok kwik blong talemaot olgeta, mo bambae oli no save kasem bigfala poen we yu wantem soemaot. Taswe i gud blong yusum sam tingting nomo mo eksplenem gud olgeta.

⁹ I gud we ol studen we oli stap givim tok, oli gat wan plan blong givimaot tok blong olgeta. Maet yu save mekem plan long tok blong yu olsem we yu stap toktok long wan man taem yu stap prij long ol haos wanwan. No maet yu ansa long wan kwestin taem yu mekem visit long man bakegen. No maet yu tekem jans blong prij long wan man. No maet yu save givim tok blong yu i olsem we yu stap eksplenem wan samting long prapa pikinini blong yu. I gat plante samting we yu yu save tingbaot blong yusum. I impoten blong yusum wan rod we i rili stap hapen long laef. Taswe yu mas tingtinggud blong jusum wanem rod bambae yu yusum blong givim tok blong yu. Yu save tokbaot samting ya wetem ol narafala pablisa tu, from we maet olgeta oli save givim sam gudfala advaes long yu.

¹⁰ ?Yu yu jusum wanem stampa tok mo olsem wanem tok ya i save wok long laef blong man? Tingbaot samting ya taem yu jusum ol save we yu wantem tokbaot. Yu no yusum ol poen ya we oli no laenap wetem stampa tok blong yu mo stampa tingting long tok blong yu. Plante taem i moa gud blong yusum ol tingting we oli stap long buk no magasin ya finis i bitim we yu yusum sam tingting long ol narafala ples. Samting ya i no min se yu no save yusum wan gudfala pijatok, no wan narafala poen we bambae i givhan long ol man we oli lesin long yu blong kasem gud tok blong yu. Yu mas lukaotgud se tok blong yu bambae i givhan long ol man we oli stap lesin long yu blong olgeta oli save kasem gudfala frut from.

¹¹ Afta we yu jusum stampa tok mo fasin blong tok blong yu, maet yu faenemaot se sam haf blong buk no magasin ya oli no laenap wetem tok blong yu. I no nid blong yusum evri haf. Be yu mekem olsem: Traehad blong jusum wan stampa tok mo fasin blong tok blong yu we bambae i givim jans long yu blong yusum plante tingting blong buk no magasin we yu stap tokbaot.

12. ?Olsem wanem yumi save wokem wan tok taem oli givim ol vas blong Baebol nomo long yumi?

¹² Yusum ol vas blong Baebol blong mekem wan tok. Samtaem maet oli givim wan lis blong ol vas blong Baebol long yu blong mekem wan tok. Maet oli kamaot long buklet ya “Bible Topics For Discussion” no long buk ya “Reasoning From The Scriptures,” sipos ol buk ya oli stap long lanwis blong yu. Stampa tingting se nao yu mas wokem ol vas blong Baebol ya i kam olsem wan tok no i olsem wan storeyan taem yu yu prij long ol haos wanwan. Sipos i gat plante vas long lis ya i bitim we yu save yusum long taem we oli givim long yu, yu save jusum olgeta we yu wantem yusum nomo. Jusum hamas yu save eksplenem gud, i stret long taem we oli givim long yu. Nao tingtinggud long ol vas ya we yu wantem yusum. Traem tingbaot from wanem yu wantem yusum ol vas ya. Mekemrere tok blong yu blong soemaot long ol man we oli lesin, from wanem risen yu yusum ol vas ya wanwan. Taem yu ridim evri vas blong Baebol, yu mas makem ol bigfala tok. Biaen yu yu save makem stampa tok bakegen taem yu soemaot olsem wanem blong mekem save ya i wok.

13-15. ?Wanem samting yumi mas mekem blong mekemrere wan tok we oli givim stampa tok blong hem nomo long yumi?

¹³ Taem oli givim stampa tok nomo long yu. Samtaem long Tiokratik Skul, long Miting Blong Kingdom Wok no long ol narafala program blong miting, oli save givim long yu wan tok we oli talem stampa tok blong hem nomo long yu. Mo tu oli no givim ol stampa tingting blong tok ya. Sipos i olsem, i gud blong mekem olsem: Tingtinggud long tok ya mo makemdaon ol bigfala tingting we yu bilif se i gud blong tokbaot. Faswan samting ya i impoten from we i save mekem tok blong yu bambae i olsem nyufala tingting, i no blong talemaot bakegen ol samting we ol narafala man oli talem finis. Samting ya maet i save givhan long yu blong no spenem plante taem blong lukaotem mo ridim ol samting we yu no nidim, be bambae hem i givhan long yu blong go stret long samting we yu nidim blong stadi long hem. Mo tu bambae tok blong yu i kamaot long prapa fasin blong toktok blong yu be i no long wan narafala fasin we i no stret long yu. I gud blong tokbaot stampa tok wetem sam man we oli bigman long saed blong speret. Olgeta oli save givim sam gudfala tingting olsem wanem blong wokemgud tok ya.

¹⁴ Naoia yu yu rere blong yusum sam narafala tingting. Blong mekem olsem, yu yu save stadi dip long Baebol mo ol buk blong Sosaete wetem ol konkodens mo indeks blong Sosaete. Blong kasem gudfala samting long buk olsem, lukluk long lis blong ol japta blong buk ya. Biaen traem lukluk indeks blong faenem ol save we bambae i givhan long yu moa. Fasin blong jusumgud bambae i givhan long yu blong no spenem tumas taem. Taem yu yu stap mekem riding, i gud blong lukaot gud from maet sam poen we yu yu intres long olgeta oli save pulum yu blong yu lego tingting we yu wantem tokbaot, mo oli no stret nating long stampa tok blong yu. Yu save lukaotgud long samting ya sipos yu yu ridim ol save long buk kwiktaem nomo, mo makem ol poen nomo we yu ting se yu save yusum. Plante taem i naf blong makem stampa poen long evri haf. Nao yu save ridimgud ol haf ya nomo we oli laenap wetem tok blong yu.

¹⁵ Wetem ol prapa tingting blong yu mo ol tingting we yu faenem long ol buk no sam narafala ples bakegen, naoia yu yu rere blong jusumaot ol gudfala tingting we yu save tokbaot, stret long taem ya we oli givim long yu. Blong save wanem tingting bambae yu yusum, yu save tingbaot ol kwestin ya: ?Tingting ya i save wok long laef? ?Hem i save mekem man i intres long hem? ?Bambae hem i makemaot stampa tok blong mi?

16, 17. ?Wanem gudfala advaes long fasin blong raetemdaon ol not?

¹⁶ Olsem wanem blong raetemdaon ol not. Taem yu rere mo yu stap stadi dip blong mekem wan tok, i impoten tumas blong rimemba olgeta tingting we yu faenem. Sam studen oli faenem se i gud blong yusum ol smosmol pepa no wan pepa blong raetemdaon sam stampa tingting we oli save yusum long tok blong olgeta.

¹⁷ Ol tok we yu raetemdaon oli mas smol nomo, hem i blong mekem yu yu tingtingbak long tingting we yu wantem givim. Fasin ya i pusum yu blong yusum prapa fasin blong toktok blong yu nomo, be yu no yusum ol tok blong narafala man. Makemdaon pej mo haf we yu yu faenemaot ol tingting ya we yu raetemdaon, olsem nao sipos yu nidim, yu save faenem olgeta bakegen. Makemdaon tu ol vas blong Baebol we yu yu wantem talemaot blong sapotem ol tok blong yu. Mo tu, i gud blong yusum ol smosmol pepa olsem from we yu save ademap ol nyuwan i go long hem no yu save tekemaot sam we yu no wantem yusum taem yu stap mekemrere tok blong yu. I no nid blong raetemdaon olgeta samting bakegen.

18. ?From wanem yumi wantem kam ol man we oli stap rere?

¹⁸ Ol man we oli rere. Sipos yu yu slak blong rere ol tok blong yu long Tiokratik Skul, yu mas tingbaot se fasin blong reregud i impoten blong mekem Jeova i glad long yu. Tingbaot wan eksampel, se Jon Baptaes i mas “mekemrere ol man, oli rere blong Hae God i kam long olgeta.” (Luk 1:17) Ol man Isrel ya we “oli rere” oli letem Jeova i jenisim fasin blong olgeta blong oli save mekem wok we hem i wantem blong olgeta oli mekem. Taswe i sem mak long yumi: Taem yumi gohed gud long Tiokratik Skul mo taem yumi stap mekemrere ol tok blong yumi, yumi letem Jeova i stap jenisim fasin blong yumi. Long rod ya yumi kam man we i gat gudhan long minista wok blong God tu.