Stadi 32
Soemaot Ol Impoten Poen Mo Fasin Blong Yusum Voes
1, 2. ?Fasin blong soemaot ol impoten poen long wan tok i mekem wanem long wan tok?
1 Soemaot ol impoten poen mo fasin blong yusum voes, tufala i joen blong mekem wan tok i gat mining mo i naes blong lesin long hem. Sipos no, ol tingting oli olbaot mo i hadwok blong intres long hem. Long tufala fasin ya, oltaem hem i isi moa blong soemaot ol impoten poen, taswe bambae yumi tokbaot hem fastaem.
2 Tingbaot samting we fasin blong soemaot ol impoten poen i save mekem long wan tok. Hem i blong makem ol toktok no ol tingting long wan rod we i givim stret mining mo blong soem long ol man we oli stap lesin, se olsem wanem nao ol toktok no ol tingting ya wanwan oli impoten moa long ol narafala toktok no tingting we yu talem. Samtaem i nidim nomo blong makem strong wan poen mo samtaem blong makem smol nomo, be i gat sam taem we i nidim fasin we i bitwin long tufala.
3-7. Talem olsem wanem wan man i save kamgud long fasin blong soemaot ol impoten poen.
3 Soemaot ol impoten toktok insaed long ol fultoktok. Blong soemaot ol impoten poen, samting ya i dipen long wanem toktok nao yu jusum blong soemaot. I min se yu mas luksave ol tok ya we oli karem impoten poen mo, long fasin we i stret, makemgud no yu soemaot ol tok ya, mekem se oli no olsem ol narafala wod we oli stap raonabaot. Sipos yu soemaot wan narafala tok we i no karem bigfala impoten tingting, mining bambae i no klia mo bambae i olbaot.
4 Plante man i olsem nomo, taem oli storeyan evridei bambae oli mekem mining blong toktok blong olgeta i klia. Be wan samting nomo sipos yu yu gat wan kaen fasin, olsem fasin blong makem ol smosmol tok olsem long, blong, bambae fasin ya blong toktok i hadwok long yu. Sipos i gat bigfala slak fasin long saed blong talem stret tok we oli soemaot ol impoten poen, oltaem hem from sam kaen fasin blong yu blong toktok olsem. Sipos hemia i trabol blong yu, wok strong long hem. Oltaem fasin olsem i no save finis long wan no tu tok we yu givim, taswe man we i givim advaes long yu i no save holem yu yu stap long poen ya nomo sipos tok ya we yu talem blong soemaot impoten poen i no stret lelebet, be i no spolem mining blong tok blong yu. Be blong kamgud moa long fasin ya blong mekem gudfala tok, gohed blong traehad blong wok long hem gogo yu naf blong talem stret ol tok we oli soemaot ol impoten poen.
5 Plante taem yu mas tingting moa long fasin blong soemaot ol impoten poen taem yu mekemrere wan riding we bambae yu mekem long pablik bitim we yu givim wan tok be yu no ridim long pepa. Fasin ya i tru taem yu ridim ol vas long wan tok sem mak olsem we yu ridim ol haf blong Wajtaoa stadi insaed long kongregesen. Risen from wanem yumi mas lukaotgud moa long fasin ya blong soemaot ol impoten poen taem yumi rid, hemia from we narafala man nao i raetem tok ya we bambae yumi ridim. Taswe yumi mas stadigud long hem, faenem ol tingting long hem mo talem bakegen ol tok gogo oli kam olsem we oli prapa toktok blong yumi nomo.
6 ?Olsem wanem blong makem no soemaot ol impoten poen? I gat ol defren rod blong mekem olsem, plante taem oli yusum olgeta wantaem olsem: wetem bigfala voes, ademap filing long wod, mekem voes i godaon, mekem voes i smol, pulum toktok i go slou, toktok kwik, spel smol bifo no afta wan wod (no yu save mekem tufala wantaem), yusum bodi no fes blong yu.
7 Fastaem i gud blong tingbaot sipos yu talem ol stret tok blong soemaot ol impoten poen mo yu makem strong blong mekem i klia. Taswe, taem yu mekemrere tok blong yu, makem laen aninit long ol impoten toktok ya, sipos yu tingting blong ridim tok blong yu. Sipos yu givim wan tok be yu no ridim, yu mas kasem ol tingting ya i klia fastaem long maen blong yu. Yusum ol impoten tok long not blong yu mo biaen yu talem ol tok ya blong soemaot ol impoten poen.
8, 9. ?From wanem i impoten blong soemaot ol impoten poen long wan tok?
8 Soemaot ol bigfala poen long wan tok. Hemia haf blong fasin ya blong soem ol impoten poen we plante taem ol man oli no stap mekem. Sipos i olsem tok ya i no gat ol bigfala poen long hem. Evri samting long tok ya oli sem mak nomo ol man oli no save luk klia ol poen we oli impoten. Taem tok i finis plante taem i hadwok blong tingbaot wan bigfala poen. Nating sipos yu mekemrere gud ol bigfala poen we yu wantem ol man oli kasem, be sipos yu no talem sam toktok blong soemaot ol impoten poen taem yu givim tok ya samting ya i save spolem tok blong yu mo bambae ol poen ya oli lus.
9 Blong winim trabol ya, yu mas stadigud tok blong yu fastaem. ?Insaed long tok ya, wanem poen nao i impoten moa? ?Wanem nekis poen we i impoten? ?Sipos oli askem yu blong talem impoten poen blong tok ya, long wan no tu fultoktok nomo, bambae yu talem wanem? Hemia ol gudfala rod blong faenem ol bigfala poen long wan tok. Afta we yu save ol poen ya, raetemdaon olgeta long ol not blong yu no yu makem long tok ya we bambae yu ridim. Nao yu save bildimap ol toktok blong yu i go kasem ol bigfala poen ya. Olgeta ya oli bigfala poen long tok blong yu mo, sipos tok ya i folem wan gudfala plan mo yu makemaot strong ol poen ya taem yu givim tok ya, bambae ol man oli tingbaot ol bigfala poen. Hemia nao samting we yu wantem taem yu givim tok.
10-12. Eksplenem se wanem ya mining blong fasin blong yusum voes.
10 Fasin blong soemaot ol impoten poen i blong mekem se ol man we oli stap lesin oli save kasem save long wanem yu talem, be ol defren fasin blong yusum voes blong soemaot ol impoten poen i save mekem ol man oli glad blong lesin long hem. ?Yu yu yusum gud voes blong yu long wok blong prij mo long ol tok we oli givim long yu blong mekem long kongregesen?
11 Fasin blong yusum voes hem i wan rod blong yusum ol defren kaen jun, spid mo paoa blong holem intres mo soem ol tingting mo filing we yu bildimap long tok blong yu. Blong kamgud moa, yu mas yusum voes blong yu long ol defren kaen rod ya sipos i laenap wetem tok blong yu. Long smol voes blong yu, yu save tokbaot samting we i pulum tingting, i laef mo i pulum intres. Long voes we i no smol no i no bigwan yu save talem ol samting we oli no intres tumas, mo long bigfala voes yu save tokbaot ol samting we oli impoten tumas mo oli blong ona.
12 Yu no wantem pulum ol man oli stap lukluk long yu from we yu bitim mak long fasin blong yusum voes. Tok blong yumi i mas naes olsem we i gat ol defren kala long hem, be voes i no mas ron sem jun olsem ol pris blong ol bigfala skul, no yu singaot strong olsem ol pasta blong ol narafala skul. Stret respek long mesej blong Kingdom bambae i blokem yumi blong yumi no soem ol fasin ya we i no folem Kristin fasin nating.
13, 14. ?Fasin blong yusum ol defren paoa long voes i olsem wanem?
13 Yusum ol defren paoa blong voes. Maet isi rod blong yusum voes i blong stap jenisim paoa blong voes blong yu. Hemia wan rod blong kasem bigfala poen blong tok mo soemaot ol impoten poen long tok blong yu. Be, oltaem fasin blong mekem voes i strong moa i no save mekem ol poen oli kam klia blong man i harem save. Samtaem maet hem i save mekem ol poen oli kamaot, be strong voes olsem i save spolem tok blong yu. Maet ol poen oli nidim se yu tokbaot olgeta wetem filing be i no long strong voes. Sipos i olsem, mekem voes blong yu i godaon mo soem filing. Samting ya i tru sipos yu tokbaot wari no fraet tu.
14 I tru se yu nidim blong jenisim paoa blong yusum voes blong yu, be yu mas lukaot gud se yu no mekem voes blong yu i godaon bitim mak nao ol man oli no save harem. Mo tu yu no mas mekem voes blong yu i go antap tumas nao ol man oli no save glad long hem.
15-17. ?Olsem wanem ol defren spid blong toktok i mekem wan tok i moa gud?
15 Ol defren spid long toktok. Sam nomo long ol nyufala man blong givim tok bambae oli jenisim spid blong olgeta taem oli stap antap long platfom. Oltaem yumi stap mekem long evridei toktok from we ol tok oli kamaot olgeta nomo taem yumi stap tingting long olgeta no taem yumi nidim olgeta. Be plante taem nyufala man we i givim tok long platfom i no save mekem olsem. Hem i mekemrere gud ol tok mo ol fultoktok blong hem, nao ol toktok blong hem oli kamaot long sem spid nomo. Be fasin blong givim tok folem wan plan bambae i givhan blong stretem slak fasin ya.
16 Spid blong tok blong yu i no mas hareap no i slou tumas. Ol smol poen, store, mo ol pija tok, mo ol narafala samting olsem bambae i mekem se yu save tok spid. Ol tok we i impoten moa, ol bigfala poen oli nidim blong yu toktok slou. Samtaem, blong mekem poen i kamaot klia, yu save pulum toktok, mo makem gud olgeta. Maet yu save stop wantaem, mo spel smol, hemia wan bigfala jenis long spid long tok blong yu.
17 Sam samting we yu mas lukaot gud long hem. Yu no mas toktok hareap nao yu no save talem gud ol tok. Wan nambawan rod blong lanem taem yu stap yu wan, i blong rid long bigfala voes mo ridim hareap olsem we yu save mekem be yu no stap mestem. Talem haf ya bakegen mo bakegen, sloslou traem ridim kwik moa be yu no stop no yu no talem ol toktok i no klia. Biaen traem rid sloslou olsem we yu save, talemgud ol vowel olsem a, e, i, o, u, long ol leta be yu no katem ol toktok. Nao yu save spid no slo long ol tok blong yu mo jenisim olsem gogo voes blong yu i save jenis olsem we yu wantem. Nao taem yu toktok, fasin ya blong jenisim spid long toktok blong yu bambae i kam hem wan, stret olsem tingting we yu talem.
18-20. Eksplenem olsem wanem man i save gat ol defren jun long voes.
18 Ol defren jun blong voes. Fasin blong jenisim jun hemia wan samting we i strong blong mekem long saed blong fasin blong yusum voes, nating se yumi mas jenisim smol nomo. Yes, plante taem yumi soemaot ol impoten poen taem yumi mekem voes i go antap, wetem smol paoa long hem. Nao yumi talem tok ya wantaem.
19 Be yu nidim blong jenisim jun blong voes blong yu moa sipos yu wantem kamgud moa long fasin ya blong toktok. Traem ridim Jenesis 18:3-8 mo 19:6-9 long bigfala voes. Makem ol defren spid mo jun blong voes we yu nidim blong yusum blong ridim ol vas ya. Oltaem fasin glad mo laef i nidim jun blong voes we i go antap bitim taem yu tokbaot sore no wari. Sipos i gat ol filing long tok blong yu, soem olgeta taem yu toktok.
20 Wan long ol stampa samting we i mekem man i slak long fasin ya blong toktok hemia nao we ol man oli no mekem plante defren jun blong voes blong olgeta. Sipos hemia i trabol blong yu, wok long hem. Traem folem sem advaes ya we yumi bin lanem long stadi ya. Be, naoia i no long saed blong spid, be long saed blong jenisim voes blong yu i go antap no i godaon.
21-24. ?From wanem fasin blong yusum voes i mas laenap wetem tingting mo filing?
21 Yusum voes stret folem tingting no filing. Long wanem we yumi bin lanem finis long stadi ya blong yumi, fasin blong yusum ol defren voes i no blong kasem mak blong ol defren voes nomo. No gat, ol toktok blong yu oli mas laenap wetem filing blong tok blong yu. ?Yumi mas tingbaot wanem fastaem blong mekem fasin blong yusum voes i kamaot? I klia se hem i dipen long tok we yu mekemrere blong givim. Sipos ful tok ya i blong pruvum nomo sam poen no ful tok ya i blong givim advaes nomo long ol man, bambae voes blong yu i no jenis tumas taem yu givim tok ya. Taswe yu mas lukluk gud plan blong tok blong yu afta we yu mekem i rere finis mo mekem sua se yu gat olgeta haf we i blong mekem tok i naes mo i gat mining tu.
22 Be samtaem long medel blong tok blong yu, yu harem se yu mas jenisim spid blong yu. Yu harem se tok blong yu i lusum intres. ?Bambae yu mekem wanem? Taem olsem i gud sipos hem i wan tok we yu no raetemdaon ol toktok blong hem. Yu save folem narafala rod taem yu gohed blong givim tok ya. ?Olsem wanem? Wan rod i blong stop long toktok mo ridim wan vas we i kamaot long Baebol. No yu save jenisim sam toktok i go olsem kwestin, mo spel smol blong makem kwestin ya. Maet yu yu save ademap wan pija tok, mekem i laenap wetem poen we i stap long plan blong tok blong yu.
23 Yes, ol teknik ya blong toktok, oli blong ol man we oli gat gudhan blong givim tok. Be yu save yusum tingting ya tu, taem yu mekemrere tok blong yu bifo we yu givim.
24 Ol man oli talem se fasin blong yusum voes i mekem tok i intres. Sipos yu folem stret fasin blong yusum voes mo yu no bitim mak, bambae hem i soem ol gudfala samting ya long tok blong yu mo ol man we oli lesin bambae oli glad long hem.