Japta 13
Taem Yumi Kam Olfala
1, 2. (a) ?Wanem trabol i save kamaot taem ol pikinini oli gruap, oli no moa stap wetem papa mama? (b) ?Sam olfala oli mekem wanem?
SIPOS bodi mo tingting blong yumi i no bisi oltaem, yumi save les long laef. I save kam olsem we laef i nating nomo. Yumi no save stap kwaet. Trabol ya i save kamaot long samfala papa mama taem ol pikinini blong olgeta oli gruap, mo oli no moa stap wetem tufala. Plante yia finis, tufala i bisi long wok blong tijim mo trenem ol pikinini. Nao taem ol pikinini oli bigman mo oli no moa stap long haos, wantaem nomo ol wok ya i finis.
2 Mo tu, taem plante yia i pas, bodi blong yumi i stap jenis. Skin blong yumi i kam slak, waet hea i kamkamaot, mo maet hea blong yumi i stat foldaon tu. Maet bodi i soa olbaot, we neva hem i soa bifo. Yes, yumi stat kam olfala nao. Samfala oli no wantem kam olfala, ale, oli mekem plante samting blong traem stap olsem ol yangfala. Maet oli stap go long ol lafet olbaot. No maet oli pleplei sam kaen spot oltaem. Tru, ol samting ya oli save mekem se olgeta oli bisi. ?Be oli rili harem gud long laef blong olgeta? ?Ol samting we oli stap mekem, oli rili givim mining long laef blong olgeta? ?Olgeta oli harem se samfala oli nidim olgeta?
3. ?Nating se yumi save harem gud long sam pleplei, be yumi no mas mekem wanem?
3 Tru tumas, pleplei i save mekem yumi glad. Mo taem yumi olfala, yumi gat moa taem blong mekem ol samting we yumi no save mekem taem ol pikinini oli smol. Be sipos yumi letem ol pleplei oli kam bigfala samting long laef blong yumi, yumi save kasem trabol.—2 Timote 3:4, 5; Luk 8:4-8, 14.
FASIN FASGUD TUGETA I NAES TUMAS
4, 5. ?Wanem trabol i save kamaot taem wan olfala i traem pruvum se hem i save pulum ae blong wan man no wan woman yet?
4 Samfala, taem oli kam olfala, oli wantem pruvum se oli save pulum ae blong wan man no wan woman yet. Ale long wan lafet no samting olsem, maet oli traem switim wan man no wan woman. Plante olfala man oli tekem wan woman we i yang moa long olgeta, ale oli slip wetem hem. Biaen oli livim hem, ale oli tekem wan narafala bakegen, olsem olsem. Plante woman tu, oli stap mekem fasin ya. Nating we samfala oli mared plante yia finis, be oli ting se bambae oli gat wan “nyufala laef” sipos oli tekem wan nyufala hasban no waef. Maet oli yusum ol mastik blong hasban no waef blong olgeta olsem wan eskyus. Long sem taem, oli traehad blong kavremap ol nogud fasin blong olgeta. Be olgeta oli sot long fasin fasgud. Oli no tru long hasban no waef blong olgeta, mo oli no fasgud long stret fasin.
5 Maet olgeta oli save finis tok blong Jisas we hem i talem se: “Sipos man i mekem divos long woman blong hem, be woman ya i no bin slip wetem narafala man, [porneia: hemia rabis fasin long saed blong seks] nao man ya i go mared long narafala woman, man ya i mekem sin. Hem i mekem i krangke long woman blong hem.” Jisas i talem se i no stret we man mo woman tufala i divos “from evri tok we man i talem.” Be tede, plante man mo woman, oli yusum enikaen eskyus we gavman i letem blong mekem divos. (Matyu 19:3-9) Afta, oli tekem wan narafala hasban no waef bakegen. Plante taem oli tekem wan we oli fren finis wetem hem bifo we tufala i divos. Olgeta oli save finis loa blong God long saed ya. Be oli stap talem se God i gat bigfala sore, mo hem i ‘save filing blong olgeta.’
6. ?Jeova i tingting olsem wanem long fasin blong brekem mared?
6 Blong yumi no foldaon long tingting ya, yumi mas tingbaot tok blong Jeova, we profet Malakae i talem long ol man Isrel bifo, i se: “ ‘Hemia nao . . . samting we yufala i stap mekem, we wora blong ae blong yufala i stap kavremap olta blong Jeova from, mo we yufala i stap krae mo sore from. From samting ya, Jeova i no moa save lukluk [glad long] sakrafaes blong yufala, mo hem i no moa harem glad long ol presen we yufala i givim long hem. Mo yufala i stap talem se, “?Be from wanem?” From we Jeova i stap lukluk yu mo waef blong yu we yu tekem taem yu yu yang nomo. Hem i luk we yu stap spolem woman blong yu. . . . Yufala i mas lukaot gud long tingting blong yufala blong yufala i no spolem waef we yufala i tekem taem yufala i yang. From we Jeova i no laekem nating fasin blong divos.’ Hemia nao tok blong Jeova, God blong Isrel.” (Malakae 2:13-16) Yes, Jeova i no laekem nating we yumi spolem hasban no waef blong yumi. Hem i no laekem nating we yumi no moa ona long promes we yumi mekem taem yumi mared. Fasin ya i save spolem fasin fren blong yumi wetem hem, we i stampa blong laef.
7. ?From wanem fasin blong brekem mared i no save mekem man i hapi?
7 ?Yu ting se man we i mekem olsem i save mekem laef blong hem i moa gud? No gat. Sipos wan man i spolem mared blong hem mo hem i tekem wan narafala waef bakegen, nyufala mared blong hem i no gat wan strong faondesen. ?From wanem? From we mared i wan nambawan samting, be man ya i no tinghae long mared mo hem i no tru long promes blong hem. Yes, ating nyufala waef no hasban i gat defren fasin long olfala waef no hasban. Samting ya nao i pulum man ya blong laekem hem. Be hem i stap lukaot samting we hem nomo i wantem. Hem i no tingbaot we hem i stikim hat blong narafala mo i mekem hem i harem nogud. Fasin ya i no save mekem nyufala mared blong hem i hapi.
8. ?Long mared, wanem samting i moa impoten, i winim naes fes mo bodi?
8 Fasin blong stap tru long hasban no waef blong yumi i moa naes, i winim naes bodi mo fes. Taem yumi kam olfala, bodi mo fes blong yumi i no moa naes tumas. Be sipos hasban mo waef tufala i stap tru long tufala, samting ya i save mekem tufala i kam moa naes evri yia. Sipos yumi traehad blong mekem hasban no waef blong yumi i hapi, mo yumi mekem ol samting we hem i wantem, fastaem long ol samting we yumi wantem, yumi save harem gud oltaem. Yes, “man we i stap givim presen i go, hem i save harem i gud moa, i winim man we i stap kasem presen blong hem.” (Ol Wok 20:35) Ating tufala i mared plante yia finis mo tufala i bin toktok gud tugeta oltaem. Mo nating we i hadwok, be tufala i bin wok gud tugeta blong kasem sam mak. Sipos tufala i bin mekem ol samting ya from lav nomo, nao taem tufala i olfala, tufala i rili save joengud. Tufala i save joen olsem wan nomo. Tufala i gat sem tingting, sem filing, mo sem bilif. Bifo we tufala i mared, tufala i gat wan kaen lav we i mekem se tufala i no luk klia plante slak fasin blong tufala. Be taem tufala i olfala, tufala i gat wan defren kaen lav. Trufala filing we i kamaot long hat i mekem se tufala i save luk ol slak fasin blong tufala. Be tufala i tingbaot ol fasin ya olsem jans blong givhan long tufala nomo. Tufala i rili trastem tufala. Tufala i harem sefgud, from we tufala i save se tufala i stap halpem tufala, nomata wanem trabol i save kamaot. Long tingting blong tufala, i gat wan rod nomo, hemia blong fasgud tugeta. Olsem Maeka 6:8 i talem, se: “Hem i talem finis long yu wanem i gud mo wanem i nogud. Samting we hem i askem long yu, se yu yu wokem stret fasin, yu yu laekem tumas fasin fasgud wetem lav, mo yu yu mekem tingting blong yu i stap daon, blong yu yu save wokbaot wetem God.”—NW, futnot.
PIKININI WE I BIGMAN—DEFREN KAEN FASIN FREN
9-11. (a) ?I stret long plan blong God we fasin fren blong papa mama wetem ol pikinini i stap sem mak ful laef blong olgeta? (b) ?Olsem wanem samting ya i save jenisim advaes we papa mama i givim long ol pikinini taem oli kam bigman? (c) ?Taem ol pikinini oli gruap mo oli mared, papa mama i mas luksave se hu nao i bos long olgeta?
9 Hasban mo waef tufala i mas stap tugeta ful laef blong tufala. Be God i no talem se ol pikinini oli mas stap wetem papa mama blong olwe. Tru ya, taem pikinini i smol, hem i nidim yu evri dei. Hem i nidim yu blong lukaot long hem long saed blong bodi. Mo tu, hem i nidim yu blong lidim hem. Taem hem i slou blong obei, yu yu strong long hem from we yu save se ol rul ya oli gud long hem. Be taem hem i bigman finis mo i aot long haos blong yu, fasin fren blong yu wetem hem i mas jenis lelebet. (Jenesis 2:24) Samting ya i no min se yu no moa gat filing long pikinini blong yu, no yu no moa laekem hem. Be i minim se yu no moa lukaot long hem. Hem nomo i mas lukaot long laef blong hem. Taswe fasin blong yu blong givhan long hem i mas jenis lelebet.
10 Samtaem maet hem i nidim advaes blong yu. Mo hem i waes sipos i lesin long gudfala advaes blong man we i gat moa ekspiryens long laef bitim hem. (Proveb 12:15; 23:22) Be taem yu givim advaes long boe no gel blong yu we hem i stap hem wan, yu mas luksave se hem nao i mas mekem ol disisin long laef blong hem.
11 Samting ya i impoten tumas sipos pikinini i mared finis. Long samples, oli folem kastom we woman i mas stap aninit long han blong mama blong man blong hem. Long plante ples, famle blong hasban no waef i gat bigfala paoa long ol disisin blong tufala. ?Ol fasin ya oli rili mekem tufala i hapi? Jeova i wokem famle fastaem, taswe hem i save rod ya we famle i mas folem blong harem gud. Hem i talem se: “Oltaem man i aot long papa mo mama blong hem, i go joen wetem woman blong hem, nao tufala i kam olsem wan bodi nomo.” (Jenesis 2:24) I no stap long famle blong tufala no papa mama blong tufala blong mekem ol disisin blong tufala. Hemia i wok blong hasban nomo. Tok blong God i talem se: “Man i hed blong woman blong hem, olsem we Kraes i hed blong jyos.” (Efesas 5:23) Sipos yu yu ona long loa ya blong God, yu save kasem moa glad from ol samting we yu mekem blong givhan long ol pikinini blong yu we oli bigwan finis, mo long ol bubu blong yu tu.
GLAD BLONG GIVHAN LONG NARAFALA
12. (a) ?Taem ol pikinini oli no moa stap wetem papa mama, olsem wanem tufala i save soemaot moa lav long tufala? (b) ?Wanem sam samting bakegen we tufala i save mekem, blong tufala i hapi moa?
12 Yumi evriwan i wantem yusumgud laef blong yumi. Yumi no wantem stap laef blong nating nomo. Laef i mas gat mining blong yumi harem gud long hem. Pikinini blong yu i nidim yu blong givhan long hem. Be plante narafala man tu oli nidim yu. ?Olsem wanem long hasban no waef blong yu? ?Hem i nidim yu? Taem ol pikinini blong yu oli smol nomo, yutufala i yusum bighaf blong taem blong yutufala blong lukaot long olgeta. Taem oli kam bigman mo oli no moa stap long haos blong yu, yu gat taem nao blong mekem plante samting blong givhan long hasban no waef blong yu. Samting ya i save mekem se yutufala i kam kolosap moa. Be i no min se yu soemaot kaengud fasin long hasban no waef blong yu nomo. Yu yu save ‘go moa.’ Yu save givhan long ol man raonabaot long yu. Maet wan i sik no maet wan olfala i harem nogud from we hem i stap hem wan. Maet wan i sot long sam samting long saed blong bodi, be i no fol blong hem. Yu yu save givhan long ol man olsem. (2 Korin 6:11, 12) Baebol i storebaot wan woman, nem blong hem Dokas, we ol narafala oli laekem hem tumas from we “oltaem hem i stap mekem ol gudfala wok, mo i stap givhan long” ol wido. (Ol Wok 9:36, 39) Baebol i toktok gud long olgeta we oli soemaot kaengud fasin long ol man we oli gat trabol long laef. (Proveb 14:21) Baebol i talem se ol samting we yumi mekem blong givhan long “ol pikinini we oli no gat papa blong olgeta, mo long ol wido woman,” oli bigfala haf long wosip we God i glad long hem. (Jemes 1:27) Mo tu, Baebol i pulum yumi blong mekem olsem: “Yufala i mas stap mekem ol gudfala fasin, mo yufala i mas stap givgivhan long yufala. From we ol fasin ya tu oli olsem we yufala i stap kilim anamol blong givim i go long God, we hem i glad tumas long olgeta.”—Hibrus 13:16.
13. ?Blong yumi harem gud taem yumi givhan long narafala, wanem fasin i mas pusum yumi?
13 ?Olsem wanem nao? Samting ya i min se stampa blong fasin hapi i blong bisi oltaem blong halpem narafala man nomo? No gat. Yu mas halpem narafala from we yu yu wantem folem fasin we God i stap soemaot, fasin lav. Sipos wan narafala tingting i pusum yu blong givhan long man, bambae yu yu harem nogud long wok ya. (1 Korin 13:3; Efesas 5:1, 2) ?From wanem? From we ating bambae samfala oli no tangkyu long yu from kaengud fasin blong yu. No ating samfala oli save yusum fasin ya blong yu blong traem winim plante samting blong olgeta nomo.
14, 15. ?Wanem i save mekem laef blong yumi i rili hapi?
14 Taem wan man i yusum laef blong hem fulwan long wok blong Jeova, hem i kasem bigfala glad moa, i bitim ol narafala glad we hem i save kasem. Hem i save se Jeova i glad long samting we hem i stap mekem. Mo tu, hem i no stap givhan long man long saed blong bodi nomo. Hem i karem “gud nyus blong God ya we . . . hem i stap harem gud oltaem,” Jeova. Mo hem i wan bigfala blesing blong talemaot gud nyus ya long ol man. (1 Timote 1:11) From Baebol, hem i save olsem wanem blong winim trabol we i kamaot long laef naoia. Mo hem i save gudfala promes we God i givim long saed blong fyuja. Hem i save harem gud tumas sipos hem i talemaot gud nyus ya long ol narafala man. Hem i save pulum ol man blong tingbaot stampa blong gud nyus ya, Jeova God. Olsem man we i raetemdaon Sam 147:1 i talem, se: “!Yumi presem Hae God [Jeova, NW]! I gud yumi singsing blong presem God ya blong yumi, from we fasin ya i gud tumas, mo i stret tu.”
15 Taem yumi luksave wil blong Jeova mo yumi yusum laef blong yumi blong ona long hem, hemia nao taem we laef blong yumi i gat bigfala mining. (Revelesen 4:11) Sipos yu yu naf, mo yu yusum laef blong yu fulwan blong talemaot trutok blong Baebol long ol man, bambae yu rili hapi. Nating we ol stret pikinini blong yu oli bigman finis, be yu yu save gat plante moa pikinini ‘long saed blong speret.’ Mo yu save givhan long olgeta blong gruap long saed blong speret. Long taem ya, bambae yu gat sem filing we aposol Pol i gat long olgeta we hem i givhan long olgeta. Hem i se: “?Be tingting blong mifala i stap strong olsem from wanem? From yufala ya nao. . . . Yufala ya nao i save flasem mifala, yufala i save mekem mifala i harem gud.”—1 Tesalonaeka 2:19, 20.
TAEM LAEF I JENIS, YU MAS RERE BLONG JENIS TU
16, 17. (a) ?Taem yumi kasem trabol, yumi no mas mekem wanem? (b) ?Sipos hasban no waef blong yu i lus, olsem wanem yu save harem we yu no stap yu wan nomo?
16 Taem ol yia oli stap pas, ol olfala oli no moa save mekem ol samting we oli bin mekem bifo. Nao oli mas rere blong jenisim sam samting. Sipos oli sik, oli mas traem faenem rod blong fiksimap sik ya. Be oli mas waes blong skelemgud samting ya. I nogud we oli stap tingbaot sik ya nomo. Sipos oli mekem olsemia, oli save mestem fulap jans evri dei blong harem gud long plante narafala samting. Tru, samtaem i mas gat trabol i kamaot. Mo i waes sipos yumi save mekem wan samting blong winim trabol ya. Be sipos yumi wari nomo long ol trabol ya, samting ya i no save givhan nating. I nogud we yumi stap tingting oltaem long laef blong yumi bifo. I moa gud we yumi tekem evri jans we yumi gat naoia blong mekem laef blong yumi i hapi.
17 Samting ya i tru tu sipos hasban no waef blong yu i lus, mo yu yu mas stap yu wan bakegen. Sipos mared blong yutufala i bin hapi, yu save tingtingbak long plante hapi yia we yutufala i bin spenem tugeta. Be laef i stap gohed nomo. Taswe, nao yu mas rere blong jenisim laef blong yu lelebet. I gat plante narakaen wok we yu save harem gud long hem. Sipos yu soemaot se yu bilif strong long God, bambae yu harem we yu no stap mekem ol wok ya long paoa blong yu nomo.—Ol Sam 37:25; Proveb 3:5, 6.
18-20. ?Wanem sam samting we oli save mekem laef blong yu i hapi taem yu kam olfala?
18 Tru ya, i gat sam nogud samting long laef, be i gat plante gudfala samting tu. Traem tingbaot ol gudfala fren, fulap jans we yumi gat blong givhan long narafala man, ol gudfala kakae we yumi save harem gud long hem, naes kala long skae taem san i stap godaon, mo singsing blong ol pijin. Mo tu, nating we samtaem yumi harem nogud long sam samting we oli kamaot long laef, be yumi save tingting strong long ol promes blong God. Bambae hem i finisim ol rabis fasin. Bambae hem i tekemaot soa, krae, sik mo ded.—Revelesen 21:4.
19 Man we i bin yusum laef blong hem blong hivimap olting blong wol nomo, laef blong hem i emti tumas taem hem i olfala. Man we i raetem Eklesiastis i tokbaot frut blong fasin ya, i se: “Olgeta samting ya i blong nating nomo.” (Eklesiastis 12:8) Yumi save tingbaot ol man we oli gat strong bilif, olsem Ebraham mo Aesak. Taem oli kasem en blong laef blong olgeta, “oli olfala tumas be oli harem gud long laef blong olgeta.” (Jenesis 25:8; 35:29, NW) ?From wanem laef blong olgeta i defren? From we ol man ya oli bilif long ol promes blong God. Oli bilif strong se long stret taem blong hem, God bambae i givim laef bakegen long ol dedman. Olgeta oli rere blong wet long taem we God bambae i putumap stret gavman blong hem blong rul long ol man.—Hibrus 11:10, 19.
20 Yu no mas tingbaot ol trabol nomo we yu stap kasem. Yu mas traem tingbaot ol gudfala samting raonabaot long yu, mo nambawan fyuja we God bambae i givim long ol man blong hem. Sipos yu mekem olsem, bambae yu yu hapi tumas. Nating we yu kam olfala, be evri dei bambae yu harem gud.