Stori 2
Wan Naesfala Garen
!TRAEM lukluk wol long pija ya! !Ol samting oli naes tumas! Lukluk ol gras mo tri, ol flaoa mo ol anamol. ?Yu yu luksave ol elefen mo ol laeon?
?Naesfala garen ya i kamaot olsem wanem? Bambae yumi luk olsem wanem God i rerem wol ya blong yumi laef long hem.
Fastaem, God i wokem gras we i grin gud, blong i gru olbaot long graon. Mo hem i wokem ol defdefren kaen tri mo flaoa. Olgeta samting ya oli gru gud mo oli mekem wol i kam naes. Be i no hemia nomo. Oli givim gudfala kakae long yumi tu.
Biaen, God i wokem ol fis blong oli swim long solwota, mo ol pijin blong oli flae antap long skae. Hem i wokem ol dog mo ol puskat mo ol hos; ol bigbigfala anamol mo ol smosmol anamol. ?Wanem kaen anamol oli stap long ples blong yu? ?Wanem tingting blong yu? ?Yu yu glad we Jeova i wokem olgeta samting ya blong yumi?
Biaen, God i mekem wan haf blong wol i kam wan ples we i spesel. Hem i kolem ples ya se garen blong Iden. Ples ya i stret olgeta. Olgeta samting long hem oli naes we i naes. Mo God i wantem se ful wol i kam stret gud olgeta, olsem naesfala garen ya we hem i wokem.
Be lukluk bakegen long pija blong garen ya. God i luk se i mas putum wan narafala samting long hem. ?Yu save wanem samting ya? Bambae yumi luk.