Stori 44

Rehab i Haedem Ol Spae

TUFALA man ya i fesem wan bigfala trabol. Tufala i mas ronwe, sipos no, ol man blong taon ya bambae oli kilim tufala i ded. Josua i sanem tufala man Isrel ya oli go blong lukluksave ples. Woman we i stap givhan long tufala, hemia Rehab. Haos blong Rehab i stap antap long stonwol we i goraon long taon ya Jeriko. Bambae yumi luk wanem trabol i kasem tufala man ya.

Ol man Isrel oli rere blong krosem Jodan reva blong go long kantri blong Kenan. Be bifo we oli mekem olsem, Josua i sanem tufala spae ya i go. Hem i talem long tufala se: ‘Yutufala i go lukluksave taon ya Jeriko mo ol ples raonabaot long hem.’

Taem tufala spae ya i kasem Jeriko, tufala i go long haos blong Rehab. Be wan man i talemaot long king blong Jeriko se: ‘Tu man Isrel i kam insaed long taon ya tunaet blong lukluksave ples ya.’ Taem king i harem nius ya, hem i sanem sam man oli go luk Rehab. Ol man ya oli talem long Rehab se: ‘!Ol man ya we oli stap long haos blong yu, yu tekem olgeta oli kam long mifala!’ Be hem i haedem tufala antap long haos blong hem. Ale hem i talem se: ‘Yes i tru i gat sam man oli kam long haos blong mi, be mi mi no save se oli man wea. Oli aot long ples ya taem san i stap godaon, bifo we ol man oli satem doa blong bigfala stonwol blong taon ya. !Ating sipos yufala i hareap, bambae yufala i save kasem olgeta ya!’ Ale ol man ya oli aot long taon blong go lukaot tufala.

Afta we ol man ya oli aot, Rehab i hareap blong go luk tufala we i haed antap long haos blong hem. Hem i talem long tufala spae ya se: ‘Mi mi save we Jeova bambae i givim kantri ya long yufala. Mifala i harem nius blong yufala finis, we taem yufala i aot long Ijip, Jeova i mekem Red Si ya i drae, nao yufala i kamkros long hem. Mo mifala i harem nius tu, blong tufala king ya Sihon mo Og, we yufala i kilim tufala i ded. Mi mi wantem blong yutufala i mekem wan strong promes naoia, se bambae yufala i save mekem i gud long mi, stret olsem we mi mi mekem i gud long yutufala. Mo yufala i mas sevem papa mo mama blong mi, wetem ol brata mo sista blong mi tu.’

Tufala spae i promes blong sevem olgeta, be Rehab i mas mekem wan samting. Tufala i talem long hem se: ‘Yu tekem red string ya, nao yu mas hangem string ya long windo blong haos ya blong yu. Mo yu mas tekem papa mo mama blong yu, wetem ol brata blong yu, mo olgeta famle blong olgeta, oli kam stap wanples long haos ya. Nao taem mifala i kam insaed long kantri ya, bambae mifala i luk string ya we i makem haos blong yu, mo bambae mifala i no kilim i ded wan man long haos ya.’ Nao tufala spae ya i gobak long Josua, mo tufala i talemaot long hem olgeta samting we i bin hapen.

Josua 2⁠:​1-24; Hibrus 11⁠:31.