Rehab Kam Stret Long Fes Blong God From Ol Wok Blong Soem Bilif

!Traem tingbaot! Wan woman blong rod i kam stret woman long fes blong God. Plante man oli save talem se, “!I no save hapen!” Be, hemia nao samting we i hapen long woman blong rod ya Rehab blong Jeriko, wan taon long Kenan bifo.

Jemes, man blong raetem buk long Baebol i talem se: “God i mekem man i stret man long fes blong hem from fasin blong laef blong hem, i no from fasin blong bilif blong hem nomo. Mo yu traem tingbaot woman blong rod ya Rehab. ?God i mekem hem i stret woman long fes blong hem from wanem? From we hem i lukaot gud long tufala man Isrel ya we tufala i kam blong luksave Jeriko. Hem i tekem tufala i go haed long haos blong hem, mo biaen i sanemaot tufala i gohom long narafala rod. Bodi we i no gat speret blong hem, hem i ded. Mo long sem fasin, fasin blong bilif we i no gat fasin blong laef i go wetem, hem tu i ded.” (Jemes 2:​24-26) ?From wanem Rehab i kam stret woman long fes blong God? ?Hem i mekem wanem blong kasem wan blesing olsem?

!Ol Man Isrel Oli Stap Kam!

Yumi gobak long yia ya 1473 B.K.T. Traem tingbaot wanem i bin kamaot. Jeriko i gat ol bigfala stonwol raon long hem blong protektem hem. Antap long ol stonwol blong taon ya, haos blong Rehab, woman blong rod ya, i stap. Long ples ya, ating hem i save lukluk i go long is long ol wora blong reva Jodan we oli stap ron bigwan. (Josua 3:15) Long is saed blong reva ya, maet hem i save luk ol haos tapolen blong ol man Isrel, wetem moa long 600,000 soldia blong hem. !Oli stap sam mael nomo afsaed long taon ya!

Rehab i save finis long ol faet we ol man Isrel oli bin winim. Mo tu hem i harem nyus long saed blong ol samting we Jeova i mekem blong soem paoa blong hem, antap moa, taem hem i mekem rod tru long Red Si blong ol man Isrel oli save ronwe. Taswe i klia se bigfala wora we i ron long Jodan Reva i no save blokem olgeta. !Hemia wan taem blong denja! ?Bambae Rehab i mekem wanem?

Rehab i Tekem Disisen Blong Hem

I no longtaem, Rehab i sek we tu man oli kamtru long haos blong hem​—tu spae we oli kam long haos tapolen blong ol man Isrel. Tufala i stap lukaot wan ples blong slip, mo Rehab i letem tufala i kam insaed long haos blong hem. Be king blong Jeriko i harem nyus se tufala i stap. Kwiktaem nomo hem i sanem ol man blong hem blong putum tufala long kalabus.​—Josua 2:​1, 2.

Taem ol man blong king oli kamtru, Rehab i tekem disisen blong hem finis blong stanap long saed blong Jeova God. Ol man blong king ya oli tok strong se: “Lego ol man ya we oli kam long haos blong yu, oli kam afsaed.” Rehab i bin haedem tufala spae ya long ol gras we hem i putum antap long ruf blong kam drae. Nao Rehab i talem se: “Yes, ol man ya oli bin kam luk mi, mo mi no bin save se oli kam long weples. Mo samting we i kamaot se taem oli satem get [blong taon ya] long sapa, ol man ya oli goaot. Mi no save se oli go wea. Traem ronem olgeta ya kwiktaem, from bambae yufala i save kasem olgeta ya.” (Josua 2:​3-5) Ol man blong king oli mekem olsem​—be i blong nating nomo.

Rehab i gyaman long ol man ya blong King blong lidim olgeta long wan rong rod. Nao kwiktaem hem i mekem sam moa samting blong soem bilif blong hem long Jeova from ol wok blong hem. Hem i go antap long ruf, nao hem i talem long tufala spae se: “Mi mi save se Jeova bambae i givim graon ya long yufala.” Rehab i talem se ol man long ples ya oli fraet from we oli bin harem se God “i mekem wora blong Red Si oli kam drae” long fored blong ol man Isrel, 40 yia bifo. Mo tu ol man ya oli save se ol man Isrel oli kilim i ded tufala king blong ol man Amoro. Rehab i talem se: “Taem mifala i harem nyus ya, hat blong mifala i kam slak, mo from nyus long saed blong yufala, i no gat wan long mifala we tingting blong hem i strong bakegen, from we Jeova, God blong yufala, hem i God long heven antap mo long wol ya daon.”​—Josua 2:​8-11.

Nao Rehab i askem strong se: “Nao, plis, yutufala i promes long mi long nem blong Jeova se, bambae yufala i soem kaengud fasin long famle blong papa blong mi, from we mi bin soem kaengud fasin long yutufala, mo yutufala i mas givim wan saen we mi save trastem. Mo yufala i mas sevem laef blong papa blong mi mo mama blong mi mo ol brata mo sista blong mi mo olgeta long haos blong olgeta.”​—Josua 2:​12, 13.

Tufala man ya oli agri blong mekem samting ya mo oli talem long Rehab wanem we hem i mas mekem. Hem i mas putum i hang afsaed long windo blong haos blong hem, rop ya we i red we hem i yusum blong slakem tufala spae ya i godaon long graon afsaed long stonwol blong Jeriko. Hem i mas mekem ol famle blong hem oli kam wanples long haos blong hem, mo oli mas stap long ples ya blong stap sef. Rehab i givim ol gudfala save long tufala spae ya we oli rere blong goaot, se ol ples raonabaot oli olsem wanem, mo olsem wanem blong haed long ol man we oli stap ronem tufala. Tufala spae ya oli mekem samting ya blong ronwe long ol man blong King. Afta we Rehab i putum rop we i red i hang, mo i hivimap ol memba blong famle blong hem, nao hem i wet blong ol narafala samting blong oli hapen.​—Josua 2:​14-24.

?Rehab i bin mekem wanem? !Yes, hem i bin pruvum se bilif blong hem i stap long God ya we i gat olgeta paoa, Jeova! Bambae hem i folem ol rul blong Hem nomo. Yes, bambae hem i save kam stret woman long fes blong God from ol wok olsem we oli soem bilif.

!Ol Stonwol Oli Foldaon!

Sam wik oli pas finis. Ol soldia blong ol man Isrel wetem sam pris​—sam long olgeta oli stap karem hon blong man sipsip mo samfala oli stap karem tabu bokis blong kontrak​—oli stap goraon long Jeriko. Oli bin mekem samting ya wan taem long wan dei blong sikis dei we i pas finis. Be long namba seven dei ya, oli maj raon long taon ya sikis taem finis. !Nao oli stap goraon wan moa taem!

Oli goraon namba seven taem finis, nao win i fulapgud long krae blong ol pupu. Nao ol man Isrel oli singaot bigwan. Long taem ya, Jeova i mekem ol stonwol we oli stap protektem Jeriko oli foldaon wetem noes olsem tanda. Haf ya nomo we haos blong Rehab i stap long hem, i stap stanap. Ol narafala haf blong taon ya i nogud finis mo ol man blong hem oli ded. From we hem i pruvum bilif blong hem long ol wok blong hem, woman blong rod ya we i tanem tingting blong hem finis, i stap sef wetem famle blong hem, mo hem i stat blong stap wetem ol man blong Jeova.​—Josua 6:​1-25.

Lukluk Long Ol Fasin Blong Rehab

Rehab i no wan les woman we i gat isi laef, from we long ruf blong haos blong hem, i gat ol gras i stap blong kam drae long san. Oli yusum gras ya blong mekem kaliko. Mo tu i gat plante lelebet tred we i red long haos blong Rehab. (Josua 2:​6, 18) Taswe maet hem i woman blong mekem kaliko mo maet hem i save wok ya blong mekem kala long ol kaliko tu. Yes, Rehab i wan woman blong wok strong. Antap long ol samting ya, hem i kam wan woman we i onagud mo fraet long Jeova.​—Skelem wetem Proveb 31:​13, 19, 21, 22, 30.

?Olsem wanem long narafala wok blong Rehab? Hem i no wan woman blong lukaot long hotel nomo. No gat, Baebol i yusum Hibru mo Grik tok long saed blong woman blong rod blong talemaot hem. Eksampel, Hibru tok ya zoh·nahʹ oltaem oli yusum blong tokbaot rabis fasin long saed blong seks. I gud blong save tu se, long saed blong ol man Kenan, bisnes ya blong mekem woman blong rod i no samting nogud no samting blong sem from.

Fasin blong Jeova blong yusum wan woman blong rod i soemaot bigfala fasin sore blong hem. Ol samting we man i luk long hem i save gyaman long yumi, be God “i luk wanem i stap long hat blong man.” (1 Samuel 16:7) Taswe, ol woman blong rod we oli gat gudfala hat mo oli tanem tingting blong olgeta from ol rabis fasin blong olgeta, oli save kasem fogif blong Jeova God. (Skelem wetem Matyu 21:​23, 31, 32.) Rehab hem wan i tanem tingting blong hem from sin blong folem stret rod mo mekem God i glad long hem.

Tufala man Isrel we tufala i spae, tufala i folem loa blong God, taswe tufala i no stap long haos blong Rehab blong mekem rabis fasin. Maet oli stap long haos ya from we i no save gat tumas toktok i kamaot sipos oli go long haos blong wan woman blong rod. Ples we haos ya i stap long hem antap long stonwol i mekem i isi tu blong tufala i ronwe. I klia se Jeova i lidim tufala long wan woman we i stap mekem sin, we ol ripot long saed blong wok blong God long ol man Isrel oli gat paoa long hat blong hem, nao samting ya i pulum woman ya blong tanem tingting blong hem mo jenisim fasin blong hem. Tok blong God se ol man Isrel oli mas spolem ol man Kenan from ol rabis fasin blong olgeta, mo blesing blong Hem long Rehab mo long faet blong ol man Isrel blong winim Jeriko, oli soemaot klia se tufala spae ya oli no mekem rabis fasin wetem woman ya.​—Levitikas 18:​24-30.

?Olsem wanem long gyaman toktok blong Rehab long ol man we oli wantem kasem ol spae ya? God i agri long fasin blong hem. (Skelem wetem Rom 14:4.) Hem i putum laef blong hem long denja blong protektem ol man blong God, samting ya i soem bilif blong hem. Fasin gyaman blong spolem narafala i rong long ae blong Jeova, be wan man i no nid blong talemaot ol save we oli tru long ol man we oli no gat raet blong save long hem. Jisas Kraes tu i no givim ful save no ol stret ansa sipos samting ya i save mekem trabol i kamaot blong spolem wan man. (Matyu 7:6; 15:​1-6; 21:​23-27; Jon 7:​3-10) I klia se yumi mas gat sem tingting long saed blong fasin ya blong Rehab blong lidim ol enemi oli go long rong rod.

Pei Blong Rehab

?Rehab i kasem wanem pei from we hem i soemaot bilif? Fasin ya blong stap sef long taem we Jeriko i lus i rili wan blesing long Jeova. Biaen, hem i mared long Salmon (Salma), pikinini blong Nason blong laen blong Juda, we hem i jif taem oli stap long draeples. Salmon mo Rehab tufala i mama papa blong Boas, we hem i obei long God, nao tufala i stap long laen we i go kasem King Deved blong Isrel. (1 Kronikel 2:​3-15; Rut 4:​20-22) Impoten moa, Rehab we i woman blong rod bifo, hem i wan long fo woman nomo we Matyu i talem se oli stap long laen we Jisas Kraes i kamaot long hem. (Matyu 1:​5, 6) !Hemia wan nambawan blesing long Jeova!

Nating se Rehab i no wan woman Isrel mo se fastaem hem i wan woman blong rod, be hem i soem wan impoten eksampel long ol wok blong hem se hem i bilif fulwan long Jeova. (Hibrus 11:​30, 31) Olsem plante narafala, mo samfala tu we oli lego fasin blong laef blong wan woman blong rod, Rehab bambae i kasem moa pei yet​—bambae hem i laef bakegen long ded long wan paradaes wol. (Luk 23:43) From ol wok we Rehab i mekem blong sapotem bilif blong hem, i mekem se Papa blong yumi long heven we i gat lav mo fasin fogif i agri long hem. (Ol Sam 130:​3, 4) Mo i tru se gudfala eksampel blong hem i leftemap tingting blong ol man we oli laekem stret fasin blong lukluk i go long Jeova God blong givim laef we i no save finis.

[Tok Blong Pija Long Pej 23]

Rehab i kam stret woman long fes blong God from ol wok blong hem we oli pruvum se hem i gat bilif

[Tok Blong Pija Long Pej 24]

Ol man blong digim graon blong faenem ol samting blong bifo, oli faenem ol ston blong Jeriko bifo mo tu wan smol haf blong stonwol we oli bifo olgeta.

[Credit Line]

Pictorial Archive (Near Eastern History) Est.