Stori 110

Timoti​—Niufala Man Blong Givhan Long Pol

YANGFALA we i stap wetem aposol Pol long pija ya, hem i Timoti. Timoti i stap wetem famle blong hem long taon ya Listra. Mama blong hem, nem blong hem Yunis, mo bubu woman blong hem, nem blong hem Lois.

Hemia namba tri taem we Pol i kam long Listra. Samwe long wan yia bifo, Pol mo Banabas i bin mekem wan trip i kam long ples ya, blong tufala i prij long ol man. Mo naoia, Pol i kambak bakegen wetem fren blong hem, Saelas.

?Yu save wanem samting Pol i stap talem long Timoti? Hem i stap askem long hem se: ‘?Yu yu glad blong folem mi mo Saelas? Mitufala i nidim yu blong yu givhan long mitufala blong prij long ol man long ol ples farawe.’

Timoti i talem se: ‘Yes, mi mi glad blong folem yutufala.’ Ale, Timoti i livim famle blong hem, i folem Pol mo Saelas. Be bifo we yumi tokbaot trip ya, bambae yumi luk wanem we Pol i stap mekem long ol 17 yia we oli pas, stat long taem we Jisas i kamtru long hem long rod we i go long Damaskes.

Tingbaot we Pol i stap go long Damaskes blong kilim ol disaepol blong Jisas. !Be naoia, hem tu i wan disaepol blong Jisas! Mo sam enemi blong Pol oli mekem plan blong kilim hem i ded, from we oli no laekem nating ol tok we hem i stap talemaot long saed blong Jisas. Be ol disaepol oli givhan long Pol blong ronwe. Oli putum hem insaed long wan bigfala basket, nao oli slakem hem i godaon afsaed long stonwol blong taon.

Afta, Pol i wokbaot i go long Antiok, blong i prij long ples ya. Long taon ya, ol man oli givim wan nem long ol man blong Jisas, se ol Kristin man, mo hemia fastaem we nem ya i kamaot. Biaen, Pol mo Banabas i aot long Antiok, tufala i go prij long ol ples farawe. Wan long ol taon we tufala i go long hem, hemia Listra, ples blong Timoti.

Samwe long wan yia i pas, nao Pol i gobak bakegen long Listra. Long taem ya nao, Timoti i folem Pol mo Saelas. ?Trifala i go wea? I gud yu lukluk long map we i stap, mo yu traem lanem nem blong sam long ol taon ya.

Fastaem, trifala i go long wan taon we i no longwe tumas, nem blong hem Ikoniam. Biaen, trifala i wokbaot i go long wan narafala taon we nem blong hem Antiok, sem mak long narafala Antiok. Afta, trifala i wokbaot i go long Troas, Filipae, Tesalonaeka mo Berea. ?Yu yu save faenem Atens long map ya? Pol i prij long ples ya tu. Biaen, trifala i wokbaot i go long Korin, mo trifala i prij wan yia haf long ples ya. Biaen bakegen, trifala i mekem wan sot trip i go long Efesas. Nao trifala i faenem wan sip long ples ya blong gobak long Sisaria. Afta, trifala i wokbaot i go long Antiok, nao Pol i stap kwaet long ples ya.

Yes, Timoti i wokbaot plante handred kilometa blong givhan long Pol blong talemaot “gud nius,” mo blong stanemap plante niufala Kristin kongregesen. ?Taem yu yu kam bigwan, bambae yu holemstrong long wok blong God olsem Timoti?

Ol Wok 9:​19-30; 11:​19-26; japta 13 kasem 17; 18:​1-22.

[Map]

Rom

Molta

Tesalonaeka

Berea

Korin

Filipae

Atens

Krit

Troas

Efesas

Maelitas

Kolosi

Antiok

Ikoniam

Listra

Antiok

Saepras

Damaskes

Sisaria

Jopa

Jerusalem

MEDITERENIAN SI