Saelas Wan Brata We i Leftemap Tingting Blong Ol Narafala

STAT long ol faswan yia blong Kristin skul, ol elda we oli goraon blong visitim ol kongregesena oli mekem wan impoten wok. Oli leftemap tingting blong ol man blong God long ol kongregesen, mo oli talemaot gud nius long ol ples blong wol we oli longwe tumas. Saelas i bin wan long ol faswan Kristin we i mekem wok ya. Hem i wan profet mo wan long ol brata we i lidim kongregesen blong Jerusalem. Hem i mekem wan nambawan wok long fasin blong wokem sam niufala teritori, mo hem i bin wan long ol faswan misinari we oli prij long Yurop. ?From wanem Saelas i nafgud olsemia blong mekem olgeta samting ya? I gud we yumi traem folem ol fasin blong Saelas. ?Wanem ol fasin ya?

Kwestin Long Sakomsaes

Long yia 49 K.T.,b samfala oli wantem seraot long kongregesen from kwestin long sakomsaes. Ale Hed Kampani long Jerusalem i sanem sam mesej i kam long olgeta kongregesen blong finisim trabol ya. Hemia long stori ya we nem blong Saelas, we oli kolem tu Silvanas, i kamaot fastaem long Baebol. Ating hem i bin wan long ol Kristin we oli tekem disisen ya, mo Hed Kampani i jusum hem olsem man we i karem tok blong ‘ol aposol mo ol olfala man,’ i go talemaot disisen ya long ol ‘brata long Antiok mo long Siria mo long Silisia.’ Long Antiok, Saelas mo Judas (Basabas), oli joen long Banabas mo Pol, ale oli givim mesej blong olgeta, mo i sua se oli eksplenem long prapa tok blong olgeta wanem i hapen long miting blong Jerusalem, wanem stamba tingting i kamaot, mo oli eksplenemgud ol tok blong leta we oli karem. Mo tu Judas mo Saelas oli “stap toktok longtaem long ol brata ya, tufala i stap leftemap tingting blong olgeta, mo tufala i stap mekem olgeta oli strong.” Gudfala samting we i kamaot from wok blong tufala, se ol Kristin long Antiok oli “harem gud.”​—⁠Ol Wok 15⁠:​1-32.

Taswe Saelas i mekem wan gudfala wok taem hem i givhan blong stretem impoten kwestin ya. Be wok ya we hem i mekem i no isi. Bifo we hem i kam long Antiok, hem i no gat rod blong save sipos ol Kristin blong ples ya bambae oli glad no sipos oli kros from disisen blong Hed Kampani. Wan man we i mekem plante toktok long saed blong Baebol i talem se “oli nidim wan man we i waesgud, we i save jusum ol gudfala tok, blong eksplenem mesej we ol aposol oli raetem long leta blong olgeta.” Oli jusum Saelas blong mekem wok ya. Samting ya i soem long yumi se Saelas i wan waes man olsemia. Hed Kampani i trastem se hem bambae i gat strong tingting blong karem mesej ya. I sua tu se Saelas i wan waes elda we i save pulum kongregesen blong joengud sipos sam oli no agri mo oli wantem seraot from mesej blong Hed Kampani.

Hem i Wokbaot Wetem Pol

Yumi no sua sipos Saelas i gobak long Jerusalem afta wok ya long Antiok, no sipos hem i stap nomo long taon ya. Biaen, Pol i rao wetem Banabas long saed blong Jon Mak, ale Pol i jusum Saelas, we i stap long Antiok long taem ya, mo oli mekem wan niufala trip blong visitim bakegen ol taon we Pol prij long olgeta long faswan misinari trip blong hem.​—⁠Ol Wok 15⁠:​36-41.

Ating Pol i jusum Saelas from we brata ya i no fraet blong go wok long ol kongregesen blong ol Kristin we oli no Jyu. Mo tu, ol brata oli gat respek long hem from we hem i wan profet, mo hem i man blong karem tok blong Hed Kampani, mo samting ya i save givhan long wok blong talemaot disisen blong ol aposol long ol Kristin blong Siria mo Silisia. Oli kasem sam nambawan frut. Buk blong Ol Wok i talem se: ‘Nao taem Pol mo Saelas oli gotru long ol taon, oli stap talemaot long ol man blong Jisas, ol rul ya we ol aposol mo ol elda long Jerusalem oli putum. Mo oli stap tijim olgeta, se oli mas holem ol rul ya. Nao long fasin ya, olgeta man long jos long evri ples oli stap kam strong moa long bilif blong olgeta. Mo evri dei, namba blong olgeta i stap kam antap moa.’​—Ol Wok 16:​4, 5.

Taem ol misinari oli wokbaot, tabu spirit i talem tu taem long olgeta blong jenisim rod blong olgeta. (Ol Wok 16⁠:​6, 7) Long Listra, Timoti i joen long Pol mo Saelas, mo i gohed wetem olgeta, afta we sam profet oli givim sam tok long saed blong hem. (1 Timoti 1⁠:18; 4⁠:14) Pol tu i wan profet, mo Tabu Spirit i givim wan vison long hem, blong sanem hem wetem ol fren blong hem, oli tekem sip oli go long Masedonia, long Yurop.​—Ol Wok 16:​9, 10.

Oli Kilim Hem Mo Oli Sakem Hem Long Kalabus

Long Filipae, “bigfala taon blong distrik,” Saelas i fesem wan trabol we bambae hem i no save fogetem. Wan slef gel i faenem olgeta long rod. Gel ya i gat wan devel we i stap long hem, we i stap soemaot long hem ol samting we bambae i save kamtru. Ale Pol i tok strong long devel ya, mo devel i kamaot long gel ya. Taem ol masta blong hem oli luksave we oli lusum rod blong olgeta blong winim mane long gel ya, oli holem Pol mo Saelas, oli tekem tufala i go stanap long ples blong mekem kot, long fes blong ol man Rom we oli jajem man. Risal blong samting ya se, ol man oli soem Pol mo Saelas long fored blong olgeta man, oli talem se tufala i rabis man. Oli terem mo tekemaot ol klos blong olgeta, mo oli kilim tufala wetem wan stik long ples blong maket.​—Ol Wok 16:12, 16-​22.

Rabis panis ya we Pol mo Saelas oli kasem i strong bitim mak. Be antap long samting ya, ol man blong taon ya oli no gat raet blong panisim Pol mo Saelas olsemia. ?From wanem? Loa blong Rom i talemaot se ol sitisen blong Rom oli no save kasem panis ya. Pol i wan sitisen blong Rom, mo i sua se Saelas tu i sitisen blong Rom. Ol man oli kilim strong Pol mo Saelas, oli sakem tufala long kalabus mo oli fasem ol leg blong tufala long ‘stok.’ Gustav Stählin i talem se wan ‘stok,’ hemia wan “tul we i nogud tumas, we oli yusum blong pulum mo seraot ol leg blong ol presina, blong mekem se ol presina oli no save slip.” Be yet, long medel blong naet, nating se i sua se Pol mo Saelas oli safa tumas, “tufala i stap prea, mo tufala i stap singsing long ol sing blong presem God.”​—Ol Wok 16:​23-​25.

Samting ya i soem wan narafala samting long saed blong Saelas. Oli stap safa from we oli stap tru long Kraes, mo hem i glad from samting ya. (Matiu 5⁠:​11, 12; 24⁠:⁠9) Saelas i gat wan tingting we i sem mak long tingting ya we hem i soem long Antiok. Wetem strong tingting ya, hem mo ol fren blong hem oli naf blong wok gud, blong mekem se kongregesen i kam strong moa, mo blong mekem se ol Kristin oli save haremgud. I sua se Pol mo Saelas oli harem moa gud taem Jeova i mekem wan merikel, i mekem se graon i seksek, ale oli kam fri long kalabus, mo oli tekem jans blong halpem man we i lukaot long kalabus, blong hem i bilif long God.​—Ol Wok 16:​26-​34.

Pol mo Saelas oli no fraet blong kasem kil no blong go kalabus. Taem ol jaj oli givim oda blong letem tufala i go fri, oli ting se bambae tufala i tekem jans ya blong ronwe kwiktaem nomo, be tufala i no wantem ronwe long Filipae olsem sam rabis man. Tufala i stanap strong, oli mekem se ol jaj we oli flas mo giaman, ol jaj ya nao oli sem from ol fasin blong olgeta. Pol i talem se: “Mitufala i sitisen blong Rom. Tufala jaj ya i no faenem wan samting we mitufala i mekem we i rong. Be long fes blong ol man, olgeta oli wipim mitufala finis. Mo oli sakem mitufala long kalabus. Mo naoia tufala i wantem tekemaot mitufala long fasin blong haed. !Nogat! Tufala ya i mas kam long ples ya, mo tufala nomo i mas tekemaot mitufala.” Ol jaj oli fraet nao se bambae ol man Rom oli kasem save se tufala i wipim sam sitisen blong Rom. Ale, ol jaj oli kam askem long tufala blong lego taon ya.​—Ol Wok 16:​35-​39.

Pol mo Saelas oli talem klia long ol jaj se oli sitisen blong Rom mo oli gat ol raet blong ol man Rom. Ale oli talem tata long ol fren blong olgeta mo oli livim Filipae. Tufala i folem fasin we tufala i gat long olgeta taon we oli prij long hem. Oli “leftemap tingting” long ol Kristin brata, mo oli lego taon ya.​—⁠Ol Wok 16⁠:40.

Hem i Livim Masedonia, i Go Long Babilon

Pol, Saelas mo ol fren blong olgeta oli no letem tingting blong olgeta i foldaon from ol problem ya we oli kamaot. Oli gat strong tingting blong wok olsem misinari long sam niufala teritori. Long Tesalonaeka, oli fesem sam trabol bakegen. Oli stap tri wik long ples ya, mo Pol i kasem sam nambawan risal long wok blong prij. Ale, sam man we oli jelas oli agensem Pol, oli mekem wan bigfala rao. Taswe ol misinari oli luk se i waes we oli lego taon ya, ale long naet oli muf i go long Berea. Taem ol man we oli agensem Pol long Tesalonaeka oli kasem save se Pol i gat sam gudfala frut long wok blong hem long Berea, ol rabis man ya oli kam long taon ya. Ale Pol i gohed hem wan long rod blong hem, be Saelas mo Timoti oli stap long Berea blong lukaot long grup blong ol man we oli intres long gud nius. (Ol Wok 17⁠:​1-15) Biaen, Saelas mo Timoti oli joenem Pol long Korin, oli karem long hem sam gudfala nius mo ating wan presen from ol fren blong hem we oli stanap strong long Masedonia. Samting ya i givhan long Pol, mo from presen ya, hem i save stop long wok we hem i stap mekem long taon ya blong winim smol mane, mo hem i gat strong paoa blong gohed long wok blong prij fultaem. (Ol Wok 18⁠:​1-5; 2 Korin 11⁠:⁠9) Baebol i tokbaot Saelas mo Timoti long Korin olsem sam man blong talemaot gud nius mo olsem ol man blong wok wetem Pol. Samting ya i soem se oli gohed blong wok strong long taon ya.​—⁠2 Korin 1⁠:19.

Pol i yusum plante taem tok ya “mifala” long tufala leta we hem i raetem i go long ol man Tesalonaeka, taem hem i stap long Korin. Samting ya i soem se Saelas mo Timoti oli halpem Pol blong raetem ol leta ya. Be yumi save se Saelas i mekem wok blong raetem ol leta from we Pita hem wan i talem samting ya taem hem i tokbaot wan leta blong hem. Hem i talem se hem i stap long Babilon, mo i raetem leta ya ‘tru long Silvanas, wan brata blong yumi we mi save bilif long hem.’ (1 Pita 5⁠:​12, 13) I tru se tok ya i save minim se hem i raetem leta mo hem i jes givim leta ya long Saelas blong hem i karem i go long ol kongregesen. Be ol fasin blong raetem oli defren tumas long tufala leta blong Pita. From samting ya yumi save tingting se Pita i yusum Saelas olsem wan man blong raetem faswan leta blong hem, be hem i no yusum hem blong raetem namba tu leta blong hem. Taswe, wan long ol gudfala fasin mo bigfala jans blong Saelas, hemia fasin blong raetem leta long nem blong ol aposol.

Wan Eksampel We Yumi Save Folem

Taem yumi tingbaot stori blong Saelas, mo yumi tingting dip long olgeta samting we hem i mekem, samting ya i gat paoa long yumi. Hem i wan nambawan eksampel we ol misinari blong tede mo ol seket elda oli save folem. Hem i no tingbaot hem wan nomo, hem i spenem plante mane blong go long ol ples we oli longwe tumas, mo hem i no gat tingting blong winim mane, no blong kasem ona from wok blong hem, be hem i jes wantem halpem ol narafala. Hem i traehad blong tingting dip, blong givim sam waes advaes we oli leftemap tingting blong ol narafala, mo sam tok we hem i rerem gud, mo hem i gat strong tingting blong talemaot gud nius. Nating sipos yu gat wan impoten wok, no wan smol wok nomo insaed long ogenaesesen blong ol man blong Jeova, sipos yu mekem olsem Saelas, yu traehad blong gat wan gudfala tingting​—⁠nating sipos yu kasem sam traem​—⁠ale yu tu bambae yu leftemap tingting blong ol Kristin brata mo sista blong yu.

[Ol futnot]

[Map Blong Pija Long Pej 29]

(Lukluk niuspepa)

Namba Tu Misinari Trip Blong Pol

Bigfala Solwota

Antiok

Debe

Listra

Ikoniam

Troas

Filipae

Amfipolis

Tesalonaeka

Berea

Atens

Korin

Efesas

Jerusalem

Sisaria

[Credit Line]

Mountain High Maps® Copyright © 1997 Digital Wisdom, Inc.