Gad Blong Kalabus i Kasem Save Long Trutok

Long Filipae, i gat wan slef gel we rabis spirit i stap long hem. Rabis spirit ya i stap soemaot long hem ol samting we bambae oli kamtru long fiuja. Long rod ya, hem i stap winim plante mane blong ol masta blong hem. Taem Pol mo Saelas i kam long Filipae, gel ya i biaen long tufala blong plante dei. Rabis spirit ya i stap mekem hem i singaot strong se: “Ol man ya oli slef blong Hae God.” Nao Pol i taed long hem, ale hem i talem long rabis spirit ya se: ‘!Long nem blong Jisas Kraes, yu kamaot long gel ya!’ Nao rabis spirit ya i kamaot.

Taem ol masta oli luksave se gel ya i no moa winim mane blong olgeta, oli kros tumas. Nao oli holemtaet Pol mo Saelas, oli pulum tufala i go long ol lida blong taon ya, mo oli talem se: ‘!Tufala i stap brekem loa mo mekem tumas trabol long taon ya!’ Ol lida ya oli talem long sam man blong oli wipim tufala mo oli sakem tufala i go long kalabus. Gad blong kalabus i putum tufala long wan rum we i insaed olgeta, mo i fasem han mo leg blong tufala.

Ol prisena oli lesin taem Pol mo Saelas i singsing blong presem Jehova. Long medel naet, graon i seksek bigwan, nao ol doa blong kalabus oli open, mo ol jen we oli yusum blong fasem ol presina oli brok. Gad blong kalabus i ron i kam long rum we i insaed olgeta, mo i luk we ol doa oli open. Hem i ting se ol presina oli ronwe finis, ale hem i tekemaot naef blong faet blong kilim hem wan i ded.

Be Pol i singaot se: ‘!Yu no kilim yu wan! !Mifala evriwan i stap ya!’ Gad ya i resis i kam insaed, i foldaon long fored blong Pol mo Saelas, mo i askem se: “?Mi mas mekem wanem blong God i sevem mi?” Tufala i talem se: ‘Yu mo olgeta we oli stap long haos blong yu, yufala i mas bilif long Jisas.’ Nao Pol mo Saelas i tijim olgeta long ol tok blong Jehova, mo man ya wetem olgeta long haos blong hem oli baptaes.