Japta 20
Laef Mo Blad—?Yu Yu Ting Se Tufala i Tabu?
1. (a) ?God i tingbaot laef olsem wanem? (b) ?Yumi mas mekem wanem blong soemaot we yumi gat tangkyu long God from laef ya we hem i givim long yumi?
TINGTING blong God long laef i narafala long tingting blong ol man long wol. Yumi no sapraes long samting ya. Long lukluk blong God, laef blong man i tabu. ?Wanem tingting blong yu? ?Yu yu ting olsem God? “From we Hem nomo i stap mekem yumi evriwan i laef, mo Hem i stap givim olgeta samting long yumi evriwan.” (Wok 17:25-28; Sam 36:9) Sipos yumi gat wankaen tingting wetem God, bambae yumi lukaotgud long laef blong yumi, mo bambae yumi no brekem loa blong God blong traem sevem laef blong yumi naoia. Yumi trastem promes blong God, se bambae hem i givim laef blong olwe long ol man we oli rili bilif long Pikinini blong hem.—Mat. 16:25, 26; Jon 5:40; Jud 21.
2. ?Ol man blong wol ya oli biaenem fasin blong hu long saed blong laef? ?Samtaem fasin ya i mekem olgeta oli tingting olsem wanem?
2 Be Jisas i talem se Setan, jif blong wol ya, “bifo olgeta, hem i man blong kilim man.” (Jon 8:44; 12:31) Taem Setan i stat mekem fasin stronghed, hem i karem ded i kam long ol man. Ol man blong wol tede oli folem fasin blong hem mo oli mekem faet we man i ded from. Be Setan i save gyaman tu blong soemaot hem long wan fasin we i narakaen. Olsem nao, sam haeman we oli biaenem tingting blong hem, oli save ting olsem: Yumi save wosip long God, be taem laef blong yumi i save lus, yumi mas folem tok blong olgeta from oli gat “save,” mo yumi no mas harem ol tok blong Baebol. (Lukluk 2 Korin 11:14, 15.) Sipos wan trabol i kasem yu, mo yu yu ting se bambae yu save ded from, ?oraet nao hat blong yu i pulum yu blong mekem wanem? Tru ya, yumi wantem tumas mekem Jeova i glad long yumi fastaem.
3. (a) ?From wanem yumi mas tingtinggud long ol tok blong Baebol long blad? (b) Ridim Jenesis 9:3-6 mo Ol Wok Blong Ol Aposol 15:28, 29 blong ansa long ol kwestin we oli stap ya.
3 Baebol i tokbaot laef mo blad, mo i joenem tufala wantaem, i se: “Sol [no laef] blong bodi i stap long blad.” Laef i tabu mo God i talem tu se blad i tabu. Hemia wan samting we i blong God, we yumi save yusum long fasin ya nomo we God i oraet long hem. (Lev. 17:3, 4, 11; Dut. 12:23) Nao yumi save tingtinggud long ol tok we God i talem long saed blong blad.
Ridim Jenesis 9:3-6
?Yu yu mas lukaot long wanem fasin blong ples blong yu, blong no kakae blad blong anamol?
?Taem yumi tingbaot ol tok blong vas 4 long saed blong blad blong anamol, olsem wanem long yumi long saed blong fasin blong dring blad blong man (we sam man bifo oli mekem olsem long taem blong Rom, taem ol man oli faet long ol stad)?
?Man we i kilim wan narafala man i ded, hem i stanap long fes blong hu ya, olsem vas 5 mo 6 i talem?
Ridim Ol Wok Blong Ol Aposol 15:28, 29
?Tok ya i soemaot we loa blong blad i stap blong smoltaem nomo mo i finis, no olsem wanem? ?Yumi stap aninit long loa ya?
?Taem yu yu ridim ol tok ya, yu yu ting se hem i tok long blad blong anamol nomo, be hem i no tokbaot blad blong man?
?Ol vas ya oli soemaot se sipos i gat wan aksiden i kamaot, yumi save brekem loa ya no olsem wanem?
4. ?Olsem haf ya i soemaot, Baebol i talem se wan man i mas mekem wanem blong no gat fol from blad?
4 Tru ya, yumi no save kilim man i ded, be i no gat samting ya nomo we yumi no mas mekem blong no gat fol from blad. Baebol i talem se sipos yumi stap insaed long wan ogenaesesen we i gat fol from blad long fes blong God, yumi mas aot long hem. Sipos no, be yumi tu i save gat fol ya long yumi, from we yumi joen long ol sin blong hem. (Rev. 18:4, 24; Maeka 4:3) Yumi mas hareap blong goaot long ol ogenaesesen ya.
5. ?Sipos yumi wok strong long wok blong prij, olsem wanem samting ya i save halpem yumi blong no gat fol from blad?
5 God i bin givim wok long ol man blong hem blong oli wekemap tingting blong ol man long bigfala trabol ya we bambae i kam long wol. Oli save stap olsem we oli no gat fol from blad, sipos oli holemstrong long wok blong talemaot mesej ya. (Lukluk Esikel 3:17-21.) God i givim wok long Pol blong talemaot gud nyus, mo Pol i harem we hem i gat kaon long ol defren kaen man mo i mas tok long olgeta. Taem hem i talemaot olgeta samting we God i mekem blong sevem olgeta, hem i harem olsem we hem i no gat fol from blad blong ol sipos oli lus. (Rom 1:14, 15; Wok 18:5, 6; 20:26, 27) ?Yu tu yu wok strong long wok blong prij, from we yu yu rili kasem save long bigfala wok ya we olgeta Wetnes blong Jeova oli mas mekem?
6. ?Olsem wanem fasin blong lukaotgud blong i no gat aksiden, i joen long fasin blong tingbaot we laef i tabu?
6 Yumi mas tingtinggud tu long olkaen aksiden we i save spolem wan narafala man i ded. Long loa blong Moses, sipos man i mestem nao i kilim wan narafala man i ded, ale hem i gat fol from blad. Hem i mas kasem panis from. (Eks. 21:29, 30; Dut 22:28; Nam. 35:22-25) Sipos yumi kasem gud save long loa ya, bambae yumi mas lukaotgud taem yumi draevem trak blong yumi, blong no mekem aksiden we i save kilim man i ded. Bambae yumi no mekem olbaot, no yumi no traem bitim mak, mo yumi no letem sam samting long haos blong yumi no long ples blong wok blong yumi we i save spolem wan narafala man. ?Olsem wanem nao? ?Tingting blong yu long ol samting ya i soemaot we yu yu agri olgeta we laef blong man i tabu?
?Olsem Wanem Long Fasin We Ol Dokta Oli Yusum Blad?
7. (a) ?Sipos oli putum blad blong man i go long bodi blong wan narafala man, hemia i stret long fasin blong blad we i tabu? (b) ?From wanem i krangke nomo blong talem se loa ya “no yusum blad” i joen wetem sam fasin blong faswan handred yia nomo?
7 Long taem bifo ol dokta oli bin yusum blad tu, fasin ya i no nyufala. Be long taem blong yumi naoia, oli go moa long fasin ya, mo oli talem se blad i save givhan long man blong i stap laef. Maet oli save givim blad no sam haf blong blad long ol sikman. Be taem oli givim blad long sikman, i no olsem we sikman ya i no save ded. Nogat. Samtaem ol dokta oli givim blad long wan man mo man ya i ded. Be bigfala samting long bisnes ya i olsem: Loa blong Baebol i talem long yumi se yumi mas “no yusum blad.” ?Oraet nao olsem wanem long loa ya? ?Hem i blokem tu fasin ya we ol dokta oli givim blad long ol sikman? !Yes, hemia i tabu! Sipos yumi putum blad blong man no anamol i go insaed long bodi blong yumi, yumi brekem loa blong God. Yumi no stap ting se blad i tabu. (Wok 15:19, 20) Yumi no save talem se loa ya—“no yusum blad”—i blokem ol fasin we oli mekem long taem blong ol aposol nomo, mo i no blokem ol wok we ol dokta oli stap mekem long blad naoia. Nogat. Tingbaot: ?Hu ya i save talem se loa blong God long saed blong kilim man i ded, i no stret long fasin we wan man i holem masket blong sutum wan narafala man i ded, from we long taem bifo i no gat masket yet? Tingting ya i no stret. Nao yumi save talem tu se loa blong Baebol i blokem fasin blong dring tumas, ?be loa ya i blokem ol dring blong bifo nomo, no i blokem ol strongfala dring blong naoia tu? Ol man we oli rili wantem mekem God i glad long olgeta, oli savegud mining blong tok ya we i talem se “no yusum blad.” Hemia i klia nomo.
8. (a) ?Olsem wanem yu yu save luksave sipos wan samting we dokta i wantem mekem long yu i stret nomo long wan Kristin no nogat? (b) ?Sipos dokta i wantem tekem sam blad blong yu mo i putum i stap samples blong yusum hem bakegen taem i katem yu, wanem stampa rul blong Baebol i save halpem yu blong skelem samting ya? (c) ?Olsem wanem wan man i save tingbaot fasin ya we blad blong hem i ron long wan mesin i gobak long bodi blong hem?
8 Be ol dokta oli save mekem samkaen samting we ating yumi no gat save sipos oli stret no nogat. ?Oraet nao yumi save mekem wanem? I gud sipos yu yu askem dokta blong yu i talem fastaem long yu ol samting we hem i wantem mekem. Nao biaen yu yu save prea long Jeova mo yu yu save skelem fasin ya sipos i stret wetem ol loa blong Baebol no nogat. Maet dokta ya i save talem long yu se fastaem hem i save tekem sam blad blong yu mo i putum samples, ale bambae hem i save yusum taem hem i katem yu. ?Bambae yu yu oraet long fasin ya? Yu yu no mas foget we Loa blong Moses i talem se taem oli kilim wan anamol i ded oli mas kafsaedem blad blong hem long graon. (Dut. 12:24) I tru we yumi no stap aninit long Loa blong Moses. Be fasin tabu blong blad i stampa blong loa ya. Taem yumi tekemaot blad long wan samting we i laef, yumi mas kafsaedem long graon, olsem we yumi stap givimbak long God, from we graon i olsem smol jea we God i putum leg long hem. (Lukluk Matyu 5:34, 35.) Olsem ya nao, i no stret blong putum sam blad blong yumi i stap samples fastaem (nomata sipos i blong smoltaem nomo), mo biaen yumi putum i gobak bakegen long bodi blong yumi. ?Be olsem wanem sipos dokta i talem se taem oli katem yu bambae oli mekem blad blong yu i ron i go insaed long wanfala mesin mo i gobak insaed long bodi blong yu? ?Yu yu save oraet long fasin ya? Sam Kristin oli ting se sipos dokta i putum wan kaen wora long mesin ya blong statem hem mo i no putum blad, oraet i no gat rong long samting ya. Voes blong hat mo tingting blong olgeta i no stikim olgeta from. Be ol dokta oli save mekem sam narafala fasin, mo yu yu mas skelemgud wanem samting i stret we yu yu mekem. Hemia i stap long yumi wanwan. Be long wanem samting yu yu jusum, oltaem yu yu mas gat wan voes blong hat mo tingting i klingud long fes blong God.—1 Pita 3:16; 1 Tim. 1:19.
9. (a) ?Yu yu mas mekem wanem blong bambae ol dokta oli respektem jus blong yu blong “no yusum blad”? (b) ?Sipos wan aksiden i kamaot, yu yu save mekem wanem blong bambae i no gat bigfala kros no rao? (c) ?Sipos wan dokta no kot i traem fosem yu blong tekem blad, yu yu save mekem wanem?
9 Sipos yu yu wantem we bambae dokta blong yu i respektem fasin blong yu blong “no yusum blad,” yu yu mas tok long hem bifo we i gat wan trabol i kamaot. Sipos yu yu mas slip long wan haospetal, yu yu mas raetem ol tok long pepa blong talem se yu yu no wantem kasem blad, mo yu yu mas toktok stret long dokta long samting ya. ?Be olsem wanem sipos i gat wan aksiden? Yu yu save toktok kwaet nomo wetem dokta ya mo yu save talem long hem we hem i save yusum ol fasin we hem i naf long hem blong givhan long yu, mo hem tu i save gat respek long voes blong hat mo tingting blong yu we i stanap long Kristin bilif. Sipos yu mekem olsem, ating bambae i no gat bigfala kros no rao we i kamaot. (Prov. 15:1; 16:21, 23) Be sipos ol dokta no ol dresa oli wantem halpem yu, oli tok strong long yu se sipos yu no kasem blad, be yu yu save ded, olsem wanem sipos oli traem fosem yu blong tekem blad? Yumi save stanap strong from we yumi bilif we ol rod blong Jeova oli stret nomo. Yumi mas holemstrong long Jeova, mo yumi save blokem olgeta gud. Yumi jusum rod blong obei long God fastaem, be tok blong ol man i kam biaen nomo.—Wok 5:29; lukluk tu Job 2:4; Proveb 27:11.
?Hemia Wan Bigfala Samting No Nogat?
10. ?Nomata oli talem se yumi mas tekem blad blong yumi no ded, from wanem samting ya i no save jenisim tingting blong yumi?
10 Ol man we oli no save yet Jeova, maet oli ting se fasin blong putum blad i go long bodi blong man i wan fasin blong tinghae long laef olsem we hem i tabu. Be yumi save finis se plante man we oli tok olsem, oli no kea long fasin blong kilim pikinini we i stap long bel blong mama blong hem. Jeova i gat moa save long laef mo blad, i winim save blong ol dokta. Olgeta loa blong Jeova oli save givhan long yumi, mo oli halpem yumi naoia mo long fyuja tu. (Aes. 48:17; 1 Tim. 4:8) ?Yu yu ting wanem? ?Loa ya we i talem se yumi mas “no yusum blad” i save halpem yumi tu?
11. (a) ?Long Isrel, Jeova i agri long wanem fasin nomo blong yusum blad? (b) ?From wanem hemia i bigfala samting blong yumi ol Kristin?
11 Yumi mas gat respek long blad we i tabu. Hemia wan bigfala samting. Olsem ya nao, Jeova i soemaot wan fasin nomo blong yusum blad, i talem se: “Sol [laef] blong bodi i stap long blad, mo mi wan mi putum hem long olta blong yu blong kavremap sin blong sol blong yufala, from we hemia blad ya we i kavremap sin blong sol we i stap long hem. Taswe mi mi talem long ol man Isrel, se: ‘I no gat wan sol long medel blong yufala we i mas kakae blad.’ ” (Lev. 17:11, 12) Oli kafsaedem blad blong ol anamol i go long stampa blong olta blong Jeova, hemia i olsem wan saen blong blad blong Jisas Kraes. (Hib. 9:11, 12; 1 Pita 1:18, 19) Olsem ya nao, loa ya blong God we i blokem ol narafala fasin blong yusum blad, i soemaot klia we blad blong Jisas i tabu tumas. Sipos yumi mekem narafala samting wetem blad, i olsem we yumi no gat respek nating long ol samting we Jeova i mekem blong sevem yumi long rod blong Pikinini blong hem.
12. ?Sipos ded i stap kolosap nomo long wan Kristin, from wanem hem i no mas mekem olbaot long blad blong hem, blong gat sam moa taem blong laef?
12 !Taem wan trabol i kasem wan man mo i save ded from, sipos man ya i tanem baksaed long loa blong God, i olsem we hem i sot nomo long tingting blong hem! Yumi haremgud from ol gud samting we ol dokta oli stap mekem, be yumi no wantem sakem loa blong God, blong bambae yumi, no wan famle blong yumi, i save laef sam dei no sam yia moa. Nogat. Yumi no save ting se laef blong yumi naoia i bigfala samting. Hemia nao bigfala samting: Sipos yumi bilif long blad blong Jisas we i ron blong givhan long yumi, bambae yumi save kasem laef we i no save finis. Long olgeta hat blong yumi, yumi bilif we ol stret man blong Jeova—nating sipos oli ded—bambae oli kasem gudfala pei, hemia laef we i no save finis.—Jon 11:25; 1 Tim. 4:10.
Tingtingbak
● ?Wanem samting i mekem laef mo blad i tabu? ?From wanem ol man blong wol oli gat narafala tingting long samting ya?
● ?Yumi mas mekem wanem blong soemaot we yumi ting se blad blong anamol i tabu?
● ?Yumi olgeta i mas mekem wanem blong soemaot klia we yumi ting se blad blong man i tabu? ?Hemia wan bigfala samting we yumi mas mekem no nogat?