Wan Kwestin
?Folem oda we Baebol i givim long saed blong stretfala rod blong yusum blad, wanem tingting blong ol Witnes blong Jeova long rod we sam dokta oli yusum blong tritim wan man wetem blad blong hem wan nomo?
Ol Kristin oli no save tekem disisen folem samting we olgeta nomo oli ting se i stret, no folem advaes we sam man blong meresin oli talem. Olgeta Kristin wanwan oli mas tingting gud long wanem we Baebol i talem. Hemia wan bisnes we i stap bitwin Kristin ya mo Jeova.
Jeova, we i stamba blong laef blong yumi evriwan, hem i putum oda ya se yumi no mas kakae blad. (Jenesis 9:3, 4) Long Loa we God i givim long Isrel bifo, hem i putum sam mak long fasin blong yusum blad from we blad i minim laef. Hem i givim oda ya se: “Olgeta samting we i gat laef, be laef blong olgeta i stap long blad blong olgeta. Taswe mi mi mekem rod blong yufala se yufala i save kilim anamol, mo pris i save kafsaedem blad blong hem i go long Olta ya blong mi, blong tekemaot ol sin blong yufala.” ?Olsem wanem sipos wan man i kilim wan anamol i ded blong i kakae? God i talem se: “Hem i mas kafsaedem blad blong hem i go long graon mo i mas berem.”a (Levitikas 17:11, 13) Jeova i talem oda ya bakegen mo bakegen. (Dutronome 12:16, 24; 15:23) Wan buk blong ol man Jiu, we nem blong hem Soncino Chumash i talem se: “Man i no mas kipim blad i stap, hem i mas kafsaedem i go long graon olsem wan samting we i no stret nating blong kakae.” Ol man Isrel oli no gat raet nating blong karemaot blad blong enikaen laef samting blong putum i stap mo yusum bakegen, from we laef blong olgeta samting i blong God.
Taem Mesaea i ded, ol man oli no moa nidim blong folem Loa blong Moses. Be, tingting we God i gat long saed blong blad se hem i wan tabu samting, hemia i no jenis. Tabu spirit blong God i pusum ol aposol blong talem long ol Kristin se oli “no mas yusum blad.” Oda ya i no wan samting we ol Kristin oli mas ting nating long hem. Hem i impoten tumas, sem mak olsem we fasin blong no mekem nogud wetem woman mo fasin blong no wosipim narafala god i impoten. (Ol Wok 15:28, 29, NW) Taem plante moa man oli stat givim mo tekem blad long ol yia 19 handred, ol Witnes blong Jeova oli kasem save se fasin ya i go agensem Tok blong God.b
Wanwan taem, wan dokta bambae i pulum wan man blong givim prapa blad blong hem sam wik bifo we oli katem hem (oli kolem fasin ya se preoperative autologous blood donation, no PAD). Dokta i mekem olsem blong bambae, sipos i gat nid, oli save yusum blad blong man ya, we oli bin kipim i stap. Be, fasin ya blong karemaot blad, kipim i stap mo putum bakegen long bodi blong man, i go stret agensem wanem we Baebol i talem long Levitikas mo Dutronome. Man i no mas kipim blad i stap; hem i mas kafsaedem blad i go long graon—olsem se blad ya i gobak long God. I tru, ol man oli no moa stap aninit long Loa blong Moses tede. Nating se i olsem, ol Witnes blong Jeova oli respektem ol bigfala tingting we God i soemaot tru long Loa ya, mo oli no wantem nating blong ‘yusum blad.’ Blad i wan samting we yumi mas ‘kafsaedem’ i gobak long graon, taswe mifala i no givim blad long narafala man, mo mifala i no karemaot blad blong mifala mo putum i stap samples. Ol fasin ya oli go agensem loa blong God.
Sam narafala rod no tes we ol dokta oli mekem wetem prapa blad blong man maet oli no rili go agensem ol rul we God i stanemap. Eksampol, plante Kristin oli letem dokta i karemaot smol blad blong olgeta blong jekemap no blong mekem tes long hem, afta long samting ya ol dokta oli sakemaot blad ya. Be maet i gat sam moa samting bakegen we ol dokta oli wantem mekem wetem blad blong wan man.
Eksampol, taem dokta i stap katem wan man maet hem i yusum rod ya we oli kolem hemodilution. Hemia i minim se oli jenisim rod blong blad blong i kamaot long bodi tru long wan smol paep. Oli mekem blad we i stap yet long bodi blong man ya i kam olsem wota. Biaen, blad ya we i aot tru long smol paep ya i gobak long bodi blong hem. Rod ya i mekem se namba blong ol sel long blad i no godaon tumas. Long sem fasin, ol dokta oli save karemaot blad we i ron i go insaed long ples we oli stap katem, oli klinimgud blad ya nao ol red sel blong hem oli save gobak long bodi blong man ya bakegen; rod ya oli kolem cell salvage (fasin blong sevem ol sel long bodi). Long wan narafala rod bakegen, ol dokta oli save karemaot blad blong man tru long wan smol paep i go insaed long wan mesin. Blong smoltaem, mesin ya i save mekem wok blong ol defren haf blong bodi (olsem hat, waetleva, no kidni). Ale, blad we i stap long mesin ya, i gobak long bodi blong man. Folem sam narafala rod bakegen, blad i go long wan mesin we i save seraotem ol defren samting insaed long blad (centrifuge) blong karemaot eni haf blong blad we i nogud. Maet ol dokta oli yusum rod ya tu blong karemaot sam spesel haf insaed long blad mo putum i go long wan stret ples blong bodi we i nidim samting ya. Mo tu, i gat sam tes we dokta i mekem taem oli karemaot sam blad blong makemaot hem no blong meksem sam meresin i go long hem, biaen, blad ya i gobak insaed long man.
I gat fulap defren kaen rod we ol dokta oli save yusum, mo i sua se i gat sam niufala rod bakegen no tritmen mo tes we bambae oli faenemaot yet. I no wok blong mifala blong lukluk gud long olgeta wanwan rod ya mo tekem wan stret disisen long saed blong olgeta. Nogat. Wan Kristin i mas mekem disisen blong hem wan long saed blong stret rod we hem i wantem se ol dokta oli folem taem oli yusum blad blong hem sipos oli mas katem hem, mekem wan tes, no wan tritmen long hem. Bifo long samting ya, hem i mas askem gud long dokta no narafala man we bambae i tritim hem, wanem we bambae oli mekem wetem blad blong hem long taem ya. Ale, hem i mas mekem wan disisen folem wanem we tingting blong hem i jajem hem se i stret blong mekem. (Lukluk bokis.)
Ol Kristin oli mas tingbaot se oli givim laef blong olgeta finis long God mo from samting ya oli mas ‘lavem hem wetem olgeta hat, laef, paoa, mo tingting blong olgeta.’ (Luk 10:27) I no gat plante man long wol we oli tinghae long fasin fren wetem God, be ol Witnes blong Jeova oli luk fasin fren ya olsem wan samting we i sas tumas. Man ya we i Givim Laef, hem i pulum olgeta man blong trastem blad blong Jisas we i ron. Yumi ridim se: “From we blad blong Kraes i ron, God i mekem yumi ya we yumi joen long Kraes, yumi friman finis. Hem i fogivim yumi finis, i tekemaot ol sin blong yumi.”—Efesas 1:7.
[Ol futnot]
a Tija ya Frank H. Gorman i raetem se: “Yumi kasem save se, fasin ya blong kafsaedem blad, i wan aksin we man i mekem blong soem ona mo respek long laef blong anamol ya, mo respek long God tu, we hem nao i wokem anamol ya mo i stap kea gud long laef ya.”
b Wajtaoa blong Julae 1, 1951 (long Inglis), i ansa long sam bigfala kwestin long saed ya. Hem i soemaot from wanem fasin blong tekem no givim blad i no stret.
[Bokis/Foto blong pija long pej 31]
SAM KWESTIN BLONG ASKEM LONG YU WAN
?Sipos sam blad blong mi bambae i goaot long bodi blong mi blong pas tru long wan mesin mo maet blad blong mi i no moa ron blong smoltaem, tingting blong mi we i stap jajem mi bambae i agri se blad ya hem i wan haf yet blong mi, minim se hem i no nidim blong yumi ‘kafsaedem i gobak long graon’?
?Tingting ya we i stap jajem mi folem wanem we Baebol i tijim, bambae i trabol sipos mi folem wan rod no tritmen we i mekem se ol dokta oli mas tekemaot sam blad blong mi, mekem sam jenis long hem, mo putum i gobak long bodi blong mi?