Jeova i Hivimap Mo Trenem Ol Man Blong Hem
Long plante handred yia we i pas finis, apostasi i kavremap plante ples long wol. Sam tijing blong jyos nomo oli agri wetem Baebol, be bighaf blong ol tijing ya oli bin kamaot long tingting blong man no kastom blong ol hiten man. Ol jyos ya oli no tingting tumas long saed blong taem we Kraes i mas kambak bakegen.—Skelem Matyu 13:24–30,37–43.
!Jisas i bin talem se ol man oli mas wekap gud blong luksave taem blong hem blong kambak bakegen! Wan grup we i bin mekem olsemia, stap long Alegeni, Pensilvenya, Yunaeted Stet. Jes biaen long 1870, Charles Taze Russell mo sam fren blong hem, oli stat stadi long Baebol, blong save olsem wanem Kraes i mas kambak bakegen. Grup ya i no joen wetem enikaen jyos. Mo tu, oli lukaot trutok blong Baebol long saed blong sam narafala stampa tijing. Hemia nao, stat blong wok blong ol Wetnes blong Jeova long taem blong yumi.—Matyu 24:42.
Grup ya i luksave se Baebol i no tokbaot Triniti, be Jeova nomo hem i Hae God we i wokem evri samting; Jisas Kraes, hem i faswan we God i bin wokem. Mo hem nomo i stret pikinini blong Jeova. Tabu speret, hem i no wan prapa man we yumi save luk wetem ae blong yumi, be hem i paoa blong God nomo. Grup ya i luksave se sol i save ded, mo dedman i save laef bakegen long fyuja. Oli luksave tu se panis blong olgeta we oli no tanem tingting from ol rabis fasin, i no blong harem nogud blong olwe long wan rabis ples, be i blong lus olgeta.
Grup ya i luksave wan stampa tijing blong Baebol, se Kraes i bin givim laef blong hem blong pemaot ol man. Fastaem, hem i pemaot 144,000 man mo woman we Jeova i jusumaot olgeta, i stat long faswan handred yia kam kasem taem blong yumi. Ol 144,000 ya oli mas go long heven blong rul wetem Kraes long Kingdom. Mo tu, from ded blong Jisas, plante taosen milyan man we bighaf blong olgeta bambae oli laef bakegen long ded, oli save kam stret olgeta, mo oli save stap laef blong olwe aninit long rul blong Kingdom ya.
Russell mo olgeta we oli kampani wetem hem, oli luksave se Jisas i kambak olsem wan speret man, mo ol man oli no save luk hem. Taem blong Rul blong ol Nesen, no taem we rul blong God i no kamtru long wan gavman blong wol, i finis long 1914. Long taem ya, God i putumap Kingdom blong hem long heven. Ol Wetnes blong Jeova tede oli stil bilif long tijing ya.
Russell mo ol fren blong hem oli bin yusum toktok mo ol buk tu blong talemaot trutok long plante ples. Long Julae 1879, Russell i stat prentem “Zion’s Watch Tower” (naoia Wajtaoa). Hem i mekemap tingting blong hem, se wok blong ol Wetnes blong Jeova i mas dipen long ol presen mane nomo. Oli no mas mekem kleksin. Mo tu, olgeta we oli bilif, oli mas talemaot mesej ya fri, we oli no kasem pei from. Russell hem wan i yusum haf mane blong hem long wok ya, hemia mane we hem i bin winim from bisnes blong hem bifo.
Ol Baebol Studen oli bin hivap long “ol klas.” Hemia nem blong ol kongregesen long taem ya. Oli hivap tri taem long wan wik, blong toktok, stadi Baebol, mo mekem testimoni miting. Samtaem, olgeta oli vot blong putumap sam elda blong lukaot long wok we evri “klas” i mekem long saed blong speret.
Long 1884, oli bin stanemap Zion’s Watch Tower Tract Society long Pensilvenya. Sosaete ya i no blong winim mane. Evri yia, oli vot blong putumap wan presiden. Sosaete ya i wan kampani we loa blong kantri i agri long hem, mo hem i no dipen long wan man nomo, be hem i olsem wan rod blong mekem wok blong tijim Baebol i save go moa. Oli putumap Charles T. Russell olsem presiden, mo oli yusum ofis blong hem olsem hedkwota.
Olgeta oli hadwok blong mekem wok ya i go long sam narafala kantri. Hem i stat long Kanada mo Engglan jes biaen long 1880. Long 1891, Russell i wokbaot i go long Yurop mo Medel Is blong luk wanem samting oli save mekem, blong trutok i save gohed long ol ples ya. Biaen long 1900, oli bildim ol ofis blong Sosaete long Engglan, Jemani, mo Ostrelya.
Long 1909, olgeta oli muvum hedkwota blong Watchtower Sosaete i go long Bruklin, Nyu Yok. Oli mekem olsem, blong wok blong prij i save go long plante moa kantri long wol. Olgeta oli faenemaot se oli mas stanemap wan narafala kampani we loa blong Nyu Yok Stet i agri long hem. Naoia, oli kolem kampani ya, Watchtower Bible and Tract Society of New York, Inc. Long 1914, oli stanemap International Bible Students Association long London, Engglan, blong mekem se wok blong ol Baebol Studen i go moa long ol kantri we Britin i lukaot long olgeta. Naoia, samwe long 70 kampani oli stanap long plante kantri long wol, mo loa blong ol kantri ya i agri wetem olgeta. Evri asosiesen ya (no sosaete) oli wok wetem Watchtower Sosaete. Olgeta oli wantem givhan long ol man, taswe oli dipen nomo long ol presen mane, mo long wok we plante man oli mekem fri.
Long 1916, Charles Taze Russell i ded, mo Joseph Franklin Rutherford i kam presiden blong Watchtower Sosaete. Kolosap long en blong Faswan Bigfala Faet, ol Baebol Studen oli kasem trabol we i traem olgeta bigwan, gogo gavman i sakem eit brata long kalabus from sam gyaman ripot. Eitfala ya oli bin wok long hedkwota blong Sosaete long Amerika. Long taem ya, i luk olsem we wok blong ol Baebol Studen i save finis. Be long 1919, oli lego olgeta, mo oli talemaot se ol brata ya oli no gat fol nating long bisnes ya. Nao, ol brata oli stat prij bakegen, be oli mekem wok ya i kam bigwan moa.
Kampani blong ol Kristin Baebol Studen, we tabu speret i makemaot olgeta, oli yusum hedkwota blong Sosaete blong givim kakae long saed blong speret. Oli givim kakae ya long stret taem, long olgeta we oli joen wetem ogenaesesen ya. Long faswan handred yia, ol tabu Kristin oli olsem “slef we i stret mo waes,” we Jisas i tokbaot. Long sem fasin, kampani blong ol tabu Baebol Studen we oli givim laef blong olgeta long Jeova finis mo oli stap mekem Kingdom wok, oli olsem “slev we i stret mo waes” long taem blong yumi. Taem we Jisas i kam blong jekemap kongregesen, hem i faenemaot se grup ya i stap givim kakae long ol man we oli stap mekem wok insaed long haos; ale, hem i putumap olgeta blong lukaot long olting blong hem.—Matyu 24:45–47; Luk12:42.
Smoltaem biaen long Faswan Bigfala Faet, i klia nomo we Kingdom blong God wetem King Jisas Kraes i stanap finis long heven long 1914. Nao, tok blong Jisas i save kamtru olgeta: “Mo gud nyus ya blong Kingdom, bambae oli mas talemaot long olgeta ples long wol, blong oli wetnes long olgeta man blong wol. Nao biaen, bambae en blong wol i save kam.” Joseph F. Rutherford i lidim wok ya blong mekem se plante moa man oli save harem mesej ya.—Matyu 24:14.
Sosaete i mekemap tingting blong hem se, hem nomo i mas prentem ol buk mo ol magasin blong hem. Blong mekem olsem, hem i yusum ol man we oli givim laef blong olgeta long Jeova finis, mo oli glad blong wok fri nomo. Olsemia, hem i gohed oltaem blong prentem ol buk mo magasin, mo praes blong olgeta i save stap daon nomo. Hem i pulum ol Baebol Studen blong oli go talemaot gud nyus blong Kingdom ya. Long plante kantri, oli yusum radio blong talemaot sam tok we oli stanap long Baebol.
Bifo long 1918, ol Baebol Studen oli ting se oli mas hivimap las haf blong olgeta we bambae oli stap wetem Kraes long heven, mo oli mas talemaot jajmen blong God long wol. Oli no tingting tumas blong hivimap olgeta we bambae oli sef long en blong rabis fasin ya, blong kasem itenel laef long wol. Be stat long 1918, plante man oli bin harem tok ya “!Plante Milyan Man We Oli Laef Naoia, Maet Oli Neva Ded!”
Long 1923 oli stadi long parabol blong Jisas long saed blong ol sipsip mo nani long Matyu 25:31–46. Hem i soemaot se bifo long Amageden, God i glad long plante man we oli mekem stretfasin, nating we olgeta oli no haf blong Kingdom long heven. Olgeta ya, oli save sef long Amageden. Long 1935, oli luksave se ol ‘sipsip’ ya oli sem mak long “bigfala kampani” we Revelesen 7:9-17 i tokbaot. Olgeta ya, bambae oli gat jans blong pastru long taem blong Bigfala Trabol, blong stap laef blong olwe long wol. Save ya i mekem olgeta oli girap, oli gohed strong long wok blong prij.—Jon 10:16.
Long 1931, ol Baebol Studen, oli tekem nem ya: Ol Wetnes blong Jeova. Bifo long taem ya, oli bin kolem olgeta se Baebol Studen, Intenasnal Baebol Studen, Milenyal Don Pipol, mo Wajtaoa Pipol. Sam man oli bin kolem Raselaet mo Ratafodaet. I no gat wan long olgeta nem ya we hem i rili makem olgeta. Nem ya, Kristin, we God i bin givim long ol man blong Jisas long faswan handred yia i stret nomo. Be plante grup we oli folem ol gyaman tijing, oli bin yusum nem ya tu. Ol trufala Kristin long taem ya, oli mas gat wan nem we i makem olgeta, se oli defren long plante milyan man we oli gyaman Kristin nomo.
Oli stadi moa long Baebol, ale, oli faenem se Jeova i singaot ol man Isrel blong oli wetnes long hem. Taswe, i stret nomo we olgeta we oli givim laef blong olgeta long Jeova, blong talemaot nem mo plan blong hem long ol lasdei blong wol, oli tekem nem ya: Ol Wetnes blong Jeova. Nem ya i makemgud ol trufala Kristin we oli wosipim Jeova, se oli defren olgeta long ol gyaman Kristin.—Ol Sam 83:18, Aesea 43:10-12.
Long 1942, long Seken Bigfala Faet, Joseph F. Rutherford i ded, mo Nathan H. Knorr i kam presiden blong Watchtower Sosaete. Nao, olgeta oli luksave ol profet tok we oli soemaot se i mas gat wan taem blong pis biaen long bigfala faet ya. Samting ya i min se bambae oli fri blong go moa long wok blong prij bifo long en blong wol. Long Febuwari 1943, oli stanemap Watchtower Baebol Skul blong Giled blong trenem ol fultaem minista blong mekem misinari wok long ol narafala kantri. Long sem yia, oli ademap wan nyufala miting long program blong ol Wetnes blong Jeova. Olgeta oli mekem miting ya wan taem evri wik. Miting ya i blong trenem olgeta long minista wok.
Long 1950, Sosaete i bin prentem fas haf blong New World Translation of the Holy Scriptures, wan nyufala Engglis Baebol we i stanap long olfala lanwis blong bifo. Baebol ya i isi blong kasem save, i stret long ol olfala lanwis, mo praes blong hem i smol nomo, from we Sosaete nomo i prentem. Baebol ya i givhan bigwan long wok blong prij. Kam kasem naoia, oli prentem bitim 40 milyan kopi long 11 lanwis.
Long en blong 1989, i gat bitim tri milyan haf Wetnes blong Jeova, we oli stap mekem wok blong prij long bitim 200 kantri mo aelan long wol. 9,479,064 man oli bin hivap long Memoriol blong ded blong Kraes we oli mekem long 60,192 kongregesen long 1989. I no gat wan narafala miting long yia ya we namba blong ol man i antap moa.
Hemia sam samting we oli soemaot se God i rili stap yusum ol Wetnes blong Jeova: Olgeta oli gohed blong wok strong long wok blong hem, oli gat yuniti long olgeta ples blong wol, oli hadwok blong leftemap nem blong Jeova mo talemaot Kingdom blong hem, oli gat klin fasin long laef, oli bilif se olgeta tok blong Baebol oli tok blong God we i stret olgeta, mo oli no joen nating long ol gyaman kastom mo wok blong rabis speret.
Ol nekis haf blong buk ya, oli soemaot olsem wanem fasin blong stanemap tru wosip bakegen i save givhan long yu.
• ?Wanem sam stampa tijing blong Baebol we oli soemaot se ol Baebol Studen oli defren long ol narafala jyos?
• ?Kam kasem 1918, ol Baebol Studen oli mekem wanem blong ogenaesesen i save go moa?
• ?From wanem yumi save talem se, kampani blong ol tabu Baebol Studen mo “slef we i stret mo waes” blong Matyu 24:45–47, tufala i sem mak?
• ?Wanem save long saed blong plan blong God i mekem wok blong prij i go long plante ples long wol?
• ?From wanem olgeta oli tekem nem ya, ol Wetnes blong Jeova?
• ?Wanem samting we oli soemaot se God i rili stap yusum ol Wetnes blong Jeova?
[Tok Blong Pija Long Pej 8]
C.T. Russell long 1879
Julae 1879 Wajtaoa
Wan grup long ol faswan Baebol Studen, Pitsbeg, Pa.
[Tok Blong Pija Long Pej 9]
Hedkwota, 1889–1909, Pitsbeg, Pa.
Ofis Bruklin, 1909-1918
Haos blong hedkwota, 1909–1926, Bruklin, N.Y.
[Tok Blong Pija Long Pej 10]
Wol hedkwota blong ol Wetnes blong Jeova, Bruklin, Nyu Yok, Yunaeted Stet.
Lefsaed antap: Ol ofis
Raetsaed antap: Ol haos blong slip
Lefsaed daon: Ol faktri
Raetsaed daon: Ples we oli sanemaot ol buk
[Tok Blong Pija Long Pej 11]
J.F. Rutherford i stap toktok long radio
Faswan mesin blong Watchtower Sosaete we ol brata oli wokem blong prentem ol buk mo magasin
New World Translation blong Baebol, we naoia oli stap prentem long 11 lanwis