Harem Gud Mo Presem God Long Ol Asembli

Afta 1880, ol Baebol Studen oli luksave se nating we olgeta oli mekem ol miting long ples blong olgeta, be i gud blong frengud wetem ol narafala man we oli gat sem bilif long ol narafala ples tu. Taswe, olgeta oli mekem plan se ol Baebol Studen long Yunaeted Stet oli joen long asembli evri yia. Biaen, oli mekem long Kanada tu. Olgeta oli haremgud long saed blong speret from. Samtaem, ol asembli ya oli gohed plante dei, mo oli tijimgud olgeta man long saed blong Baebol. Ol man oli haremgud long kampani blong ol narafala brata, mo samting ya i leftemap tingting blong olgeta. Long ol asembli ya, oli givim wan gudfala wetnes long olgeta we oli no stap long trutok tu.—Rom 1:11, 12.

Tede ol Wetnes blong Jeova oli mekem ol asembli evri yia. Samwe long 18 kasem 25 kongregesen oli joen tugeta blong mekem wan seket. I gat sam elda we wok blong olgeta i blong goraon long seket blong olgeta blong visitim evri kongregesen wanwan. Tu taem long evri yia, olgeta oli mekem seket asembli. Hemia i minim se ol kongregesen long wan seket, no haf long seket ya, oli hivap long tufala dei, Sarede mo Sande.

Wan taem long evri yia, oli mekem wan bigfala asembli long evri kantri we plante taosen man oli save hivap wanples. Ol asembli ya oli leftemap tingting long saed blong speret. From samting ya, ol Wetnes blong Jeova mo ol fren blong trutok, oli glad blong hivap long olgeta. Mo tu, oli givim gudfala wetnes long ol narafala man we oli no stap long trutok.

Hed-Kampani blong ol Wetnes blong Jeova i wokem program blong ol asembli ya. Program ya i stret long olgeta samting we ol Wetnes long ful wol oli nidim. Ol elda we oli goraon, mo sam Wetnes long ol kongregesen, oli mekem oli tok, oli storeyan, no oli mekem sam pleplei we oli stanap long ol samting we oli rili hapen long laef. Samfala, oli yusum store blong laef blong olgeta blong soemaot olsem wanem oli stap winim ol traem long laef, blong oli save gohed long Kristin fasin long wan wol we bighaf blong ol man oli no ona nating long God. Samfala oli talemaot frut blong minista wok blong olgeta. Wan samting moa long ol Distrik Asembli: Ol Baebol drama we oli tokbaot laef long taem bifo mo naoia, oli soemaot olsem wanem ol Kristin oli save winim ol trabol we oli stap kasem tede.

Olgeta oli wokem kakae long ol asembli ya, we ol man oli pem blong smol praes nomo. Taem blong kakae i givim jans long olgeta blong storeyan gud wetem ol narafala man gogo miting i stat bakegen. Olgeta we oli mekem bigfala wok blong lukaot long ol asembli blong oli rongud, oli Wetnes blong Jeova nomo, mo oli no kasem pei from wok ya. Oli pem ol kaon blong asembli from ol presen mane nomo. Ol man oli no pem blong kam insaed, mo i no gat kleksin.

Yu yu save askem ol Wetnes blong Jeova long lokol kongregesen wetaem mo weples bambae oli mekem asembli long eria blong yu. Bambae olgeta oli talemaot long yu olsem wanem oli mekem rod blong go mo kambak long asembli, mo olsem wanem yu save gat rum blong slip long ples blong asembli.

Ol asembli ya oli givhan long ol Wetnes blong Jeova mo olgeta we oli joen wetem ol Wetnes, blong tingbaot kampani blong ol brata long evri ples long wol. Oli no tingbaot lokol kongregesen nomo.—1 Pita 2:17.

• ?Ol faswan Baebol Studen, oli kasem wanem blesing from ol asembli blong olgeta?

•Traem storeyan long plan mo program blong ol Seket mo Distrik asembli.

[Tok Blong Pija Long Pej 18]

Baebol drama long Distrik Asembli, Amerika

Intenasnal asembli, Polan

Intenasnal asembli, Ajentina

Seket asembli, Japan

Olgeta long asembli oli kasem ol buk, Swiselan

Baptaes long intenasnal asembli, Saot Afrika

Oli soemaot wan nyufala buk long Kanada

Olgeta long asembli oli joen long singsing, Spen