Bambae Ol Wetnes Blong Jeova Oli Mekem Ol Intenasnal Asembli

Hed Kampani blong ol Wetnes blong Jeova i stap mekem plan naoia blong mekem ol intenasnal asembli long 1998. Olgeta we oli stap long miting we Watch Tower Bible and Tract Society of Pennsylvania i mekem evri yia, oli glad tumas blong harem nyus ya. Long 1996, oli mekem miting ya long Haos Asembli long Jesi Siti, long Sarede, Oktoba 5.

Wetem ol distrik asembli we ol Wetnes oli mekem evri yia, long medel blong 1998, bambae oli mekem sam intenasnal asembli long Not Amerika tu. Ol asembli ya bambae oli mekem se i gat plante handred taosen Wetnes blong plante ples blong wol oli joen wanples. Blong mekem se i save gat sam man blong ol defren kantri long ol asembli ya, bitim 100 hedkwota blong Watch Tower Sosaeti wanwan, bambae oli sanem wan stret namba blong man blong kantri blong olgeta, oli go long wan intenasnal asembli long wan taon long Not Amerika, taon we Sosaeti i talem long olgeta.

I klia se, i no olgeta we oli wantem go long Not Amerika we bambae oli gat jans blong mekem olsem. Be, bambae plante taosen oli gat jans blong go long wan intenasnal asembli kolosap long ples blong olgeta. I gat plan i stap blong mekem ol intenasnal asembli long tu no tri kantri blong Yurop. Bambae oli mekem sam narafala asembli long Afrika, Esia, Latin Amerika, Saot Pasifik, mo ol aelan blong Karibin.

Long stret taem, bambae ol hedkwota blong Sosaeti oli talemaot long ol kongregesena long kantri blong olgeta, stret taon no ol taon we oli save go long hem blong mekem asembli. Bambae oli talemaot ol stret dei blong ol asembli, mo plan we bambae oli folem blong jusumaot ol man we oli save go long asembli long narafala kantri. Olgeta we oli stap tingting blong fulumap pepa blong go long ol asembli ya, maet oli save stat sevem mane naoia blong mekemrere from spesel taem ya.

Ol Wetnes blong Jeova long olgeta ples blong wol oli save tingrere long ol samting we bambae i kamaot long ol intenasnal asembli ya long 1998. Ol distrik asembli long olgeta kantri bambae oli gat program we i kolosap sem mak long program blong ol intenasnal asembli.

[Futnot]