Ol Fultaem Minista Oli Soemaot Rod Long Wok Blong Prij
Maet faswan long ol Wetnes blong Jeova we i kam luk yu i wan fultaem paenia no misinari. From we ol Wetnes blong Jeova oli no kasem pei from minista wok blong olgeta, yu save askem kwestin ya: ?Olsem wanem samfala oli save mekem wok ya fultaem?
Ol Wetnes we oli givim laef blong olgeta i go long Jeova mo oli tekem baptaes, oli kam minista blong God. Be bighaf blong olgeta oli gat wok long famle, no wan narafala wok bakegen. From samting ya, oli save prij smoltaem nomo evri wik. Be plante taosen Wetnes long wol, oli jenisim sam samting long laef blong olgeta, blong oli no gat bigfala kaon. From samting ya, olgeta oli save wok haftaem nomo blong winim naf mane blong pem ol kaon blong olgeta. Narafala haf blong taem blong olgeta, oli yusum blong mekem 1,000 haoa evri yia long fultaem minista wok.
I tru nomo we ol fultaem paenia oli no gat bigfala mane. Be long tingting blong olgeta, hemia wan rod blong putum Kingdom blong God i stap long fasples long laef blong olgeta. Taswe oli kasem plante blesing from. Olgeta oli haremgud blong tokbaot Tok blong God long 90 haoa evri manis. Ol fultaem minista oli stap kam moa gud long minista wok tu, mo oli gat taem blong visitim bakegen olgeta we oli intres long trutok. From samting ya, olgeta oli kasem gudfala frut we i pulum olgeta blong gohed. Oli gat ol samting we oli nidim long saed blong bodi, mo oli tangkyu from—Matyu 6:33.
Long Febuwari 1943, Watchtower Sosaete i stanemap Watchtower Baebol Skul blong Giled. Skul ya i blong trenem sam fultaem paenia blong mekem wok blong misinari long ol defren kantri. Kos ya i gohed faef manis, mo oli stadi dip long Baebol, long histri blong Baebol, long ogenaesesen blong Jeova, mo sam samting bakegen we oli rerem olgeta blong wok long ol defren kantri.
Sosaete i pem rod blong olgeta blong go long kantri we bambae oli mekem misinari wok long hem, mo hem i givim gudfala kakae mo ples blong slip long olgeta. Ol misinari haos oli no flas bitim mak, be oli gud nomo. Sosaete i givim smol mane long ol misinari, blong pem ol smolsmol samting we oli nidim. Long ol misinari haos, oli gat wan program blong kukum kakae, pem ol samting we oli nidim long stoa, mo klinim haos. Evriwan long haos i mekem wok blong hem, stret long program ya. From ol samting ya, ol misinari oli save mekem 140 haoa evri manis long wok blong prij, mo oli mekem Baebol-stadi wetem ol man we oli intres.
Plante long olgeta misinari ya, oli go long wan kantri no aelan we i longwe long ples blong famle blong olgeta. Olgeta oli mas rere blong stap long wan ples we hem i narakaen olgeta. I gat defren kakae, defren lanwis, ating ples ya i hot moa, i kolkol moa, i drae no i wet wet. Olgeta oli mekem wok ya from we oli laekem tumas ol man, mo oli gat wan strong tingting blong givhan long olgeta blong lanem trutok long saed blong Kingdom blong God.
Stat long 1943 go kasem 1985, Watchtower Baebol Skul blong Giled i trenem 80 klas, mo hem i bin sanemaot bitim 6,000 misinari. Sosaete i lukaot long wok blong olgeta, mo oli statem wok blong tijim Baebol long plante ples long Afrika, Medel mo Saot Amerika, Orien, mo Saot Pasifik. Oli mekem bigfala wok long Yurop tu.
Nating sipos ol Wetnes blong Jeova oli fultaem minista olsem ol paenia no misinari, no oli haftaem nomo, be oli no winim mane from wok ya. Olgeta oli spenem mane, taem mo paoa blong olgeta nomo, blong halpem ol man blong kasem save ya we i lidim olgeta blong kasem laef blong olwe.—Jon 17:3.
• ?Olsem wanem sam Wetnes blong Jeova oli save wok fultaem long minista wok? ?From wanem oli mekem?
• ?Olsem wanem oli trenem ol minista blong mekem misinari wok?
• ?Olsem wanem olgeta oli lukaot gud long ol misinari long ol defren kantri?
[Tok Blong Pija Long Pej 22]
Lefsaed : Klasrum blong Giled skul, Bruklin, Nyu Yok, Yunaeted Stet
Raetsaed : Misinari i tijim Tok blong God long Papua Nyu Gini
[Tok Blong Pija Long Pej 23]
Ol paenia mo ol misinari, oli talemaot Tok blong God long ol defren kantri
Brasil
Dominikan Ripablik
Spen
Siera Leon, Afrika