?Ol Witnes Blong Jehova Oli Mekem Wok Blong Misinari?

Yes. Nomata weples ol Witnes blong Jehova oli stap long hem, oli traem blong gat tingting olsem ol misinari, hemia se, mifala i talemaot bilif blong mifala long evri man.—Matiu 28:19, 20.

Mo tu, sam Witnes oli muv i go long wan narafala ples long kantri blong olgeta, we plante man oli no harem gud nius blong Baebol yet. Sipos no, oli go blong smoltaem long wan ples olsem. Samfala oli muv i go long wan narafala kantri. Oli glad tumas blong givhan blong mekem profet tok ya blong Jisas i kamtru se: “Bambae yufala i mas go talemaot mi . . . gogo yufala i finisim olgeta ples long wol.”—Ol Wok 1:8.

Long yia 1943, mifala i stanemap wan skul blong trenem misinari, nem blong hem Baebol Skul Blong Gilead. Kam kasem naoia, bitim 8,000 Witnes oli tren long skul ya.