Oli Lukaotgud Long Ol “Sipsip” Blong God Long Fasin Joengud

Sam man oli askem se: ‘?Hu ya i bos long kongregesen blong ol Wetnes blong Jeova long olgeta ples blong wol?’ Mifala i ansa se: Fasin we oli yusum blong lukaot long ogenaesesen i folem rod we Kristin kongregesen long faswan handred yia i soemaot.

Afta 1870, Charles T. Russell mo olgeta we oli kampani wetem hem, oli statem wok ya blong seremaot save we oli bin kasem from Baebol stadi blong olgeta. Oli yusum ol toktok, ol magasin, mo ol buk blong mekem olsem. Long kantri ya, olgeta we oli joen long wok ya, oli tingbaot Russell mo kampani blong hem olsem wan grup we oli gat moa ekspiryens long wok blong Hae God, i bitim ol narafala man. Taswe, olgeta oli save askem advaes blong olgeta long wok we oli stap mekem.

Long 1884, oli stanemap Zion’s Watch Tower Tract Society we loa blong Pensilvenya i agri long hem. Russell mo olgeta we oli kampani wetem hem, oli joen blong lukaot long Sosaete ya mo long wok blong ol Baebol Studen. Long 1909, oli muvum hedkwota blong olgeta i go long Bruklin, Nyu Yok. Kam kasem naoia, olgeta we oli stap lukaot long Watchtower Sosaete mo sam narafala tabu man we oli kasem ol mak long saed blong speret, oli stap wok olsem wan Hed Kampani blong ol Wetnes blong Jeova.

Hed-Kampani ya i wan grup blong ol tabu Kristin man (13 long 1986). Seven blong olgeta oli stap wok olsem ol daerekta blong Watchtower Sosaete. Olgeta ya oli stap lukaot long wok blong ol Wetnes blong Jeova long olgeta ples blong wol. God i no givim toktok stret long olgeta, taswe oli save mekem mastik samtaem. Be ol tok blong olgeta oli stanap long Tok blong God, we hem nomo i stret olgeta. Oli save se Tok blong God i hae moa bitim ol narafala save. Long ful laef blong olgeta, oli ona long Tok blong God. Olgeta wanwan i gat bitim 40 yia long fultaem minista wok blong ol Wetnes blong Jeova.

Hed-Kampani ya i stap lukaotgud long olgeta samting we Sosaete i prentem. Oli luksave wanem samting we ol ‘sipsip’ oli nidim long saed blong speret. Ale, oli stap raetem ol samting we i stret nomo long olgeta. Save ya i kamaot from dip stadi blong Tok blong God, we i joen wetem prea. Ol man ya, oli stap stadi long Baebol blong luksave olsem wanem plan blong God i stap kamtru, olsem wanem ol profet tok oli laenap wetem ol samting we oli stap kamaot long wol, mo olsem wanem long laef blong ol man blong God we oli stap long ol defren ples blong wol. Samtaem, oli luksave se oli mas ademap sam save we i jes kam klia long saed blong sam tijing.—Ol Sam 97:11; Proveb 4:18;Daniel 12:4.

Hed-Kampani ya i putumap ol Branj Komiti long 90 ples long wol blong lukaotgud long wok blong bitim 200 kantri mo aelan. Long komiti ya i mas gat tri, no samtaem moa man, we fasin blong olgeta long saed blong speret i kasem ol mak we Baebol i putum. Ol Branj wanwan oli sanem toktok no leta i go long ol kongregesen long ples blong olgeta. Hed-Kampani mo ol Branj Komiti, tufala i sanem toktok no leta long tufala oltaem tu. Evri yia sam long Hed-Kampani oli visitim plante defren Branj blong luk olsem wanem long wok long ol kantri ya.

Ol man ya oli no bos long bilif blong ol narafala, be oli minista we oli wok strong blong mekem rod blong plante narafala oli save lanem Tok blong God. Olgeta oli no wok blong winim mane. Ol samting long saed blong bodi, oli kasem fri nomo, olsem ol narafala memba blong ol Betel famle. Olgeta ya oli stap wok long fasin we i stret gud. Yumi luksave samting ya from we ol Wetnes blong Jeova long olgeta ples blong wol, oli soemaot gudfala fasin blong wok strong, oli joengud, oli gat gudfala fasin long laef, mo oli fasgud long ol tijing blong Baebol.—1 Korin 3:5-9; 4:1,2; 2 Korin1:24; 3:1-3; 1 Pita 5:2,3.

• ?Olsem wanem oli faenem rod blong lukaot long wok blong ogenaesesen long ful wol?

• ?Hu ya Hed-Kampani naoia? ?Wanem wok blong olgeta?

• ?Olsem wanem oli lukaot long wok blong olgeta kantri?

[Tok Blong Pija Long Pej 26]

Ol presiden blong Watchtower Sosaete

C.T. Russell, 1884-1916

J.F. Rutherford, 1916-1942

N.H. Knorr, 1942-1977

F.W. Franz, 1977

Ol ples we ol Wetnes blong Jeova oli stap mekem wok blong God

[Tok Blong Pija Long Pej 27]

Sam long 90 branj ofis, weoli lukaot long wok blong ol Wetnes blong Jeova long olgeta ples blong wol

Kanada

Sambia

Jemani

Japan

Ostrelya

Brasil