Japta 13

Pem Gol We Oli Bonem Finis Long Faea

LAODISIA

1, 2. ?Laswan long ol seven kongregesen we i kasem mesej long Jisas we i laef bakegen, hem i stap wea? ?Wanem sam bigfala poen long saed blong taon ya?

LAODISIA i laswan long ol seven kongregesen blong kasem wan mesej long Jisas we i laef bakegen. !Mo mesej ya i openem ae blong olgeta, i wekemap tingting blong olgeta bigwan!

² Oli spolem olfala taon ya Laodisia finis, sam ston nomo i stap. Tede sipos man i aot long Alasehir, i ron i go samwe long 88 kilomita long saotis, hem i save luk ol ston we oli stap yet long ples we Laodisia i stap fastaem. Ples ya i kolosap long taon ya Denisli. Long faswan handred yia, Laodisia i wan bisi mo rij taon. Hem i stap long kona we tu bigfala rod i joen. Mo hem i stampa taon blong ol big bisnes mo bang. I gat wan narafala samting tu we i mekem hem i rij. Taon ya i stap salem wan gudfala meresin blong ae. Mo long taon ya oli stap somap ol naes klos, we oli wokem long hea blong sipsip we i blak. Fastaem, taon ya i sot long wora. Afsaed long taon ya, i gat wan stampa blong hot springwora, nao ol man oli digim wan smol krik blong mekem wora ya i ron i kam kasem taon ya. Taswe, taem wora ya i kasem taon, hem i no moa hot, mo i no kolkol tu.

3. ?Olsem wanem Jisas i statem mesej blong hem long kongregesen blong Laodisia?

³ Laodisia i stap kolosap long Kolosi. Long leta we aposol Pol i raetem i go long Kolosi, hem i tokbaot wan leta we i bin sanem i go long olgeta long Laodisia. (Kolosi 4:15, 16) Yumi no save wanem we Pol i bin raetem long leta ya. Be mesej we Jisas i sanem i go nao long ol man long Laodisia i soemaot se oli foldaon bigwan long saed blong speret, oli sik tumas. Olsem ol narafala mesej, fastaem Jisas i tokbaot ol fasin blong hem wan, i se: “Mo yu mas raetemdaon tok ya i go long enjel blong kongregesen long Laodisia, se: ‘Hemia tok blong hemia we i Amen ya. Hem i tru wetnes ya we i no save tanem tok blong hem. Hem i faswan long olgeta samting we God i wokem.’ ”—Revelesen 3:14, “NW.”

4. ?Olsem wanem Jisas i “Amen ya”?

⁴ ?From wanem Jisas i talem se hem i “Amen ya”? Nem ya i mekem se mesej blong hem i hevi, i impoten moa. Wod ya “amen” i kamaot long wan Hibru wod we i minim “sua,” “i mas olsem.” Man i save talem amen long en blong prea blong soemaot se hem i agri long ol toktok blong prea ya. (1 Korin 14:16) Bilif blong Jisas we i stretgud olgeta mo ded blong hem i mekem se ol gudfala promes blong Jeova oli sua blong kamtru. Taswe Jisas i olsem “Amen ya.” (2 Korin 1:20) I stat long taem we Jisas i ded, i stret nomo we ol prea oli go long Jeova tru long Jisas.—Jon 15:16; 16:23, 24.

5. ?Olsem wanem Jisas i “tru wetnes ya we i no save tanem tok blong hem”?

⁵ Mo tu, Jisas i “tru wetnes ya we i no save tanem tok blong hem.” Jisas we hem i wosip long Jeova God nomo, hem i tru olgeta long evri samting. Taswe plante profet tok i joenem Jisas wetem trutok, stret fasin, mo fasin blong fasgud oltaem long God. (Ol Sam 45:4; Aesea 11:4, 5; Revelesen 1:5; 19:11) Jisas i nambawan Wetnes blong Jeova. Hem i “faswan long olgeta samting we God i wokem.” Taswe Jisas i stap talemaot paoa mo haenem blong God, i stat long taem we evri samting i jes stat nomo, kam kasem naoia. (Proveb 8:22-30) Taem hem i kam long wol olsem wan man nomo, hem i wetnes long trutok. (Jon 18:36, 37; 1 Timote 6:13) Taem hem i laef bakegen long ded, hem i promes blong givim tabu speret long ol disaepol blong hem. Hem i se: “Bambae yufala i mas go [wetnes long] mi long Jerusalem, mo long olgeta ples long Judia mo Sameria, gogo i finisim olgeta ples long wol.” I stat long Pentekos long 33 K.T., Jisas i lidim olgeta Kristin ya we tabu speret i makemaot olgeta, nao oli talemaot gud nyus “long olgeta man long wol.” (Ol Wok 1:6-8; Kolosi 1:23) Tru ya, Jisas i nafgud blong tekem nem ya se tru wetnes we i no save tanem tok blong hem. Sipos ol Kristin long Laodisia we tabu speret i makemaot olgeta oli lesingud long ol tok blong Jisas, oli save kasem gudfala frut from.

6. (a) ?Jisas i talem se ol man long kongregesen blong Laodisia oli olsem wanem long saed blong speret? (b) ?Wanem gudfala eksampel blong Jisas we ol Kristin long Laodisia oli no folem?

⁶ ?Jisas i talem wanem mesej long ol man Laodisia? Hem i no talem wan gudfala tok blong leftemap tingting blong olgeta. Hem i tok stret nomo long olgeta, i se: “Mi mi save finis fasin blong [yu]. Long ol wok blong [yu], i olsem we [yu yu] no hot, mo [yu yu] no kol tu. Sipos [yu yu] hot gud no [yu yu] kol gud, hemia i moa gud, bambae mi mi moa glad long [yu]. Be from we [yu yu] hafhaf nomo, olsem we [yu yu] no hot gud, [yu yu] no kol gud, bambae mi finis long [yu], olsem we mi traot, nao [yu yu] kamaot long maot blong mi.” (Revelesen 3:15, 16) ?Sipos yu yu stap long kongregesen ya mo yu harem mesej ya blong Masta Jisas Kraes, bambae yu yu tingting olsem wanem? ?Yu ting se mesej ya i mas wekemap tingting blong yu, nao yu skelemgud yu wan? Tru ya, ol man ya long Laodisia oli mas wekemap tingting blong olgeta, from we olgeta oli kam les man finis long saed blong speret. Oli no gat tangkyu, oli no tinghevi nating long saed blong speret. (Skelem 2 Korin 6:1.) From we olgeta oli Kristin man, oli mas folem eksampel blong Jisas. Oltaem hem i wok strong long wok blong Jeova, olsem we faea i laet long hem. (Jon 2:17) Mo tu, olgeta we oli gat tingting daon oli luksave se oltaem Jisas i gat kaen mo kwaet fasin. Fasin ya i mekem olgeta oli haremgud olsem we wan kap kolwora i mekem man i haremgud long hot taem. (Matyu 11:28, 29) Be ol Kristin long Laodisia oli no hot gud mo oli no kol gud. Olgeta oli olsem wora ya we i ron i kam kasem taon blong olgeta. Oli hafhaf nomo long saed blong speret. From samting ya, maet bambae Jisas i finis long olgeta, ‘olsem we hem i traot, nao oli kamaot long maot blong hem.’ Oltaem yumi mas traehad blong folem eksampel blong Jisas. Yumi mas wok strong blong mekem ol narafala oli haremgud long saed blong speret, olsem we oli dring kolwora.—Matyu 9:35-38.

“[Yu Yu] Stap Talem Se [Yu Yu] Rijman”

7. (a) ?Olsem wanem Jisas i soemaot stampa blong ol trabol blong ol Kristin long Laodisia? (b) ?From wanem Jisas i talem se ol Kristin long Laodisia oli ‘blaen mo neked’?

⁷ ?Wanem i stampa blong trabol ya blong ol Kristin long Laodisia? Nekis tok blong Jisas i givhan long yumi blong luksave: “Tok blong [yu], [yu] stap talem se [yu yu] rijman, [yu yu] gat evri samting, [yu yu] no sot long wan samting, be [yu] no save. [Yu yu] puaman we [yu yu] trabol gud, we olgeta man oli save sore long [yu], we ae blong [yu] i blaen mo bodi blong [yu] i neked.” (Revelesen 3:17; skelem wetem Luk 12:16-21.) Olgeta oli stap long wan rij taon. From samting ya, oli ting se oli no sot long wan samting. Ating ol pleplei long ol bigfala stad, mo ol sinema, mo ol spot oli gat paoa long fasin blong laef blong olgeta. Nao oli kam olsem ol “man we oli wantem tumas ol samting we oli stap harem gud long hem, i winim we oli stap laekem God.”a (2 Timote 3:4) Nating we ol man Laodisia oli rijman long saed blong bodi, be oli puaman long saed blong speret. Oli hivimap smol nomo long ol ‘gudgudfala samting long heven.’ No ating oli no hivimap wan gudfala samting nating. (Matyu 6:19-21) Oli no mekem ae blong olgeta i kliagud. Oli no putum Kingdom blong God i stap fas ples long laef blong olgeta. Oli rili stap long tudak, oli blaen, we oli no save lukluk nating long saed blong speret. (Matyu 6:22, 23, 33) Mo tu, nating we oli save pem plante gudfala klos wetem mane blong olgeta, be Jisas i luk olgeta olsem we oli neked nomo. Oli no stap werem klos long saed blong speret blong soemaot se oli Kristin man.—Skelem wetem Revelesen 16:15.

8. (a) ?Olsem wanem samting ya we i kamaot long Laodisia bifo i stap kamaot plante taem tede? (b) ?Sam Kristin oli gyaman long olgeta nomo, nao oli mekem wanem blong folem griri fasin blong wol ya?

⁸ !Samting ya i nogud tumas! ?Be yu yu luk we samting ya i kamaot plante taem tede tu? ?Wanem stampa risen blong samting ya? Samting ya i kamaot taem man i ting se hem i naf blong lidim hem wan. Hem i dipen nomo long ol samting blong hem long saed blong bodi mo mane blong hem. Olsem ol man we oli stap go long ol gyaman Kristin skul, sam man blong Jeova tu oli stap gyaman long olgeta nomo. Oli ting se oli save mekem God i glad sipos oli go long sam miting blong kongregesen nomo. Oli ting se i naf we oli mekem sam smol samting nomo blong soemaot se oli stap mekem “ol samting we tok ya [blong God] i talem.” (Jemes 1:22) Nating we grup ya we i olsem Jon bifo, oli stap talem bakegen plante woning long saed ya, be oli no lesin. Oli wantem pem ol gudfala klos, trak, mo haos. Ol pleplei mo ol samting we oli save haremgud long hem nomo, oli kam ol bigfala samting long laef blong ol. (1 Timote 6:9, 10; 1 Jon 2:15-17) From samting ya, oli no moa luksave klia long saed blong speret. (Hibrus 5:11, 12) Oli no mas hafhaf long saed blong speret, olsem we oli stap les nomo. Olgeta i mas mekem “faea blong speret” i laet bakegen long olgeta. Mo oli mas soemaot se oli glad mo oli wantem “talemaot tok” blong God.—1 Tesalonaeka 5:19, NW; 2 Timote 4:2, 5.

9. (a) ?Wanem tok blong Jisas i mas mekem ol Kristin we oli hafhaf long saed blong speret oli sek? ?From wanem? (b) ?Olsem wanem kongregesen i save givhan long ol “sipsip” we oli lusum rod?

⁹ ?Ol Kristin man we oli no hot gud mo oli no kol gud tu, Jisas i tingbaot olgeta olsem wanem? Stret tok we Jisas i talem i mas mekem olgeta oli sek: “Be [yu] no save. [Yu yu] puaman we [yu yu] trabol gud, we olgeta man oli save sore long [yu], we ae blong [yu] i blaen mo bodi blong [yu] i neked.” Voes blong hat blong olgeta i no moa stikim olgeta, i olsem we hem i ded nomo. Taswe oli no luksave nogud samting ya we i stap hapen long olgeta. (Skelem Proveb 16:2; 21:2.) Samting ya i nogud tumas. Kongregesen i mas tinghevi long samting ya, oli no mas mekem olsem we oli no kea. Ol elda mo ol narafala tu we ol elda oli yusum blong givhan long olgeta, oli mas givim wan gudfala eksampel. Oli mas lukaotgud long kongregesen long lav, mo oli mas faerap long wok blong Jeova. Olsem ya nao, maet oli wekemap tingting blong ol “sipsip” we oli lusum rod, nao oli save mekem wok blong Jeova wetem ful hat blong olgeta bakegen, mo oli save kasem sem glad we oli bin kasem fastaem.—Luk 15:3-7.

Wan Advaes Blong Oli Save ‘Kam Rijman Tru’

10. ?Jisas i talem long ol Kristin long Laodisia se oli mas pem wanem “gol” long hem?

¹⁰ ?I gat wan samting we i save winim sik ya blong ol man long Laodisia? Yes, ol Kristin ya oli mas folem advaes ya blong Jisas: “Mi talem stret long [yu], [yu] mas pem gol long mi we oli bonem finis long faea blong mekem i klin gud, nao bambae [yu yu] kam rijman tru.” (Revelesen 3:18a) Trufala “gol” blong Kristin man, we oli bonem long faea blong tekemaot ol doti long hem, bambae hem i mekem olgeta oli ‘rijman long fes blong God.’ (Luk 12:21) ?Weples olgeta oli save pem gol olsem? I no long bang long taon blong olgeta, no gat. !Oli mas pem long Jisas! Aposol Pol i eksplenem mining blong gol ya. Hem i talem long Timote blong givim oda long ol Kristin man we oli rijman se “oli mas stap mekem ol gudfala fasin, mo oli mas kam olsem we oli rijman long ol gudfala wok. Oli mas gat gladhat blong givhan long ol man, mo blong seraot ol samting blong olgeta. Long fasin ya, i olsem we oli stap putumgud plante gudfala samting, i olsem we oli stap wokem wan fandesen blong laef, we i save stap strong oltaem.” Oli mas traehad blong mekem olsem. Long rod ya nomo, “bambae oli save kasem laef ya we i prapa wan.” (1 Timote 6:17-19) Ol man long Laodisia we oli rij long saed blong bodi oli mas folem advaes ya blong Pol, nao oli save kam rij long saed blong speret.—Lukluk long Proveb 3:13-18.

11. ?Hu ya samfala tede we oli pem ‘gol we oli bonem finis long faea blong mekem i klin gud’?

¹¹ ?I gat sam man tede we oli pem ‘gol we oli bonem finis long faea blong mekem i klin gud’? !Yes, i gat! Taem dei blong Masta i no stat yet, wan smol grup blong ol Baebol studen oli luksave se plante tijing blong ol skul blong Krisendom oli gyaman nomo. Ol tijing ya oli kamaot long Babilon fastaem, olsem Triniti, sol i no save ded, helfaea, baptaes blong ol bebi, mo wosip blong ol aedol (wosip blong kros mo Meri tu). Ol Kristin ya oli leftemap trutok blong Baebol nomo. Oli talemaot Kingdom blong Jeova se hem nomo hem i hop blong ol man. Mo laef blong Jisas we hem i givim blong pemaot ol man, hem nomo i save sevem yumi. Kolosap 40 yia bifo long 1914, oli talemaot profet tok blong Baebol we i makem 1914 se hem i en blong rul blong ol ‘Jentael’ nesen.b Oli talemaot se paoa blong ol man mo ol skul tu bambae i seksek.—Revelesen 1:10; Luk 21:24-26, King James Version.

12. ?Taem ol Kristin ya oli stat blong luksave ol trutok, hu ya wan long olgeta we i lidim olgeta? ?Wanem nambawan eksampel blong hem, olsem wanem blong hivimap ol gudgudfala samting long heven?

¹² Charles Taze Russell i lidim ol Kristin ya we oli stat blong luksave ol samting ya. Jes biaen long 1870, long Alegeni (naoia hem i haf blong Pitasbeg), Pensylvania, Amerika, hem i hivimap wan smol grup, nao oli stadi Baebol. Taem Russell i stat blong lukaotem trutok, hem i gat wan bisnes wetem papa blong hem. Hem i stap kam wan rijman, mo sipos hem i gohed, bambae hem i save kasem sam milyan dola. Be hem i salem ol stoa blong hem. Mo hem i yusum mane blong hem blong mekem tok blong Kingdom blong God i go long plante ples long wol. Long 1884, Russell i kam faswan presiden blong kampani we naoia oli kolem Watch Tower Bible and Tract Society of Pennsylvania. Long 1916, hem i mekem laswan trep blong hem blong prij long wes saed blong Amerika. Bodi blong hem i taed tumas, ale taem hem i stap gobak long Nyu Yok long tren, hem i ded, kolosap long taon ya Pampa, long Teksas. Hem i givim wan nambawan eksampel olsem wanem blong hivimap ol gudgudfala samting long saed blong speret long heven. Mo long taem blong yumi, plante handred taosen paenia we oli rere blong livim sam samting we olgeta nomo oli wantem, oli folem eksampel blong hem.—Hibrus 13:7; Luk 12:33, 34; skelem wetem 1 Korin 9:16; 11:1.

Long Saed Blong Speret Oli Mas Putum Meresin Long Ae

13. (a) ?Olsem wanem meresin blong ae long saed blong speret i save givhan long ol man Laodisia? (b) ?Jisas i talem se oli mas pem wanem kaen klos? ?From wanem?

¹³ Nao Jisas i tok strong long ol man Laodisia i se: “[Yu] mas pem waet klos . . . , nao bambae bodi blong [yu] i no moa neked, [yu yu] no moa save sem. Mo [yu] mas pem meresin long mi blong putum long ae blong [yu], nao bambae ae blong [yu] i no moa blaen, [yu yu] save lukluk.” (Revelesen 3:18b) Olgeta oli blaen long saed blong speret. Taswe oli mas pem meresin blong ae blong traem mekem ae blong olgeta i kamgud bakegen. Hemia i no meresin we ol dokta long taon ya oli givim, no gat. Jisas nomo i save givim meresin ya. Bambae meresin ya i givhan long olgeta blong luksave ol impoten samting long saed blong speret. Bambae hem i halpem olgeta blong wokbaot long “rod blong ol stret man,” nao oli save lukluk i go long wil blong God nomo. (Proveb 4:18, 25-27) Olsem nao, oli mas putum gudfala “waet klos.” Hemia i no ol sas klos we oli wokem long blak hea blong sipsip long Laodisia nomo. ‘Waet klos ya’ i makem olgeta se oli man blong Jisas Kraes.—Skelem wetem 1 Timote 2:9, 10; 1 Pita 3:3-5.

14. (a) ?I stat long 1879, ol man oli save kasem wanem meresin blong ae long saed blong speret? (b) ?Hu nomo i stap givim inaf mane long ol Wetnes blong Jeova blong gohed long wok blong olgeta? (c) ?Ol Wetnes blong Jeova oli yusum mane long wanem fasin we i defren long ol narafala skul?

¹⁴ ?Long taem blong yumi, i gat meresin blong ae long saed blong speret? !Yes, i gat! Long 1879, Pasta Russell (ol man oli givim nem ya long hem from we oli laekem hem) i stat prentem wan magasin we i leftemap trutok. Nem blong magasin ya tede: Wajtaoa We i Talemaot Kingdom Blong Jeova. Long seken namba blong hem, hem i talem se: “Mifala i bilif se JEOVA nomo i sapotem [Wajtaoa]. Taswe neva bambae mifala i fosem no askem ol man blong givim mane blong sapotem wok ya. Jeova i talem se: ‘Olgeta gol mo selva long ol bigfala hil oli blong mi nomo.’ Sipos long fyuja hem i no moa givim naf mane blong mifala i gohed long wok ya, bambae mifala i save se hemia nao stret taem blong finis long wok blong prentem magasin ya.” Long taem blong yumi, sam prija we oli tok long televisin oli kasem fulap mane from. Oli no sem blong stap long haos we i flas bitim mak, mo sam long olgeta oli no sem long rabis fasin blong olgeta tu. (Ridim Revelesen 18:3.) Ol Baebol Studen no ol Wetnes blong Jeova tede, oli gat narakaen fasin. Oli no strong blong askem mane long ol man. Be oli yusum mane we ol man oli givim nomo, blong ogenaesem wok blong prij mo mekem gud nyus blong Kingdom blong Jeova i go moa long olgeta ples long wol. Kam kasem tede, grup ya we i olsem Jon bifo i lidim wok ya blong prentem Wajtaoa mo Wekap! Long 1990, evritaem we nyufala namba blong tufala magasin ya i kamaot, oli seremaot bitim 27 milyan kopi blong tufala. Oli prentem Wajtaoa long bitim 100 lanwis. Moa long fo milyan Kristin man oli stap yusum magasin ya blong putum meresin long ae blong olgeta long saed blong speret. Olsem nao, oli no moa blaen, oli luksave ol gyaman skul mo oli luksave nid blong talemaot gud nyus long olgeta nesen.—Mak 13:10.

Panis Mo Fasin Blong Stretem i Karem Gudfala Frut

15. ?From wanem Jisas i tok strong long ol Kristin long Laodisia? ?Kongregesen i mas mekem wanem nao?

¹⁵ Nao yumi tingbaot ol man Laodisia bakegen. ?Jisas i talem ol strong advaes ya long olgeta, nao oli mekem wanem? ?Tingting blong olgeta i foldaon? ?Oli ting se Jisas i no moa wantem we oli folem hem? No gat. Mesej blong hem i gohed olsem: “Long olgeta man we mi laekem olgeta tumas, mi mi stap tok strong long olgeta, mo mi stap givim panis long olgeta. From samting ya, [yu] mas traehad blong tanem tingting blong [yu] from ol sin blong [yu].” (Revelesen 3:19) Jeova i stretem ol man we hem i laekem. Jisas tu i mekem olsem. (Hibrus 12:4-7) Kongregesen blong Laodisia oli mas harem ol kaengud advaes blong hem, mo mekem i wok long laef blong ol. Oli mas tanem tingting blong olgeta from ol sin blong olgeta. Oli mas luksave se tingting we i hafhaf long saed blong speret hem i wan sin. (Hibrus 3:12, 13; Jemes 4:17) Ol elda long kongregesen oli mas lego ol fasin blong lukaot ol samting long saed blong bodi nomo. Oli mas mekem paoa we God i givim long olgeta ‘i strong bakegen olsem wan faea.’ Taem meresin blong ae i stap wok blong winim sik blong olgeta long saed blong speret, evriwan long kongregesen i save haremgud olsem we oli dring springwora we i kolkol gud.—2 Timote 1:6; Proveb 3:5-8; Luk 21:34.

16. (a) ?Olsem wanem Jisas i stap soemaot lav mo fasin kaengud tede? (b) ?Sipos yumi kasem sam strong advaes samtaem, yumi mas mekem wanem?

¹⁶ ?Olsem wanem long yumi tede? Naoia tu Jisas i “laekem tumas ol man blong hem, we olgeta oli stap long wol ya.” Bambae hem i stap mekem olsemia “oltaem, gogo wol ya i finis.” (Jon 13:1; Matyu 28:20) Jisas i stap soemaot lav mo fasin kaengud tru long grup ya we i olsem Jon bifo, mo tru long ol sta no elda long kongregesen. (Revelesen 1:20) Naoia laef i strong tumas. Be ol elda oli wantem tumas blong givhan long yumi evriwan, ol olfala mo ol yangfala tu. Oli wantem se yumi stap insaed long ogenaesesen blong God, mo yumi agensem fasin independen, fasin blong wantem plante samting, mo ol rabis fasin blong wol. Sipos yumi kasem sam strong advaes no panis samtaem, yumi mas tingbaot se ‘olgeta tok we oli stretem yumi oli rod blong laef.’ (Proveb 6:23) Yumi evriwan i sinman. Yumi mas tanem tingting blong yumi from ol sin blong yumi. Olsem nao, yumi save stretem rod blong yumi, mo God i save laekem yumi.—2 Korin 13:11.

17. ?Olsem wanem mane i wan denja long saed blong speret?

¹⁷ Yumi no mas letem fasin blong wantem plante tumas samting, no mane, no fasin pua i mekem se yumi hafhaf long saed blong speret. Mane i save openem plante rod blong yumi mekem wok blong Jeova i go moa. Be mane i wan denja tu. (Matyu 19:24) Man we i gat plante mane i save ting se hem i no nidim blong wok strong long wok blong prij. Hem i save ting se sipos hem i givim plante mane lelebet blong givhan long wok ya, hemia nomo i naf. No maet hem i ting se from we hem i gat plante mane, hem i moa hae long ol narafala. Mo tu, man we i gat bigfala mane i save joen long plante kaen pleplei we ol narafala oli no save joen long olgeta from we oli pua moa. Be ol pleplei ya oli westem taem. Maet man i no luksave, be oli save mekem hem i no moa tinghae long minista wok blong ol Kristin. Olsem nao, oli save mekem hem i hafhaf nomo long saed blong speret. Yumi mas blokem ol trap olsem. Yumi mas ‘traehad tumas mo yumi mas stap hadwok’ wetem ful hat blong yumi, nao yumi save kasem laef ya we i no save finis long fyuja.—1 Timote 4:8-10; 6:9-12.

‘Kakae Blong Sapa Wetem Hem’

18. ?Jisas i givim wanem jans long ol Kristin long Laodisia?

¹⁸ Jisas i gohed moa i se: “[Yu] luk. Mi mi stap stanap long doa, mi stap kilkilim doa. Sipos wan man i harem tok blong mi, i openem doa, mi bambae mi kam insaed long haos blong hem, mi kakae wetem hem [mi tekem kakae blong sapa wetem hem, “NW”], mo hem bambae i kakae wetem mi.” (Revelesen 3:20) Sipos ol Kristin long Laodisia oli mekem welkam long Jisas long kongregesen blong olgeta, hem i save givhan long olgeta blong stretem fasin ya, we oli hafhaf long saed blong speret.—Matyu 18:20.

19. ?Taem Jisas i promes blong tekem kakae blong sapa wetem kongregesen blong Laodisia, i olsem we hem i promes blong mekem wanem?

¹⁹ Taem Jisas i tokbaot kakae, ol man Laodisia oli mas tingbaot plante taem we Jisas i kakae wetem ol disaepol blong hem bifo. (Jon 12:1-8) Olgeta we oli stap long taem ya oli haremgud long saed blong speret from. Taem Jisas i laef bakegen long ded, hem i kakae wetem ol disaepol blong hem bakegen. Samting ya i mekem olgeta oli kam strong moa long saed blong speret. (Luk 24:28-32; Jon 21:9-19) Taswe promes blong hem blong kam kakae wetem olgeta long kongregesen blong Laodisia, hem i olsem wan promes blong mekem olgeta oli haremgud long saed blong speret. Be fastaem, olgeta oli mas mekem welkam long hem.

20. (a) ?Long stat blong dei blong Masta, wanem i kamaot from we ol gyaman Kristin skul oli hafhaf long saed blong speret? (b) ?Wanem i kamaot long Krisendom from we Jisas i jajem hem finis?

²⁰ Jisas i givim gudfala advaes ya long ol man Laodisia, from we hem i laekem olgeta tumas. Tede, advaes ya i gat bigfala mining long smol kampani blong ol Kristin we tabu speret i makemaot olgeta. Sam long olgeta oli save tingtingbak long stat blong dei blong Masta. Long taem ya, ol lida blong Krisendom oli hafhaf long saed blong speret, i bitim mak. Taem Masta i kambak long 1914, oli no rere. Long defren fasin, oli kilim ol narafala man i ded long Faswan Bigfala Faet Blong Wol ya. I gat 28 nesen i joen long faet ya, mo 24 long olgeta oli talem se oli Kristin nesen. !Man, oli rili gat kaon from blad blong ol man ya! Namba Tu Bigfala Faet Blong Wol, hem tu i kamaot long medel blong ol nesen blong Krisendom. Ale bakegen ol sin blong ol gyaman skul ya oli “hivap i go kasem heven.” (Revelesen 18:5) Mo tu, ol lida blong ol skul ya oli tanem baksaed long Kingdom blong Jeova we i stap kam. Oli sapotem Ligofnesen mo Yunaeted Nesen, mo ol stronghed grup we oli blong leftemap kantri blong olgeta nomo. I no gat wan long olgeta ya we i save winim ol trabol long wol. Longtaem finis, Jisas i tanem baksaed long ol lida ya blong ol skul ya. Hem i jajem olgeta finis. Hem i sakemaot olgeta, olsem we man blong pulum fis i sakemaot ol fis we oli nogud. Ol trabol we i stap kamaot long ol skul blong Krisendom naoia i stap soemaot se Jisas i jajem olgeta finis. !Panis we bambae oli kasem i wan woning long yumi!—Matyu 13:47-50.

21. ?I stat long 1919 i go, olsem wanem ol Kristin long trufala kongregesen oli harem tok we Jisas i talem long ol Kristin long Laodisia?

²¹ Insaed long trufala kongregesen tu, i bin gat sam man we oli hafhaf nomo long saed blong speret. Oli olsem wora we i no hot gud mo i no kol gud. Be Jisas i laekem kongregesen blong hem yet. Hem i rere blong givhan long ol Kristin we oli wantem mekem i gud long hem, olsem we oli singaot hem i kam tekem kakae blong sapa wetem olgeta. From samting ya, i stat long 1919 i go, i olsem we ae blong olgeta i open. Oli luksave mining blong plante profet tok blong Baebol. Nao oli haremgud from we oli kasem save long plante samting.—Ol Sam 97:11; 2 Pita 1:19.

22. ?Maet Jisas i stap tingbaot wanem lafet long fyuja? ?Hu olgeta we bambae oli joen long lafet ya?

²² Long tok ya blong Jisas long ol man Laodisia, maet hem i stap tingbaot wan narafala kakae tu. Biaen, long Revelesen hem i talem se: “Olgeta we God i singaot olgeta blong kam sidaon long kakae blong mared blong Smol Sipsip ya, oli save harem gud.” Hemia i bigfala lafet we bambae i kamaot afta we Jeova i mekem jajmen blong hem i kamtru long ol gyaman skul. Bigfala lafet ya i blong presem Jeova from we hem i win. Bambae Kraes tu i joen long lafet ya. Mo fulnamba blong 144,000 we oli olsem waef blong hem, olgeta tu bambae oli joen long lafet ya long heven. (Revelesen 19:1-9) Ol memba blong kongregesen blong Laodisia bifo, we oli harem tok blong Jisas, bambae oli tekem kakae blong sapa wetem hasban blong olgeta. Mo ol trufala brata blong Jisas Kraes tede tu, we oli stap werem ‘klin klos’ blong makem olgeta se oli tru Kristin we tabu speret i makemaot olgeta, olgeta tu bambae oli joen long lafet ya. (Matyu 22:2-13) !Hemia i bigfala risen blong wok strong mo blong tanem tingting from sin!

Jea Blong King Blong Olgeta We Oli Win

23, 24. (a) ?Wanem narafala presen long fyuja we Jisas i tokbaot? (b) ?Wetaem Jisas i sidaon long jea blong Mesaea king? ?Wetaem hem i stat blong jajem ol man we oli talem se oli Kristin? (c) ?Taem Jisas i mekem Lodsapa wetem ol disaepol blong hem, hem i mekem wanem gudfala promes long olgeta?

²³ Nao Jisas i tokbaot wan narafala presen long fyuja, i se: “ ‘Mi mi win long faet blong mi finis, nao mi stap sidaon wetem Papa blong mi [long jea blong king blong hem] blong joen long hem long haenem blong hem. Mo long sem fasin, bambae mi mi givim raet long olgeta we bambae oli win long faet blong olgeta, blong oli kam sidaon wetem mi [long jea blong king blong mi], blong joen long mi long haenem blong mi.’ ” (Revelesen 3:21) From strong bilif blong hem, Jisas i winim wol ya. Long 33 K.T. hem i laef bakegen long ded. Stret long profet tok blong Deved long Ol Sam 110:1, 2, Papa blong hem i leftemap hem i go long heven blong i sidaon wetem hem long jea blong king blong hem. (Ol Wok 2:32, 33) 1914 i wan impoten yia tu. Long yia ya, Jisas i sidaon long prapa jea blong hem, blong hem i rul olsem Mesaea King mo Jaj. Long 1918, jajmen blong ol man we oli talem se oli Kristin i stat. Ol man we oli ded bifo long taem ya, we tabu speret i makemaot olgeta nao oli win long faet blong olgeta, oli laef bakegen, nao oli go joen wetem Jisas long Kingdom blong hem. (Matyu 25:31; 1 Pita 4:17) Taem hem i mekem Lodsapa wetem ol disaepol blong hem, hem i promes long olgeta se bambae i olsem. Hem i se: “Nao olsem we Papa blong mi i putumap mi blong bambae mi king, mi tu mi putumap yufala blong bambae yufala i save sidaon wetem mi blong kakae mo dring wetem mi [long Kingdom blong mi, NW]. Mo long taem ya, bambae yufala tu i gat ol gudfala jea blong yufala, olsem jea blong king. [Nao bambae yufala i sidaon long ol jea blong king, yufala i jajem ol twelef laen blong ol man Isrel, NW].”—Luk 22:28-30.

²⁴ !Wan nambawan wok ya! “Long taem blong wokem ol samting bakegen,” oli save rul wetem King ya. Oli save givhan long hem blong yusum stret sakrifaes blong hem, blong mekem ol man we oli obei oli kam stretgud olgeta long wan paradaes olsem Iden bifo. (Matyu 19:28, NW; 20:28) Olsem Jon i talem finis long yumi, Jisas bambae i mekem ol man we oli win oli kam “wan kingdom, ol pris blong Papa blong hem.” Bambae oli sidaon long ol jea blong king we oli stap raon long bigfala jea blong Jeova long heven. (Revelesen 1:6, NW; 4:4) Yumi evriwan, nating sipos yumi wan long olgeta we tabu speret i makemaot no yumi blong grup ya we bambae oli stap long Paradaes long wol long fyuja, yumi mas harem ol tok blong Jisas long ol man Laodisia.—2 Pita 3:13; Ol Wok 3:19-21.

25. (a) ?Olsem ol narafala sikis mesej we Jisas i sanem finis, wanem lastok blong hem long kongregesen blong Laodisia? (b) ?Tede ol Kristin wanwan oli mas mekem wanem taem oli harem tok blong Jisas long kongregesen blong Laodisia?

²⁵ Lastok blong mesej ya i sem mak long lastok blong ol narafala mesej we Jisas i talem finis. Hem i se: “Man we i gat sora blong hem, i mas lesingud long tok we Tabu Speret i stap talem long ol [kongregesen].” (Revelesen 3:22) Longtaem finis yumi stap long ‘taem blong en’ blong wol ya. Ol samting we oli kamaot raonabaot long yumi oli soemaot klia se lav blong ol skul blong Krisendom i kolkol nomo. Ol tru Kristin oli mas defren. Oli mas obei long ol samting we Jisas i talem long kongregesen blong Laodisia, mo long ol mesej we hem i sanem long ol sikis narafala kongregesen tu. Yumi save mekem olsem sipos yumi wok strong blong mekem bigfala profet tok ya blong Jisas i kamtru, i se: “Mo gud nyus ya blong Kingdom, bambae oli talemaot long olgeta ples long wol we i gat man long hem, blong oli wetnes long olgeta nesen. Nao biaen, en bambae i kam.”—Matyu 24:12-14, NW.

26. ?Jisas i no moa toktok stret long Jon long Revelesen gogo wetaem? ?Be hem i joen long wanem?

²⁶ Ol advaes we Jisas i givim long ol seven kongregesen i finis long ples ya. Hem i no moa toktok stret long Jon gogo laswan japta long Revelesen. Be hem i joen long plante vison, olsem taem hem i mekem ol jajmen blong Jeova oli kamtru. Nao yumi joen wetem grup ya we oli olsem Jon bifo blong luklukgud long seken gudfala vison we Masta Jisas Kraes i givim long Jon.

[Ol Futnot]

[Bokis blong pija long pej 73]

Fasin Blong Wantem Tumas Samting i Agensem Waes

Long 1956, wan man blong raetem store long nyuspepa i talem se: “Oli faenemaot se wan handred yia bifo, man i wantem 72 samting. Hem i nidim 16 nomo blong olgeta ya. Tede, i gat 474 samting we man i wantem. Hem i nidim 94 blong olgeta ya nomo. Wan handred yia bifo, ol man oli salem 200 defren kaen samting. Tede oli salem 32,000 defren kaen samting. Ol nid blong man oli smol nomo. Be ol samting we hem i wantem, i no gat en blong olgeta.” Tede, wol i leftemap tingting ya se mane mo olting blong olgeta oli bigfala samting long laef. Taswe plante man oli no moa harem waes advaes blong Eklesiastis 7:12, se: “Waes i blong lukaotgud long man olsem we mane i blong lukaotgud long man. Be save i moa gud i winim mane, from we waes i save sevem laef blong man we i kasem hem.”

[Tok Blong Pija Long Pej 67]

Taem wora i kasem Laodisia hem i no hot gud mo hem i no kol gud. Ol Kristin long Laodisia oli gat fasin we i hafhaf nomo long saed blong speret