Yumi Holem Bilif Long God Mo Long Kraes

Ol Stampa Poen Blong Kolosi

SIPOS yumi wantem stap sefgud, i impoten tumas we yumi putum bilif blong yumi long Jeova God mo Jisas Kraes. Be i luk olsem we fasin blong stanap strong long bilif i no isi. Ol Kristin blong Kolosi, wan taon long is blong Efesas long Esia Maena, olgeta tu oli luksave poen ya. ?From wanem i hadwok olsem? I strong from we sam gyaman tija oli talem se man i mas sakomsaes, hem i mas kakae sam kaen kakae nomo, mo hem i mas obei long ol rul we olgeta nomo oli putumap. Oli gyaman se sipos man i folem gud ol samting ya, bambae God i save sevem hem from.

Taswe, yumi save nao from wanem aposol Pol i wantem halpem ol Kristin man long Kolosi long saed blong speret mo hem i wantem tumas we olgeta oli gohed nomo blong bilif strong long God mo long Kraes. Ale, long faswan taem we hem i go long kalabus long Rom (raonabaot long yia 60-61 K. T.), taem we kolosap hem i gofri, hem i raetem leta blong hem long ol Kristin long Kolosi. Hem i raetem leta ya blong putum long klia ples ol rong tingting we sam man i gat. Mo tru long leta ya, Pol i gat plan blong mekem bilif blong ol Kristin ya i kam strong moa. Naoia, yumi save tingbaot bakegen ol gudfala tok we Pol i talem, ale yumi traem luk olsem wanem ol tok ya oli save halpem yumi tede.

Yumi Harem Gud From Wok We Kraes i Mekem

Long stat blong leta blong hem nomo, Pol i soemaot se hem i tinghae long wok we Jisas i stap mekem. (1:1 kasem 2:12) Hem i leftemap ol man Kolosi from we oli bilif long Kraes mo oli laekem tumas ol brata blong olgeta long bilif. Pol i talem tu se Kraes hem i hed blong olgeta samting we God i mekem, mo olgeta narafala samting God i mekem olgeta long rod blong Kraes. God i putumap Jisas i olsem Hed blong kongregesen, mo hem i faswan man blong girap bakegen long ded. Sipos ol man oli putum bilif blong olgeta long Jisas Kraes, bambae oli save joen gud wetem God, from we God i haedem olgeta gudfala samting blong waes mo save blong hem long Kraes nomo. Taem yumi tingtinggud long ol poen ya, i klia nomo se ol Kristin oli mas folem gud ol trak blong Jisas be oli no mas letem wan man i pulum olgeta blong oli folem ol waes tingting blong man nomo.

God i yusum Jisas Kraes blong finisim Loa we hem i bin givim long Moses. (2:​13-23) Sipos yumi yusum pija tok, i olsem we Jisas Kraes i nilim Loa blong Moses long pos we hem i ded long hem. Ol samting we ol man oli mas mekem blong obei long Loa oli olsem “sado nomo blong samting we i no kamtru yet. Be prapawan blong hem, ol samting we oli stap long Kraes.” Taswe, sipos oli fasgud long Kraes, bambae oli no letem wan man nating i blokem olgeta, blong oli kasem laef we i no save finis samtaem long heven.

Yumi Glad long God Mo Kraes

Pol i pulum tingting blong ol Kristin man blong Kolosi se oli mas jenisim ol olfala fasin blong ol, ale oli gat nyufala laef mo oli mas stap aninit long rul blong Jisas Kraes. (3:​1-17) Be sipos oli stap tingbaot ol samting we Pol i talem, bambae oli putum ol samting long saed blong speret fastaem long laef blong olgeta. Samting ya i min se bambae oli no save agri long ol rong tingting mo bambae oli agensem ol krangke toktok. !Sipos oli folem ol gudfala fasin, olsem fasin blong sore long ol man, fasin blong mekem tingting blong olgeta i stap daon, mo fasin lav, bambae oli save kasem plante gudfala blesing! Sipos oli mekem evri samting blong leftemap nem blong Jisas Kraes, pis ya we Kraes i givim bambae i lukaot gud long hat blong olgeta, mo oli save talem tangkyu long God, tru long hem.

Fasin blong harem glad long Jeova God mo Jisas Kraes i mas pusum ol Kristin blong oli joen gud tugeta. (3:18 kasem 4:18) Ol waef, ol hasban, ol pikinini, ol slef mo ol masta oli mas fraet gud long God taem oli mekem wok blong olgeta, mo oli mas tinghae long wok we Kraes i stap mekem. !Mo tu, yumi mas gohed long ol prea we yumi mekem long God mo yumi mas wok long waes fasin oltaem!

Leta blong Pol long ol man Kolosi i save givhan long yumi blong yumi ronwe long ol gyaman tijing, ale yumi no lusum praes blong laef we i stap long fored blong yumi. Aposol Pol i talem se fasin blong obei long hae rul blong Jeova mo Pikinini blong hem, tufala samting ya i save mekem we yumi gat gudfala fasin long ol narafala. Mo yumi save kasem sam gudfala blesing sipos yumi gohed nomo blong bilif strong long God mo Kraes.

[Bokis/Foto blong pija long pej 10]

Leta Long Ol Man Laodisia: Pol i talem se: “Taem yufala i ridim leta ya blong mi finis, plis yufala i sanem i go long ol man Laodisia, blong oli ridim long ol memba blong jyos long ples ya. Mo long sem fasin, bambae yufala tu i mas ridim leta blong olgeta long Laodisia, long ol memba blong jyos long ples blong yufala.” (Kolosi 4:16) Laodisia i wan rij taon long Wes blong Esia Maena, mo i isi nomo blong ol man Laodisia oli go long ol bigfala taon olsem Filadelfia mo Efesas, from we rod i go kasem ol ples ya. Pol i mekem minista wok blong hem long Efesas, be hem i no go prij long ples ya. Be mesej blong hem i kasem Laodisia. Hem i sanem wan leta i go long ol Kristin long Laodisia, be plante man we oli stadi long ol jyos oli bilif se hemia wan kopi nomo blong leta we hem i raetem long ol Kristin man long Efesas. Leta we Pol i raetem long kongregesen blong Laodisia i no stap long Baebol, maet from we ol poen we leta ya i store long hem yumi no nidim tumas tede, no maet hem i talemaot bakegen sam poen we fulap narafala leta blong Baebol oli talem finis.

[Foto]

Ol hafhaf haos long Laodisia