Japta 7
Blong Wanem Yumi Stap long Wol Ya
1. ?Ol man we oli stap tingtinggud oli talem wanem?
I STAT longtaem finis we ol man oli stap tingbaot mining blong laef ya we oli gat long wol. Oli stap lukluk long bigfala skae we i fulap long ol sta. Oli lukluk long ol gudfala kala taem san i stap godaon. Mo oli laekem tumas ol hil, tri, flaoa mo ol samting olsem we oli stap raonabaot long olgeta. Ol man we oli stap tingtinggud, oli talem we i mas gat bigfala risen blong ol samting ya we oli stap. Be oli no save blong wanem ol man oli stap long wol ya.—Sam 8:3, 4.
2. ?Plante man oli askem wanem kwestin?
2 Kolosap ol man oli askem se: ?Yumi blong stap long ples ya blong smoltaem nomo, blong traem winim plante samting, mo afta yumi ded? ?Rod ya we yumi stap wokbaot long hem, i stap go wea? Man i bon, hem i laef, gogo hem i ded. ?Man i no moa gat narafala hop? (Job 14:1, 2) Blong halpem yumi save long samting ya, yumi mas faenem ansa blong wan narafala kwestin fastaem, hemia nao: ?Olsem wanem yumi kam long wol ya?
?EVOLUSEN I TRU, NO GOD I MEKEM OL SAMTING?
3. ?Wanem tijing ya blong evolusen?
3 Long samfala ples, oli stap tij we ol samting we yumi luk oli kamaot olsem nomo, no maet from laki, be i no gat man i wokem. Mo oli talem we bifo longtaem laef i bin stat long ol smosmol samting, nao plante milyan yia i pas nao sloslou ol samting ya oli jenis oli kam man. Long plante haf blong wol oli stap tijim samting ya, nao oli talem we i tru. Tijing ya oli kolem evolusen. ?Be i tru we yumi kam long ol mangke we oli laef plante milyan yia bifo? ?Wol mo ol sta oli kamaot olsem nomo, no maet from laki?
4. ?Blong wanem yumi save bilif we God i wokem “heven mo wol”?
4 Baebol i talem se: “Fastaem, bifo olgeta, God i wokem heven mo wol.” (Jenesis 1:1) Science tu i agri we heven, wetem plante bilyan sta blong hem, mo wol ya blong yumi, oli bin stat samtaem. I gat wan we i wokem olgeta. Ol sta mo ol planet oli stap ron long stret rod blong olgeta, neva oli mestem. Sipos yumi wantem, yumi save faenemaot rod ya blong wan sta no planet we bambae hem i ron long hem long plante yia long fyuja. Taem ol sta no planet oli stap muv long heven, oli folem loa blong mathematics. Wan bigfala tija blong mathematics blong University blong Cambridge, nem blong hem P. Dirac, i talem long buk ya Scientific American: “Ating yumi save talem we God hem i nambawan blong wokem mathematics, mo Hem i bin yusum ol mathematics we oli strong tumas blong wokem wol, mo heven, mo ol samting we oli stap long hem.”
5. ?Olsem wanem bodi blong yumi i soemaot we God i wokem yumi, yumi no risal blong evolusen?
5 Baebol i talem se: “Yufala i mas save we Jeova hem i God. Hem nao i wokem yumi, i no yumi we i wokem yumi.” (Sam 100:3) Bodi blong yumi i gud tumas, taswe wan man blong raetem Baebol, i talem long God, i se: “Mi mi presem yu, from we bodi blong mi i gud we i gud. . . . Taem yu yu wokem mi long ples haed, yu yu savegud long ol bun blong mi. . . . Mi mi no bon yet, be yu yu luk mi finis. Mo plan blong olgeta haf blong mi, oli stap finis long buk blong yu.” (Sam 139:14-16) Ol bebi oli stap gru long bel blong mama blong olgeta long fasin we i gud tumas. Buk ya Newsweek i talem se: “Hemia i olsem wan merikel. Yumi no save faenemaot wanem i stret taem we bebi i stat [long bel blong mama blong hem]. I no gat wan scientist we hem i naf blong eksplenem wanem gudfala samting ya we i stat blong wokem olgeta haf blong bodi blong bebi.”
6. ?Blong wanem i gud se yumi save bilif we God i bin wokem ol samting, be tijing blong evolusen i krangke nomo?
6 Tingbaot heven wetem ol sta, mo wol ya, mo bodi blong yumi tu, oli wok gud tumas. I krangke nomo blong talem se ol samting ya oli bin kamaot olsem nomo, no olgeta oli wokem olgeta nomo. I mas gat wan Man we i wokem plan fastaem, wan Man we i wokem olgeta. Tingbaot ol samting raonabaot long yu. Taem yu yu stap long haos blong yu, i gud yu yu askem long yu wan, se: ?Des, lam, bed, jea, tebel, wol, mo haos ya, oli kamaot long fasin blong evolusen? ?No i gat man blong wokem olgeta? !I mas gat man we i gat hed we i wokem olgeta ya! ?Sipos i olsem wetem ol samting nating ya, olsem wanem yumi save talem we i no gat Man we i wokem heven wetem ol sta, wol mo yumi? Mo sipos God i putum yumi long wol ya, hem i mas gat risen blong samting ya.
7. (a) ?Olsem wanem Jisas i soemaot se hem i bilif we God i wokem ol samting? (b) ?Wanem moa i soemaot we Adam i rili man?
7 Jisas Kraes i tokbaot fas man mo woman, i se: “Hem we i wokem tufala man blong fastaem, hem i mekem we wan i man mo wan i woman, nao hem i talem se, ‘From samting ya man bambae i aot long papa mo mama blong hem, nao hem i go joen wetem woman blong hem, mo bambae tufala i kam olsem wan bodi nomo.’ ” (Matyu 19:4, 5) Long ples ya Jisas i stap yusum tok we i stap long Jenesis 1:27 mo 2:24, we i tokbaot taem we God i mekem Adam mo Iv. From we Jisas i yusum tok ya, taswe yumi save we store ya blong Jenesis i tru. (Jon 17:17) Mo tu, Baebol i talem we Inok hem i “namba seven long laen blong Adam.” (Jud 14) Sipos Adam i no rili wan man, Baebol i no save tokbaot hem long klia fasin olsem.—Luk 3:37, 38.
8. ?Baebol i tijim yumi we man i bin stat olsem wanem?
8 Samfala man oli talem we God i bin yusum fasin blong evolusen blong wokem man. Oli talem we God i wet gogo man i naf rere, nao i putum sol i go insaed long hem. Be Baebol i no talem olsem. Baebol i talem we God i bin wokem ol samting we oli stap gru long graon, mo ol anamol tu, “oli stret nomo long kaen blong olgeta.” (Jenesis 1:11, 21, 24) Wan kaen ligim, no wan kaen anamol, i no save jenis blong i kam narakaen, nating sipos longtaem i pas. Wan buk we i soemaot gud we yumi no kam long rod blong evolusen, nem blong hem Life—How Did It Get Here? By Evolution or by Creation?
OLSEM WANEM GOD I MEKEM MAN
9. (a) ?Baebol i soemaot we God i wokem man olsem wanem? (b) ?Wanem i hapen taem God i putum “win blong laef” long man?
9 God i bin yusum graon blong mekem man, blong hem i save laef long graon. Baebol i talem se: “God Jeova i tekem sam graon nao i wokem man, mo hem i blu long nos blong man ya i putum win blong laef long hem, nao man ya i kam wan laef sol.” (Jenesis 2:7) Hemia nao i soemaot gud we God i bin wokem man. Long spesel wok ya blong hem, God i wokem wan tru man, i no haf man nomo. Taem God i blu long nos blong man, blong putum “win blong laef” blong hem, waetleva blong man i kam fulap long win. Be i gat narafala samting tu we i hapen. Long fasin ya God i givim laef long bodi blong man ya. Sipos man i stap pulum win, paoa blong laef ya i save stap gud nomo.
10. ?Wanem sol blong man? ?God i mekem olsem wanem?
10 Baebol i no talem we God i givim wan sol long man. Be i talem we God i mekem man i pulum win, nao “man i kam wan laef sol.” Olsem ya nao, man hem nao i wan sol, olsem wan man we i kam wan dokta, hem nao i wan dokta. (1 Korin 15:45) “Graon” ya we God i yusum blong mekem bodi blong man, hemia i no sol. Mo “win blong laef” tu, i no sol. Be Baebol i soemaot we tufala samting ya tugeta, i mekem we “man i kam wan laef sol.”
11. ?Olsem wanem Baebol i soemaot klia we sol i no olsem wan samting we i save aot long bodi blong man, blong go samples we hem nomo i wantem?
11 From we man nao hem i wan sol, taswe yumi save we sol ya i no wan samting we i stap insaed long bodi blong man, no wan samting we i save aot long bodi. Baebol i tijim we yu nao yu wan sol. Baebol i tokbaot sol we i wantem kakae, i se: “Sol blong yu i wantem tumas blong kakae mit.” (Dutronome 12:20) Mo tu, i talem we ol sol oli gat blad i stap ron long ol string blong olgeta, i se: “Ol mak blong blad blong ol sol blong olgeta pua man, we oli no gat poen.”—Jeremaea 2:34.
BLONG WANEM GOD I PUTUM MAN LONG WOL YA
12. ?God i wantem we ol man oli mekem wanem long wol?
12 I no plan blong God blong Adam mo Iv tufala bambae i ded samtaem, blong bambae tufala i laef long wan narafala ples. Be tufala i mas stap long wol ya, blong lukaot long hem, mo long ol samting we oli laef oli stap long hem. Olsem Baebol i talem, i se: “God i blesem tufala, nao i talem long tufala i se: ‘Yutufala i mas tekem plante pikinini blong yufala bambae i kam plante, nao yufala i mas fulumap wol mo bos long hem, mo yufala i mas bos long ol fis blong solwora, mo long ol samting we oli stap flae long skae, mo long ol samting we oli laef oli stap wokbaot long wol.’ ” (Jenesis 1:28; 2:15) Adam mo Iv, mo ol pikinini blong tufala, oli save laef long wol ya foreva, blong mekem ol wok ya we God i wantem oli mekem.
13. (a) ?Olsem wanem yumi save glad? (b) ?Wanem i save mekem we laef blong yumi i no blong nating nomo?
13 Yumi luk we Baebol i talem se “God i blesem tufala.” Hem i rili kea long ol pikinini blong hem long wol ya. Ol oda we hem i bin givim long tufala, oli blong halpem tufala. Tufala i save glad, sipos tufala i harem ol oda ya. Jisas i save long samting ya, nao taswe hem i talem se: “!Olgeta we oli harem tok blong God mo oli obei long hem, oli save harem glad!” (Luk 11:28) Oltaem Jisas i obei long ol tok blong God. Hem i talem se: “Oltaem mi stap mekem ol samting we oli mekem hem i glad.” (Jon 8:29) ?Blong wanem yumi stap long wol ya? Risen blong hem, hemia: Blong yumi glad tumas long gudfala laef, we i save kamaot taem fasin blong yumi i laenap wetem ol samting we God i wantem. Laef blong yumi i no blong nating nomo sipos yumi stap mekem ol wok blong Jeova. Mo sipos yumi mekem olsem, bambae yumi save laef foreva long Paradaes long wol.—Sam 37:11, 29.
BLONG WANEM YUMI KAM OLFALA MO YUMI DED
14. ?From we Adam mo Iv tufala i brekem loa blong God i olsem we tufala i mekem wanem?
14 Naoia yumi evriwan i stap kam olfala, mo bambae yumi ded. ?Blong wanem? Olsem yumi ridim finis long laswan japta: From we Adam mo Iv tufala i girap nogud long God, tufala i no wantem harem hem. Tufala i mas harem God, mo blong soemaot we i mas olsem, Jeova i traem tufala. Hem i talem long Adam, i se: “Yu yu save kakae long olgeta tri long garen blong mekem yu yu harem gud. Be tri ya we i blong save gud long ol samting we oli stret, mo tu long ol samting we oli no stret, yu yu no mas kakae long hem, from we long sem dei ya we yu kakae long hem, yu mas ded.” (Jenesis 2:16, 17) From we tufala i kakae long frut blong tri ya, Adam mo Iv tufala i givim baksaed long God, Papa blong tufala long heven. Mo tufala i tekem wan samting we i no blong tufala. Sipos tufala i wantem, tufala i save stap long paradaes foreva, tufala i save glad, tufala i no save sot long wan samting, mo neva tufala i save kasem sik no enikaen narafala trabol olsem. Be from fol blong tufala nomo, tufala i kasem panis blong sin. Panis ya, hemia nao ded.—Rom 6:23.
15. ?Olsem wanem yumi kasem sin blong yumi long Adam?
15 ?Yu yu save olsem wanem yumi kasem sin blong yumi long Adam? Taem Adam i kam nogud finis, ol pikinini blong hem tu oli nogud finis taem oli bon, mo olgeta tu oli mas ded. (Job 14:4; Rom 5:12) Blong halpem yu blong savegud long bisnes ya, tingbaot man blong mekem bred. Sipos hem i yusum wan tin we saed blong hem i gat kil, bambae ol bred we oli kamaot long tin ya, oli mas karem mak blong kil ya. Adam i olsem tin ya blong bred. Mo yumi evriwan, yumi olsem bred blong tin ya. Adam hem i kam nogud taem we hem i brekem loa blong God. Olsem hem i karem wan kil, no wan mak we i nogud. Nao olgeta pikinini blong hem, olgeta tu oli karem sem mak ya blong sin, oli nogud finis.
16, 17. ?Olsem wanem wan merikel we Jisas i bin wokem, i soemaot we sik i kasem ol man from sin?
16 From we yumi evriwan i kasem sin long Adam, yumi stap kasem sik, mo yumi stap kam olfala. Wan merikel blong Jisas i soemaot samting ya. Taem Jisas i stap tij long haos ya we hem i stap visit long hem, plante man oli stap kam insaed, nao rum i fulap tumas. Fo man we oli stap karem wan man we haf bodi blong hem i ded, oli wantem kam insaed tu, be i no gat rod. Ale, oli klaem antap long ruf, nao oli katem hol long hem, mo oli tekem sikman ya wetem bed blong hem we i stap slip long hem, nao oli slakem oli godaon insaed long haos, stret long ples ya we Jisas i stap.
17 Taem Jisas i luk we bilif blong olgeta ya i strong olsem, hem i talem long man ya we haf bodi blong hem i ded, i se: “Ol sin blong yu mi mi tekemaot finis.” Be i gat sam blong ol man ya we oli stap, we oli no ting se Jisas i save fogivim sin. Taswe Jisas i talem long olgeta, i se: “ ‘Be mi wantem soemaot long yufala we mi, mi Pikinini blong Man, mi gat paoa long wol blong tekemaot sin blong man.’ Nao i talem long sikman ya, i se ‘Mi mi talem long yu, yu stanap, yu tekem bed blong yu, yu wokbaot yu gohom.’ Wantaem nomo, man ya i stanap, i tekem bed blong hem, nao stret long fes blong olgeta, hem i wokbaot i goaot.”—Mak 2:1-12, NTB.
18. ?Ol man blong God oli gat wanem kaen fyuja?
18 !Paoa ya blong Jisas i save halpem yumi tumas! Aninit long rul blong kingdom blong God, Kraes bambae i save fogivim ol sin blong olgeta we oli lavem God, mo mekem wok blong hem. Bambae oli no moa gat sobodi, no enikaen sik. !Mo bambae oli no moa kam olfala, mo oli no moa save ded! !Hemia i wan gudfala hop blong fyuja! Hop ya i winim fasin blong naoia, we man i bon, i stap smoltaem nomo, afta i ded. Sipos yumi gohed long lanem ol samting blong God, mo yumi stap mekem ol wok blong hem, bambae yumi save laef foreva long Paradaes long wol.
[Tok blong pija long pej 69]
Plante man oli no save blong wanem oli laef oli stap
[Tok blong pija long pej 70]
?Ol samting ya oli kamaot from evolusen, no ol man oli bin wokem?
[Tok blong pija long pej 75]
Baebol store blong man ya we haf bodi blong hem i ded, i soemaot we sik i kasem ol man from sin blong Adam