Japta 22
Olsem Wanem Blong Makemaot Tru Skul
1. ?Hu olgeta ya we oli stap mekem tru skul long faswan handred yia?
I KLIA nomo hu olgeta ya we oli stap mekem tru skul long faswan handred yia. Olgeta man blong Jisas Kraes oli stap mekem ya. Olgeta oli blong wan Kristin kampani nomo. ?Be olsem wanem long tede? ?Olsem wanem yumi save makemaot olgeta ya we naoia oli stap mekem tru skul?
2. ?Olsem wanem yumi save makemaot olgeta man ya we oli stap mekem tru skul?
2 Blong eksplenem samting ya, Jisas i talem, i se: “Long frut blong olgeta, bambae yufala i save makem olgeta. . . . Evri gudfala tri i save karem gudfala frut nomo, be evri rotin tri i save karem ol rabis frut nomo; . . . olsem ya nao, long frut blong olgeta, bambae yufala i save makem olgeta.” (Matyu 7:16-20) ?Yu ting se ol man we oli stap mekem tru wosip long God, oli mas karem wanem kaen frut? ?Oli mas stap talemaot wanem kaen toktok naoia? ?Mo oli mas stap mekem wanem naoia?
MEKEM NEM BLONG GOD I TABU
3, 4. (a) ?Wanem faswan samting we Jisas i askem long Stampa Prea blong hem? (b) ?Olsem wanem Jisas i bin leftemap nem blong God, blong mekem i kam tabu?
3 Olgeta man blong tru wosip, oli mas laenap wetem Stampa Prea ya we Jisas i givim long ol man blong hem. Faswan samting we Jisas i talemaot, hemia nao: “Papa blong mifala we yu stap long heven, nem blong yu i mas tabu.” Wan narafala Baebol i tanem defren lelebet, i se: “Letem ol man oli leftemap nem blong yu, i tabu.” (Matyu 6:9, Jerusalem Bible) ?Wanem mining blong toktok ya, se mekem nem blong God i tabu? ?Jisas i bin leftemap nem ya olsem wanem?
4 Long wan prea blong hem, Jisas i soemaot olsem wanem hem i bin leftemap nem blong God. Hem i prea i se: “Mi mi talemaot nem blong yu finis long ol man ya we yu yu tekemaot long wol blong givim long mi.” (Jon 17:6) Yes, Jisas i bin talemaot nem blong God, Jeova, long ol narafala man. Hem i neva foget blong yusum nem ya. Jisas i save finis we Papa blong hem i wantem we nem blong hem i kam tabu long olgeta ples blong wol. Olsem ya nao, wok ya we Jisas i mekem finis blong talemaot nem ya, mo blong soemaot we nem ya i tabu, hemia nao i wan eksampel blong folem.—Jon 12:28; Aesea 12:4, 5.
5. (a) ?Nem blong God i minim wanem long Kristin kongregesen? (b) ?Blong bambae yumi no save lus, yumi mas mekem wanem?
5 Baebol i soemaot we tru Kristin kongregesen i stap from nem blong God. Aposol Pita i eksplenem samting ya, i se: “[God] i kamtru . . . long ol narafala laen, blong tekemaot wan kampani blong olgeta, blong oli holem nem blong hem.” (Wok 15:14) Taswe ol prapa man blong God, oli mas savegud we nem blong hem i tabu, mo oli mas talemaot nem ya long olgeta ples long wol. Blong man bambae i no save lus, hem i mas save long nem ya, olsem Baebol i talem: “Ale, ‘olgeta we oli singaot long nem blong Jeova, hem bambae i sevem olgeta.’ ”—Rom 10:13, 14.
6. (a) ?Yu ting se plante jyos oli stap leftemap nem blong God? (b) ?I gat sam we oli stap mekem wetnes long nem blong God?
6 ?Hu olgeta ya we naoia oli stap leftemap nem blong God long olgeta ples long wol, blong soemaot we nem ya i tabu? Kolosap olgeta skul oli no wantem yusum nem ya, Jeova. Samfala skul oli tekemaot nem ya finis long Baebol blong olgeta. Be sipos taem yu yu stap toktok wetem ol manples blong yu, nao plante taem yu tokbaot Jeova, mo yu stap yusum nem blong hem, oraet, ?olgeta ya bambae oli ting se yu blong wanem skul? I gat wan skul nomo we i stap folem eksampel blong Jisas long bisnes ya. Ol man blong skul ya oli stap mekem ol wok blong God, mo oli stap mekem wetnes long nem blong hem, olsem Jisas i mekem bifo. Hemia nao nambawan samting long laef blong olgeta. Nao taswe oli tekem nem ya we i stanap long Baebol, hemia nao, “Ol Wetnes blong Jeova.”—Aesea 43:10-12.
WOK BLONG TALEMAOT KINGDOM BLONG GOD
7. ?Olsem wanem Jisas i soemaot we kingdom blong God i impoten tumas?
7 Long Stampa Prea blong hem, Jisas i soemaot we kingdom blong God hem i wan impoten samting. Hem i tijim ol man blong hem blong prea olsem hemia: “Mifala i wantem we kingdom blong yu i kam.” (Matyu 6:10) Oltaem Jisas i stap taltalemaot we kingdom nomo i save tekemaot ol trabol long wol. Jisas, wetem ol aposol blong hem, oli prij long olgeta man blong talemaot kingdom ya. Oli stap “pasraon long ol taon mo velej” mo “long ol haos.” (Luk 8:1; Wok 5:42; 20:20) Kingdom blong God i olsem stampa tok blong olgeta, taem oli stap prij mo tij.
8. ?Wanem stampa toktok blong ol tru Kristin long “lasdei,” olsem Jisas i soemaot?
8 ?Be olsem wanem long tede? ?Wanem stampa tijing blong tru Kristin kampani blong God? Jisas i talemaot ol samting we bambae oli mas kamtru long “lasdei,” i se: “Nao bambae oli stap talemaot gud nyus ya blong kingdom long olgeta ples long wol, blong oli wetnes blong hem long fes blong olgeta laen blong man, nao biaen bambae en i save kam.” (Matyu 24:14) Olsem ya nao, Kingdom i stampa blong ol toktok blong ol man blong God tede.
9. ?Hu olgeta ya we naoia oli stap talemaot nyus blong Kingdom?
9 Sipos wan man bambae i kam long haos blong yu blong tokbaot we kingdom blong God nomo i save tekemaot ol trabol long wol, oraet, ?bambae yu ting se man ya i blong wanem skul? ?Ol man blong ol narafala skul, oli bin tokbaot kingdom blong God wetem yu samtaem? ?No Ol Wetnes blong Jeova nomo oli mekem olsem? !Kolosap ol narafala man oli no save long kingdom ya! Oli no wantem tokbaot gavman blong God. Be nyus blong gavman ya i bigwan tumas, i naf blong wekemap olgeta man long wol. Profet Daniel i talemaot finis we kingdom ya bambae ‘i brebrekem mo finisim olgeta narafala gavman, mo hemia nomo bambae i rulum wol.’—Daniel 2:44.
RESPEK LONG TOK BLONG GOD
10. ?Olsem wanem Jisas i bin soemaot we hem i gat respek long Tok blong God?
10 Wan narafala fasin blong makemaot olgeta ya we oli stap mekem tru skul, hemia nao, wanem oli stap tingting long Baebol. Oltaem nomo Jisas i soemaot we hem i gat respek long Tok blong God. Mo oltaem nomo hem i yusum Baebol blong skelem mo stretem plante samting. (Matyu 4:4, 7, 10; 19:4-6) Mo tu, oltaem hem i mekem we fasin blong hem i stret nomo long ol tinjing blong Baebol, from we i gat respek long hem. Neva hem i daonem Baebol. Be hem i bin jajem ol man we tijing blong olgeta i no laenap wetem Baebol, mo we oli stap traem spolem ol tijing blong Baebol, from we oli stap talemaot tingting blong olgeta nomo.—Mak 7:9-13.
11. ?Plante skul oli ting wanem long Baebol?
11 ?Olgeta skul ya we oli talem se oli Kristin, oli laenap wetem eksampel blong Jisas? ?Oli gat prapa respek long Baebol? Tede, plante pasta mo pris oli no bilif long olgeta Baebol store ya blong bifo, blong Adam we i foldaon long sin, mo blong wora ya we i ron bigfala long taem blong Noa, mo blong Jona wetem bigfala fis, mo sam narafala store bakegen. Mo oli stap talem we ol man oli kam long mangke, wan tijing ya we oli kolem evolusen. Oli no bilif we God i mekem man. ?Ol toktok olsem, yu ting se hemia i halpem ol man blong bambae oli gat respek long Tok blong God? Mo tu, samfala lida blong skul oli talem se sipos wan man i slip wetem wan woman, be tufala i no mared, hemia i oraet nomo. Mo sipos wan man i slip wetem wan narafala man, mo wan man i maredem tu no tri woman, be hemia i oraet nomo. ?Yu ting se ol lida olsem oli stap enkarajem ol man blong oli yusum Baebol blong faenem stret rod? No gat ya. Ol lida ya, oli no folem nating eksampel blong Pikinini blong God, mo ol aposol blong hem.—Matyu 15:18, 19; Rom 1:24-27.
12. (a) ?Blong wanem wosip ya blong plante man we oli gat Baebol, i no stret long ae blong God? (b) ?Sipos jyos i letem ol man nogud oli holem gudnem yet, hemia i soemaot wanem long yumi?
12 I gat plante memba blong ol skul we oli gat Baebol, mo oli stap stadi long hem, be fasin blong olgeta i no stret long Baebol. Baebol i tokbaot ol man olsem, i se: “Ol man ya oli stap talem se oli save God, be ol fasin we oli stap mekem, oli soemaot we tok ya blong olgeta i no tru.” (Taetas 1:16, NTB; 2 Timote 3:5) Plante memba blong ol skul oli stap plelaki, oli drong samtaem, no oli stap mekem sam narafala nogud samting. Be skul i letem ol man ya oli holem gudnem yet. ?Fasin olsem i soemaot wanem? I klia se ol skul olsem, oli no stret long ae blong God.—1 Korin 5:11-13.
13. ? Sipos wan man i faenemaot finis we ol tijing blong skul blong hem oli no laenap wetem Baebol, bambae man ya i mas mekem wanem disisin?
13 Sipos yu yu ridimsave finis olgeta japta long buk ya, i stat long faswan i kasem japta ya, oraet, hemia i min se naoia yu save finis long ol stampa tijing blong Baebol. ?Be olsem wanem sipos ol tijing blong skul blong yu, oli no laenap wetem ol tijing ya long Tok blong God? Hemia nao i wan bigfala trabol long yu ya. From we naoia yu mas mekem wan disisin, se bambae yu folem ol trutok blong Baebol, no bambae yu givim baksaed long hem, nao yu folem ol tijing ya we oli no stret long Baebol. Hemia i wan disisin we i blong yu nomo blong mekem. Be yu mas tingtinggud long ol samting ya fastaem. ?Blong wanem? From we disisin blong yu we i stret, i save mekem we God bambae i glad long yu, mo we yu bambae yu kasem itenel laef long paradaes long wol. Be sipos yu yu mekem disisin we i rong, bambae i no olsem ya.
OLI NO MAS STAP WETEM WOL
14. (a) ?Wanem narafala samting ya we i makemaot tru skul? (b) ?Olgeta we oli stap mekem tru wosip, oli mas mekem olsem wanem? ?Blong wanem hemia i impoten tumas?
14 Wan narafala mak blong olgeta ya we oli stap mekem tru skul, hemia nao we Jisas i talem: “Oli no man blong wol.” (Jon 17:14) Hemia i min se olgeta we oli stap mekem tru wosip, oli mas stap longwe long olgeta rabis fasin blong wol ya. Jisas Kraes i no wantem nating blong kam wan haeman long saed blong politik. (Jon 6:15) Baebol i talem we Devel Setan i masta blong wol ya, nao taswe i impoten tumas we yumi stap yumi nomo, mo ol man blong wol oli stap olgeta nomo. (Jon 12:31; 2 Korin 4:4) Bisnes ya i hevi tumas, taswe Baebol i talem se: “Man we i wantem mekem fren wetem wol, hem i kam badfren long God.”—Jemes 4:4.
15. (a) ?Ol skul ya long ples blong yu, oli rili ‘no blong wol,’ no olsem wanem? (b) ?Yu yu save wan skul we i laenap gud long eksampel blong Jisas Kraes?
15 ?Ol skul long ples blong yu, oli stap tingbaot ol bisnes ya, no no gat? Ol pasta mo pris, mo ol memba blong jyos, oli rili “no man blong wol”? ?No oli stap meks tumas long saed blong politik, no long ol narafala bisnes olsem we oli blong wol nomo? I no hadwok blong faenem ansa long ol kwestin ya, from we ol man oli save finis long ol samting we ol jyos oli stap mekem. Mo tu, i isi nomo blong jekap long ol wok blong Ol Wetnes blong Jeova. Olgeta ya oli stap folem eksampel blong Kraes wetem ol man blong hem. Oli stap longwe long ol bisnes blong wol ya: ol fasin blong politik, ol man oli stap tingting long olgeta nomo, ol fasin nogud, mo olgeta fasin blong faet.—1 Jon 2:15-17.
OLI LAVLAVEM OLGETA
16. ?Wanem impoten samting ya we i stap makemaot ol man blong Kraes?
16 Wan narafala samting we i stap makemaot ol tru man blong Kraes, hemia nao we oli stap lavlavem olgeta. Samting ya i impoten tumas. Jisas i talem, i se: “Sipos yufala i stap lavlavem yufala, bambae olgeta man oli luksave se yufala i man blong mi.” (Jon 13:35) ?Ol skul ya we yu save long olgeta, oli gat lav olsem? ?Taem kantri blong olgeta i go mekem wo long sam narafala kantri, bambae olgeta man blong ol skul ya, oli mekem wanem?
17. ?Ol skul, mo ol memba blong skul, oli stap lavlavem olgeta, no olsem wanem?
17 Yu yu save finis long wanem bambae i hapen. Taem ol man oli givim oda, olgeta memba blong ol defren kaen skul oli go oli kilim i ded olgeta man blong narafala kantri ya, nating sipos oli blong sem skul nomo. Ol man Katolik i kilim ol man Katolik, olgeta we oli Protestan oli kilim ol narafala Protestan, mo ol man Muslim oli kilim ol narafala man Muslim. ?Yu ting se fasin olsem i stret long Tok blong God, i soemaot speret blong God?—1 Jon 3:10-12.
18. ?Be olsem wanem long Ol Wetnes blong Jeova, oli stap lavlavem olgeta?
18 ?Be olsem wanem long Ol Wetnes blong Jeova? ?Oli stap lavlavem olgeta? Oli no stap folem rod blong olgeta skul blong wol. Oli no go blong kilim i ded ol narafala Wetnes blong Jeova long taem blong faet. Oli no olsem ol narafala man we oli talem se, “mi mi lavem God,” be long semtaem nomo oli no laekem nating ol brata blong olgeta we oli blong narafala kantri, laen no kala. (1 Jon 4:20, 21) Be olgeta Wetnes blong Jeova oli stap soemaot lav long narafala rod tu. ?Wanem rod ya? Rod blong mekem i gud long ol man ples, mo blong halpem ol narafala man oli kasem save long God.—Galesia 6:10.
WAN TRU SKUL
19. ?From wanem i stret blong talem se i gat wan tru skul nomo?
19 I mas gat wan tru skul nomo. I mas olsem, from we tru God i no olsem “wan God blong fasin ya we i olbaot nomo, be hem i wan God blong pis ya.” (1 Korin 14:33) Baebol i talem we i gat “wan bilif nomo.” (Efesas 4:5) ?Oraet, hu ya olgeta ya we naoia oli stap mekem tru wosip?
20. (a) ?Buk ya i soemaot we wanem man oli tru man blong God tede? (b) ?Yu yu ting wanem? (c) ?Olsem wanem blong kasem save long Ol Wetnes blong Jeova?
20 Mifala i save, se Ol Wetnes blong Jeova oli stap mekem ya. Blong yu tu bambae yu luksave se samting ya i tru, fastaem yu mas savegud long olgeta. Nambawan rod blong samting ya, hemia nao we bambae yu kam long ol miting blong olgeta long Haos Kingdom blong Ol Wetnes blong Jeova. Baebol i soemaot se sipos yumi stap mekem tru skul, hemia i save mekem we yumi i harem gud tumas long naoia, mo tu, samting ya i openem rod blong itenel laef long paradaes long wol. Taswe i gud sipos bambae yu jekemap olgeta samting ya. (Dutronome 30:19, 20) Mifala i glad tumas sipos yu mekem olsem. ?Ating i gud blong jekemap naoia?
[Tok blong pija long pej 185]
?Sipos yu stap tokbaot Jeova mo kingdom blong hem, bambae ol man oli ting se yu blong wanem skul?
[Tok blong pija long pej 186]
?Yu ting se man i gat respek long Baebol sipos i no stap folem ol loa blong hem?
[Tok blong pija long pej 189]
Jisas i no wantem kam haeman long saed blong politik
[Tok blong pija long pej 190]
Plis, yu kam long ol miting blong Ol Wetnes blong Jeova