Japta 12
?From Wanem Mi Mi No Laekem Mi Wan?
LOUISE i harem nogud, i se: “Mi mi no harem nating se mi mi spesel.” ?Olsem wanem long yu? ?Sam samtaem, yu yu harem nogud long yu wan?
I tru se, yumi evriwan i nidim blong haremgud long yumi wan. Sam man oli kolem fasin ya, “stamba samting we i givim kwaet tingting long man mo i mekem hem i stanap strong.” Mo tu, Baebol i talem se: “Yu mas lavem ol man we oli stap raonabaot long yu, yu mekem i gud long olgeta, olsem we yu stap mekem i gud long yu.” (Matiu 19:19) Sipos yu yu gat nogud tingting long saed blong yu wan, maet bambae yu save gat nogud tingting long saed blong ol narafala tu.
‘!Mi Mi No Save Mekem Wan Gudfala Samting Nating!’
?From wanem yu yu gat nogud tingting long yu wan? Wan risen, maet yu harem se i gat plante samting we yu yu no naf blong mekem. Bodi blong yu i stap gru yet. Plante taem yu yu stap mestem, yu mekem wan samting i foldaon no yu bangem wan samting, nao yu sem. Mo tu, yu yu no gat fasin blong bigman yet. Olgeta oli laef longtaem finis, mo oli lanem finis blong holem strong tingting taem trabol i kasem olgeta. Yu yu no naf yet “blong jusumaot wanem fasin i gud mo wanem fasin i nogud,” from we yu yu no “stap traehad longtaem finis” long rod ya. Taswe, yu yu no stap jusumaot stret samting evri taem. (Hibrus 5:14) !Ating sam samtaem, yu harem se yu no save mekem wan gudfala samting nating!
Wan narafala samting we i save mekem ol yangfala oli ting nating long olgeta, hemia se oli neva save mekem papa mama blong olgeta i glad. Wan yangfala i talem se: “Sipos mi no kasem top mak long skul, papa mama blong mi i wantem save from wanem i olsem, mo tufala i daonemgud mi.” I tru, olgeta papa mama oli traem pusum ol pikinini blong olgeta blong kasem ol hae mak. Sipos yu no kasem mak ya, i sua se bambae tufala i tok long yu. Advaes blong Baebol hemia se: “Pikinini blong mi, yu yu mas lesin gud long ol samting we mi wetem mama blong yu, mitufala i stap tijim yu long hem, mo yu no mas lego ol samting ya.” (Ol Proveb 1:8, 9) Bitim we yu letem tingting blong yu i foldaon taem tufala i tok long yu, traem lesingud mo lanem wan samting from.
?Be, olsem wanem sipos papa mama blong yu i stap skelem fasin blong yu wetem narafala? (“?From wanem yu no save mekem olsem bigfala brata blong yu, Pol? Hem i kasem top mak oltaem long skul.”) Ol tok olsem oli save stikim yu, be oli stap soemaot wan impoten samting tu. Papa mama blong yu i wantem se yu yu gat wan gudfala laef. Nating se i olsem, sipos yu harem se tufala i strong tumas long yu, i gud yu storian wetem tufala long kwaet fasin.
Wokem Fasin Blong Laekem Yu Wan
?Olsem wanem blong jenisim nogud tingting we yu yu gat long yu wan? Fastaem, tingbaot ol gudfala fasin blong yu mo ol slak fasin blong yu. Bambae yu yu luksave se plante slak fasin blong yu, oli smol nomo. ?Olsem wanem sipos yu yu gat sam bigfala nogud fasin, olsem fasin blong kros kwik mo tingbaot yu wan nomo? Traehad blong stretem ol fasin ya, nao sloslou, bambae yu yu harem gud long yu wan.
!Antap long samting ya, yu no mas satem ae blong yu long ol samting we yu yu naf blong mekem! Ating yu save kuk no jenisim wil blong trak. Maet yu yu ting se hemia i no wan bigfala samting. !Be, wan man we i hanggri no we i trabol long rod from wil blong trak i brok, bambae hem i tinghae long yu from gudhan we yu yu gat long ol wok ya! Mo tu, tingbaot ol gudfala fasin blong yu. ?Yu yu laekem blong stadi? ?Yu yu gat longfala tingting? ?Yu yu gat sore long narafala? ?Yu yu gat gladhat blong givim presen? ?Yu yu gat kaen fasin? Olgeta fasin ya oli impoten, oli save mekem ol slak fasin blong yu oli kam smol nomo.
Ating ol advaes ya oli save givhan long yu:
Traehad blong mekem samting we yu yu naf blong mekem nomo: Sipos oltaem yu traem kasem wan mak we i hae tumas, ating bambae tingting blong yu i foldaon. Taswe, yu mas traehad from ol samting we yu yu naf blong mekem nomo. Maet i gud we yu traem lanem wan wok olsem kilkilim taepraeta. Lanem blong plei miusik no blong toktok long wan narafala lanwis. Kamgud moa long fasin blong rid, no ridim sam buk we oli dip moa. Taem yu luk se yu yu naf blong mekem samting ya, bambae yu harem gud long yu wan.
Mekem gudfala wok: Sipos wok blong yu i olbaot, bambae yu yu no save harem gud long yu wan. God i harem gud long ol samting we hem i wokem. Evri taem we hem i wokem wan niufala samting long skae mo wol, hem i talemaot se wok ya i “gud tumas.” (Jenesis 1:3-31) Yu tu, yu save harem gud long wok we yu yu mekem long haos mo long skul, sipos yu mekem gud wok ya mo traehad long hem.—Lukluk Ol Proveb 22:29.
Givhan long narafala: Yu yu no save harem gud long yu wan sipos yu sidaon nomo mo letem ol narafala oli mekem wok blong yu. Jisas i talem se, “Sipos wan long yufala i wantem kam haeman, . . . hem i mas kam olsem slef nomo blong yufala,” no man blong wok, blong ol narafala.—Mak 10:43-45.
Tingbaot Kim we i gat 17 yia. Taem skul i finis nao hem i spel, hem i stap spenem 60 aoa evri manis, blong tijim ol narafala long ol trutok blong Baebol. Hem i talem se: “Samting ya i mekem mi mi kam klosap moa long Jeova, mo i halpem mi blong laekem tumas ol man.” !I sua se gel ya we i glad tumas, i stap harem gud long hem wan!
Jusumgud ol fren blong yu: Barbara we i gat 17 yia i talem se: “Mi mi no laekem mi nating. Taem mi stap wetem ol man we oli trastem mi, mi mekem gudfala wok. Be, taem mi stap wetem ol man we oli mekem olsem se mi mi wan enjin nomo, hed blong mi i kam krangke.”
I tru se, ol man we oli flas mo oli daonem yu, oli save mekem yu yu ting nating long yu wan. Taswe, yu mas jusum ol fren we oli intres long yu mo we oli leftemap tingting blong yu.—Ol Proveb 13:20.
Mekem God i kam olsem bes fren blong yu: Deved we i raetem plante Sam, i talem se: “Hae God. Mi mi lavem yu, mo yu yu paoa blong mi.” (Ol Sam 18:2) Hem i no trastem hem wan, be hem i dipen long gudfala fasin fren blong hem wetem Jeova. Taswe, taem hem i kasem trabol, hem i no kam kros mo hem i no lusum kwaet tingting blong hem. (2 Samuel 16:7, 10) !Yu tu, yu save “stap kolosap long God” mo “tok flas” blong leftemap Jeova, i no blong leftemap yu!—Jemes 2:21-23; 4:8; 1 Korin 1:31.
Rod We En Blong Hem i Nogud
Wan man blong raetem buk i talem se: “Sam yangfala we oli tingting nogud long olgeta wan, oli putum wan giaman fes, mo oli soemaot wan fasin we i defren olgeta long prapa fasin blong olgeta.” Ating yu yu luk finis wan yangfala olsem: Hem i mekem olsem se hem i ‘wan strong man,’ no i stap slip olbaot, no i putum narakaen klos olsem ol man blong plei rok miusik. Be, ol giaman fasin ya oli haedem nomo trabol we hem i gat, oli no givhan long hem blong winim filing ya we hem i ting nating long hem wan.—Ol Proveb 14:13.
Tingbaot olgeta we oli stap slip olbaot blong traem “winim tingting we i foldaon, mo blong gat wan gudfala tingting long saed blong olgeta [taem oli harem se narafala i wantem olgeta], mo blong gat wan fren. Ol gel olsem oli kasem bel, blong traem harem gud long lav we bebi ya bambae i givim long olgeta, mo harem gud from we bebi ya i nidim olgeta.” (Coping With Teenage Depression) Wan yangfala woman we i no glad nating, i raetem se: “Mi mi mekem nogud wetem ol boe blong traem harem gud lelebet. I moagud sipos mi bin traehad blong frengud wetem God ya we i wokem mi. Naoia, mi mi harem se laef blong mi i blong nating nomo, mi mi no gat fren, mo tingting blong mi i foldaon olgeta.” Yes, lukaot blong no folem ol rod we en blong olgeta i nogud.
Woning
Plante taem, Baebol i givim woning se yumi no mas tinghae tumas long yumi wan. ?From wanem? Ating, from we plante long yumi i bitim mak taem yumi stap traehad blong faenem rod blong laekem yumi wan. Yumi leftemap yumi nomo mo tok flas from ol wok we yumi mekem mo ol save we yumi gat. Samfala oli daonem ol narafala, jes blong leftemap olgeta nomo.
Long Kristin kongregesen long Rom long faswan handred yia, ol man Isrel mo ol Hiten man (olgeta we oli no man Isrel) oli raorao, from se wan i stap wantem blong winim narawan oltaem. Taswe, aposol Pol i pulum ol Hiten man blong tingbaot se God i “mekem i gud” long olgeta, i “joenem” olgeta long ol man we oli gat spesel blesing blong Hem. (Rom 11:17-36) Be, ol man Isrel tu oli mas winim plante slak fasin. Olgeta ya oli ting se oli stret man finis. Pol i talem long olgeta se: “Olgeta evriwan oli mekem nogud finis, mo oli stap afsaed olgeta long ol gudgudfala fasin blong God.”—Rom 3:23.
Pol i no daonem olgeta tumas, be hem i se: “From we God i givhan gud long mi long gladhat blong hem, mi mi talem long yufala evriwan, se yufala i no mas letem tingting blong yufala i go antap.” (Rom 12:3) Yes, i tru se yumi mas laekem yumi wan, be yumi no mas bitim mak.
Dokta Allan Fromme i talem se: “Wan man we i gat stret tingting long saed blong hem wan i no stap harem nogud oltaem, be hem i no laf krangke oltaem tu. . . . Hem i no stap tingting long nogud saed blong evri samting, be hem i save tu se trabol i save kasem hem. Hem i no stap mekem samting we hem i no tingting gud long hem fastaem, mo hem i save fraet long sam samting tu. . . Hem i save se hem i no stap win long evri samting, be hem i luksave tu se hem i naf blong mekem samting.”
Yes, yu yu mas gat tingting daon. “God i agensem olgeta we oli praod, be long olgeta we tingting blong olgeta i stap daon, hem i stap givhan long olgeta long gladhat blong hem.” (Jemes 4:6) Yu mas luksave se yu yu naf blong mekem samting, be yu no mas fogetem se yu yu gat sam slak fasin tu. Traehad blong kamgud moa. Wanwan taem, bambae tingting blong yu i save kam nogud yet long saed blong yu wan. Be yu neva mas ting se yu yu nogud nating, mo se God i no kea long yu. “Man we i lavem God, God i savegud hem.”—1 Korin 8:3.
Ol Kwestin Blong Tokbaot
◻ ?From wanem sam yangfala oli ting nating long olgeta? ?Yu yu gat filing ya?
◻ ?Yu yu save mekem wanem taem papa mama blong yu i tok long yu blong pusum yu blong kamgud moa long wok blong yu?
◻ ?Olsem wanem blong wokem fasin blong laekem yu wan?
◻ ?Wanem sam fasin we en blong olgeta i nogud, mo we yu no mas folem blong traem harem gud long yu wan?
◻ ?From wanem yu yu mas lukaot gud blong no tinghae tumas long yu wan?
[Tok blong makem poen long pej 98]
Haremgud long yumi wan i “stamba samting we i givim kwaet tingting long man mo i mekem hem i stanap strong”
[Tok blong pija long pej 99]
?Yu yu harem nogud, olsem se yu no naf blong mekem samting? I gat rod blong winim tingting ya
[Tok blong pija long pej 101]
Fasin blong tokflas mo blong soem yu nomo, i no rod blong laekem yu wan
[Tok blong pija long pej 102]
?Yu yu harem se yu no save mekem wan gudfala samting nating?