Ol Yangfala Oli Askem

?Olsem Wanem Blong Mekem Se Mi Save Tinghae Long Mi Wan?

YES NO

?Yu yu lukaot gud long helt blong yu? ◯ ◯

Sipos yu ansa no long bighaf blong ol kwestin antap, maet hemia i from we yu yu no tinghae long yu, ale yu no luksave ol gudfala fasin blong yu. !Haf ya bambae i givhan long yu blong yu luksave olgeta!

BIGHAF blong ol yangfala oli trabol long tingting blong olgeta from we oli no glad long bodi blong olgeta mo oli fraet se i gat sam samting we oli no naf blong mekem. Mo tu, oli wantem se oli sem mak long ol narafala yangfala. ?Yu tu yu filim olsem? !Sipos yes, i gat plante narafala yangfala tu we oli harem olsem!

● “Ol slak fasin blong mi oli mekem se tingting blong mi i foldaon. Plante taem, mi nomo mi stap jajem mi wan bakegen.”—Leticia.a

● “Nomata se yu yu naes, be plante taem yu faenemaot se i gat sam narafala we oli naes moa bitim yu.”—Haley.

● “Mi mi sem we mi sem taem mi stap wetem ol narafala. Mi fraet se bambae oli luk mi olsem se mi mi nating nomo.”—Rachel.

Sipos yu luk se ol toktok antap i stret long yu, yu no mas harem nogud. Yu save kasem help. Tingbaot tri samting we oli save halpem yu blong gat gudfala tingting long saed blong yu.

1. Faenem Sam Gudfala Fren

Stamba vas. “Wan tru fren i soemaot lav oltaem nomo, mo hem i olsem wan brata we i rere blong givhan long taem blong trabol.”—Ol Proveb 17:17, NW.

Mining blong hem. Wan gudfala fren i save givhan bigwan long yu long taem blong trabol. (1 Samuel 18:1; 19:2) Taem yu save se i gat wan fren we i kea long yu, samting ya i leftemap tingting blong yu. (1 Korin 16:17, 18) Taswe, i gud we yu stap klosap long olgeta we oli save givhan long yu.

“Ol tru fren oli leftemap tingting blong yu.”—Donnell.

“Samtaem i impoten tumas blong save se yu gat wan fren we i kea long yu. Samting ya i save mekem yu harem gud from we yu save se narafala i tinghae long yu.”—Heather.

Lukaot gud: Meksua se ol fren blong yu oli givhan long yu blong soemaot ol prapa fasin blong yu. I no stret sipos yu mas folem sam defren fasin we oli no fasin blong yu, blong mekem ol fren blong yu oli glad long yu nomo. (Ol Proveb 13:20; 18:24; 1 Korin 15:33) Sipos yu mekem wan samting we i no waes blong pulum ol narafala blong tinghae long yu, bambae yu harem se yu no klin mo se olgeta oli yusum yu nomo.—Rom 6:21.

Taem blong yu blong ansa. Long spes daon, raetem nem blong wan fren we i save givhan long yu blong tinghae long yu.

․․․․․

I gud we yu mekem plan blong spenem sam taem wetem fren ya we yu raetem nem blong hem antap. Makemgud: Maet fren ya i no wan yangfala olsem yu, be i olfala moa long yu.

2. Givhan Long Ol Narafala

Stamba vas. “Man we i stap givim presen i go, hem i save harem gud moa, i winim man we i stap kasem presen blong hem.”—Ol Wok 20:35.

Mining blong hem. Taem yu givhan long ol narafala, samting ya i givhan long yu tu. ?Long wanem rod? Wan tok long Baebol i talem se: “Man we i stap givim ol samting long narafala man long gladhat blong hem, oltaem hem i gat plante samting. Man we i stap givhan long ol man, oltaem ol man oli stap givhan long hem.” (Ol Proveb 11:25) !Yes, taem yu givhan long ol narafala, bambae yu gat gudfala tingting long saed blong yu!b

“Mi tingting long samting we mi save mekem blong ol narafala, mo mi traem givhan long ol narafala we oli nidim help long kongregesen blong mi. Taem mi soemaot we mi lavem ol narafala mo mi intres long olgeta, mi harem gud.”—Breanna.

“Kristin wok blong prij i mekem i gud long yu, from we i pulum yu blong yu no moa tingbaot yu wan, be blong yu tingbaot ol narafala.”—Javon.

Lukaot gud: Yu no mas givhan long ol narafala from we yu wantem kasem samting nomo long olgeta. (Matiu 6:2-4) Sipos rong tingting i pulum yu blong mekem i gud long narafala, samting ya i no save givhan long yu. !Plante taem ol man oli luksave taem yu gat rong tingting olsem!—1 Tesalonaeka 2:5, 6.

Taem blong yu blong ansa. Tingbaot wan man we yu halpem hem long ol manis we i pas. ?Hem i hu? ?Wanem samting we yu yu mekem blong givhan long hem?

․․․․․

?Biaen, yu yu harem olsem wanem?

․․․․․

Tingbaot wan narafala man we yu save givhan long hem, mo raetem daon olsem wanem yu save givhan long hem.

․․․․․

3. No Letem Tingting Blong Yu i Foldaon Taem Yu Mekem Wan Mastik

Stamba vas. “Olgeta evriwan oli mekem nogud finis, mo oli stap afsaed olgeta long ol gudgudfala fasin blong God.”—Rom 3:23.

Mining blong hem. Yu yu no stret gud olgeta. Hemia i wan trutok we yu no save ronwe long hem. Samting ya i min se samtaem, bambae yu talem mo mekem sam samting we i no stret. (Rom 7:21-23; Jemes 3:2) Bambae yu mekem ol mastik. I no gat rod blong yu blokem samting ya. Be nating we yu mekem wan mastik, yu save bos long fasin we yu mekem afta long mastik ya. Baebol i talem se: “Nating we trabol i stap kasem stret man hamas taem, be oltaem hem i save girap bakegen.”—Ol Proveb 24:16.

“Samtaem, yumi no moa tinghae long yumi taem yumi skelem ol slak fasin blong yumi wetem ol gudfala fasin we ol narafala oli mekem.”—Kevin.

“Evri man oli gat ol gudfala fasin mo ol nogud fasin blong olgeta. Yumi mas praod from ol gudfala fasin we yumi gat, mo yumi mas wokhad blong sakemaot ol nogud fasin blong yumi.”—Lauren.

Lukaot gud: From we yu yu bon wetem sin, yu no mas yusum hemia olsem wan eskius blong mekem sin. (Galesia 5:13) Samting we i impoten tumas, hemia blong mekem Jeova God i glad long yu. !Be sipos yu gohed nomo blong mekem samting we i rong, bambae hem i no moa save glad long yu!—Rom 1:24, 28.

Taem blong yu blong ansa. Long spes daon, raetem wan fasin we yu yu wantem kam gud long hem.

․․․․․

Klosap long fasin ya we yu raetem antap, raetem dei blong tede. Lukaotem sam moa save long ol Wajtaoa mo ol narafala buk olsem, blong luk olsem wanem yu save kam gud moa. Mo afta long wan manis, jekemap yu wan blong luk sipos yu stap gohed gud.

God i Tinghae Long Yu

Baebol i talem se “God i hae moa long tingting [“hat,” NW] blong yumi.” (1 Jon 3:20) Hemia i min se Jeova i save luk ol gudfala fasin blong yu we maet yu yu no luk. ?Be olsem wanem? ?From we yu yu no stret gud olgeta, ale God i no moa tinghae long yu? Traem tingbaot sipos yu yu gat wan pepa mane we i 5000 Vatu, mo pepa mane ya i brok smol. ?Olsem wanem nao? ?Bambae yu yu sakemaot mane ya, yu talem se hem i nogud from we i brok? !Nogat! Nomata se i brok smol, be hem i 5000 Vatu yet.

Hemia i sem mak long tingting we God i gat long saed blong yu. !Hem i luk olsem wanem yu traehad blong mekem hem i glad, mo hem i tinghae long wanem we yu mekem, nating sipos yu yu luk se i smol tumas! Yes, Baebol i talem se “oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem hem.”—Hibrus 6:10.

[Ol futnot]

SAM SAMTING BLONG TINGBAOT

?Bambae yu yu mekem wanem sipos tingting blong yu i foldaon from we

● Ol narafala yangfala oli daonem yu?

● Yu harem se yu no olsem ol narafala yangfala?

● Yu tingbaot ol slak fasin blong yu nomo?

[Tok blong makem poen long pej 25]

“Wan man we i naes, i save harem se hem i no naes nating. Mo wan man we i no naes nating, i save ting se hem i naes moa i bitim ol narafala raonabaot long hem. Yumi nomo yumi mekem se yumi gat ol tingting olsem.”—Alyssa

[Tok blong makem poen long pej 26]

Nomata sipos wan pepa mane i brok smol, be hem i mane yet. Long sem fasin, nating se yu yu no stret gud olgeta, be God i tinghae long yu yet

[Bokis/Foto blong pija long pej 25]

SAMTING WE OL NARAFALA YANGFALA OLI TALEM

“Plante taem, mi harem se mi gat paoa taem wan fren we i lavem mi i talem wan gudfala tok long mi, sipos no, hem i smael nomo no i putum han blong hem i goraon long mi.”

“Sipos ol narafala oli gat ol gudfala fasin, yumi no mas harem nogud from. Ol gudfala fasin blong olgeta i save givhan long yumi, sem mak olsem ol gudfala fasin blong yumi i save givhan long olgeta.”

[Ol foto]

Aubrey

Lauren