Japta 39

?Olsem Wanem Mi Save Kam Klosap Long God?

?KLOSAP—long God? Long tingting blong plante man, God i olsem samting we i no joen long laef blong olgeta. Hem i stap longwe tumas. Oli bilif se hem i ‘Stamba blong Olgeta Samting,’ be oli ting se hem i no intres long olgeta. From samting ya, maet tingting ya se yu save kam klosap long God i narakaen, mo maet i mekem yu yu fraet.

Sipos no, maet yu yu sem mak long wan yangfala woman we nem blong hem Lynda. Lynda we papa mama blong hem tufala i Kristin, i talem se: “Long olgeta yia [we mi mi yangfala], klosap mi neva mestem wan Kristin miting, mo mi neva mestem wan manis long wok blong prij. Nating se i olsem, mi neva rili frengud mi wan wetem Jeova.”

Be, blong kasem wan gudfala fiuja, yu mas kam klosap long God. Jisas Kraes i talem se: “Laef ya [we i no save finis], hem i min se man i save yu, we yu nomo yu tru God.” (Jon 17:3) “Save” ya i no minim nomo se yu lanem plante samting long saed blong God mo yu save tokbaot hem. Wan man we i no bilif long God i save mekem samting ya tu. Blong save God, yu mas kam klosap long hem, mo yu mas kam fren blong hem. (Skelem wetem Jemes 2:23.) God i wantem se yumi kam long hem, hem i singaot yumi blong “lukaot hem, blong yumi save faenem hem” from we “God ya i no stap longwe long yumi nating.”—Ol Wok 17:27.

?Olsem Wanem Blong Save God?

?Yu bin lukluk samtaem long ol sta farawe? ?Yu bin lesin wetem bigfala sapraes long ol wef blong solwota? ?Yu bin harem gud blong lukluk wan naes bataflae? ?Yu bin sapraes blong luk olsem wanem wan smol lif i naes tumas? Ol wok ya blong God oli soemaot bigfala paoa blong hem, wetem waes mo lav blong hem. “Yumi no save luk ol fasin ya blong hem stret long ae blong yumi. Hem i God. Hem i stap oltaem, mo paoa blong hem i no save finis. . . . Yumi save faenemaot long ol samting blong wol ya we hem i bin mekem.”—Rom 1:19, 20.

Be, yu mas save moa long saed blong God i winim samting we ol wok blong hem raonabaot long yumi oli soemaot. Taswe, God i givim Tok blong Hem, Baebol, long yumi. Buk ya i soemaot God, i no olsem wan samting we i no gat nem, mo i no olsem wan paoa we i no intres long yumi. Hem i wan trufala Man we i gat wan nem. Man blong raetem Ol Sam i talem se: “Yumi mas tingbaot we [Jeova], hem i God.” (Ol Sam 100:3) Mo tu, Baebol i soemaot fasin blong Man we i karem nem ya, i se: “Fasin blong mi, oltaem mi gat sore long man, mo mi stap givhan long man long gladhat blong mi. Mi mi no save kros kwik. Oltaem mi stap lavem man mo oltaem mi stap holemstrong promes blong mi.” (Eksodas 34:6) !Ol stori blong Baebol long saed blong ol samting we God i mekem long ol man, oli givhan long yumi blong luksave ol fasin blong God! Taswe, wan impoten samting we yumi mas mekem blong kam klosap long God, hemia se yumi mas ridim Baebol.

Harem Gud Blong Ridim Baebol

I tru se, Baebol i wan bigfala buk blong ridim. Plante yangfala oli no ridim Baebol from we oli talem se i bigwan tumas. Mo samfala oli talem se Baebol i no pulum intres blong olgeta. Be yumi mas tingbaot se Baebol hem i toktok we God i givim long ol man. Hem i tokbaot olsem wanem ol man oli stat, mo wanem fiuja blong yumi. Hem i talem klia ol samting we yumi mas mekem blong kasem laef we i no save finis long paradaes long wol. ?Samting ya i no pulum intres blong yu? I tru, yu mas tingting dip taem yu ridim Baebol, from we “sam tok blong hem i strong blong save.” (2 Pita 3:16) Be yu no nid blong harem nogud blong ridim Baebol.

Yangfala Marvin i soemaot wan rod we i save mekem yumi harem gud blong ridim Baebol. Hem i se: “Mi traem blong mekem wan pija long tingting blong mi, mo mi putum mi wan insaed long pija ya.” Tingbaot stori long Daniel japta 6. Bitim we yu jes ridim olsem wan stori, traem mekem olsem we yu yu Daniel. Tingbaot se oli holemtaet yu from oli gat krangke tingting ya se yu yu no gat raet blong prea long God blong yu. ?Bambae oli givim wanem panis long yu? !Ded! Ale, ol soldia blong Pesia oli holem yu we oli no gat sore, oli pulum yu yu go long gref blong yu—hemia wan bigfala hol we i fulap long ol hanggri laeon.

Oli tekemaot bigfala ston we i stap blokem hol ya. Ol laeon oli stap singaot bigwan, yu yu fraet, ale yu gobak biaen. Be ol soldia blong king oli blokem yu, oli holemtaet yu, nao oli sakem yu yu go long hol ya blong yu ded. Oli rolem bigfala ston ya i gobak blong blokem hol. Ples i tudak we i tudak olgeta. Yu no save luk wan samting, be yu sek we wan bigfala samting we i fulap long hea i tajem bodi blong yu . . .

?Hemia i no pulum intres blong yu? !Si, i mas! Be tingbaot se, yu no stap rid blong harem gud long stori ya nomo. Traem luksave wanem samting we stori ya i lanem yu long saed blong Jeova. Wan samting: ol trabol we Daniel i kasem oli soemaot se Jeova i save letem ol traem oli kasem ol man blong hem.

Mo tu, traehad blong folem wan program blong ridim Baebol. !Sipos yu ridim Baebol blong 15 menet nomo evri dei, maet yu finisim ful Baebol long wan yia! ‘Yusum evri janis we yu kasem.’ Maet yu save tekemaot taem long wan samting we i no impoten tumas, olsem taem we yu yusum blong lukluk televisin. (Efesas 5:16) Sipos yu ridim Baebol oltaem, bambae yu kam klosap moa long God.—Ol Proveb 2:1, 5.

Prea i Pulum Yu i Kam Klosap Long Hem

Wan yangfala gel we nem blong hem Laverne, i talem se: “I had blong fren wetem wan man sipos yu neva toktok long hem.” Jeova i “stap ansa long ol prea,” taswe hem i singaot yumi blong toktok wetem hem. (Ol Sam 65:2) Sipos yumi prea long hem wetem bilif, mo “sipos yumi askem samting long hem we i stret long tingting blong hem, hem bambae i harem prea blong yumi.”—1 Jon 5:14.

Lynda (we yumi tokbaot antap) i luksave samting ya long laef blong hem. Hem i tingbaot we wan taem, hem i bin gat plante wari mo trabol long laef blong hem. Ale, hem i ‘prea blong plante dei blong kasem ansa long ol trabol ya.’ Bifo, i olsem we God i stap longwe long hem, be naoia, hem i harem se God i stap klosap, mo hem i kasem paoa blong winim hadtaem we hem i fesem. Wan narafala yangfala we nem blong hem Kay, i lanem se prea i wan sas samting. Hem i se: “Sam samtaem, yu harem se yu wantem talemaot ol dip filing blong yu long narafala. I no gat wan we i moagud i winim Jeova blong yu talemaot ol filing blong yu long hem, from we Jeova i kasem save long yu, mo yu save se hem nomo i save givhan long yu.”

?Be olsem wanem? ?Prea i jes blong mekem yu yu harem gud long filing blong yu? No gat. Jemes 1:2-5 i talem klia se taem ol samting oli kam blong traem yumi, yumi mas ‘askem long God blong i givim waes long yumi, nao God bambae i save givim long yumi, from we fasin blong God, hem i no save tok nogud long man we i askem samting long hem, hem i stap givim ol samting long ol man long gladhat blong hem.’ !Maet God i no tekemaot traem ya, be hem i promes blong givim waes we i naf blong halpem yumi blong stanap strong tru long traem ya! Maet hem i mekem se yumi tingbaot sam rul blong Baebol we oli stret long traem ya. (Skelem wetem Jon 14:26.) Maet hem i meksua se yumi kasem sam spesel poen long prapa stadi blong yumi long Baebol no long ol Kristin miting. Mo yu no mas fogetem se, “hem i no save letem wan samting i traem yumi, we i strong tumas long yumi. Be . . . hem bambae i mekem rod blong yumi, blong yumi winim samting ya.” Yes, hem i no save livim yu, ‘oltaem hem i stap olsem wan fren we i stap givhan long yu.’ (1 Korin 10:13; 2 Korin 4:9) ?Sipos yu luk we God i givhan long yu blong winim wan traem, yu ting se bambae yu harem we yu stap klosap moa long hem?

Be yu no mas prea long saed blong ol trabol blong yu nomo. Long prea we Jisas i givim olsem wan eksampol, fastaem hem i tokbaot nem blong Jeova se i mas tabu, Kingdom blong Hem se i mas kam, mo samting we Hem i wantem se i mas kamtru. (Matiu 6:9-13) Mo i gat tu narafala samting we oli impoten tu long saed blong prea: “Yufala i mas askem long hem, mo yufala i mas talem tangkiu tu long hem.”—Filipae 4:6.

?Olsem wanem sipos yu faenem i had blong prea? !Prea long saed ya! Askem long God blong i givhan long yu blong talemaot long hem evri samting we i stap long hat blong yu. “Yufala i mas prea oltaem.” Bambae yu faenem se yu save tokbaot evri samting long Jeova olsem yu save mekem wetem wan gudfala fren. (Rom 12:12) Yangfala Maria i talem se: “Mi save se enitaem we mi gat wan trabol, mi save lukluk i go long Jeova blong i lidim mi, mo bambae hem i givhan long mi.”

Taem yumi prea, i no nid blong yusum ol bigbigfala tok we i blong soem yumi nomo. Man blong raetem Ol Sam i talem se: “Yufala i talemaot ol trabol blong yufala long hem.” (Ol Sam 62:8) Talemaot long hem ol filing blong yu, mo ol wari blong yu. Askem long hem blong i givhan long yu blong winim ol slak fasin blong yu. Prea long hem blong i blesem famle blong yu mo ol Kristin brata mo sista blong yu. Taem yu mestem long wan samting, plis long hem blong i fogivim yu. Talem tangkiu long hem evri dei from presen ya blong laef we hem i givim. Sipos yumi prea oltaem, yumi save kam wan gudfala fren blong Jeova God, mo samting ya i save givim bigfala glad.

Talemaot Se God i Fren Blong Yu

?From we yu stat blong harem gud blong fren wetem God, yu no ting se yu mas wantem blong halpem ol narafala, blong olgeta tu oli gat gudfala fasin fren ya? Yes, blong stap olsem wan fren blong God, yu mas “talemaot tok ya, [nao] God [bambae] i sevem yu.”—Rom 10:10.

Plante oli tokbaot bilif blong olgeta fastaem long ol fren blong olgeta long skul, ol man raonabaot, mo ol famle. Biaen, oli joen wetem ol Witnes blong Jeova blong prij “long ol haos blong ol man.” (Ol Wok 5:42) Be sam yangfala oli faenem i had blong talemaot bilif blong olgeta long narafala. Wan yangfala Kristin i talem se: “Plante yangfala oli sem blong wokbaot i go long ol haos wanwan. Oli fraet se ol fren blong olgeta bambae oli lukluk nogud long olgeta.”

?Be yu yu wantem mekem hu i glad? ?Yu yu wantem mekem ol fren blong yu oli glad no yu wantem mekem Fren blong yu long heven, Jeova, i glad? ?I stret we yu letem fraet no sem i blokem yu blong kasem laef? Aposol Pol i talem se: “I gud yumi holemtaet fasin ya we yumi talemaot finis se i fasin blong yumi, we yumi putum tingting blong yumi i stap strong long God.” (Hibrus 10:23) !Bambae yu faenemaot se taem yu kasem trening blong prij mo yu reregud, yu save harem gud tumas long wok ya!—1 Pita 3:15.

Fasin tangkiu we yu gat long Fren blong yu long heven bambae i pulum yu blong givim laef blong yu fulwan i go long God mo tekem baptaes. (Rom 12:1; Matiu 28:19, 20) I wan bigfala samting blong tekem baptaes blong soemaot bilif blong yu mo blong kam wan disaepol blong Kraes. Blong mekem olsem, yu mas ‘blokem ol samting we yu nomo yu wantem,’ hemia i min se yu mas livim ol samting we yu nomo yu wantem, mo mekem ol samting we Jeova God i wantem fastaem. (Mak 8:34) Mo tu, yu mas soemaot klia se naoia yu joen long kampani blong ol Witnes blong Jeova long fulwol.

Yangfala Robert i talem se: “Ating plante yangfala oli fraet blong tekem baptaes. Oli luksave se hemia wan disisen we oli no save jenisim samtaem.” Tru ya, taem man i givim laef blong hem i go long God, hem i no moa save tekem bak bakegen. (Skelem wetem Prija 5:4.) Be, nating se yu baptaes finis no yu no baptaes yet, “man we i save wanem fasin i stret blong mekem, be hem i no mekem, hem i mekem sin.” (Jemes 4:17) Bigfala kwestin we i stap se: ?Yu yu glad blong stap olsem wan fren blong God? ?Yu yu wantem mekem wok blong hem gogo i no save finis? !Ale, yu no mas letem fraet i blokem yu blong soemaot se yu wan fren blong God!

!Ol Fren Blong God Bambae Oli Kasem Blesing Blong Olwe!

Sipos yu jus blong kam fren blong God, bambae ful wol i no laekem yu. (Jon 15:19) Ating plante man bambae oli jikim yu. Maet yu kasem trabol, hadtaem, mo traem. Be yu no mas letem wan man no wan samting i spolem fasin fren blong yu wetem God. Hem i promes blong givhan long yu oltaem, i se: “Bambae mi mi no save livim yu yu stap yu wan. Bambae mi mi no save lego yu samtaem.”—Hibrus 13:5.

Ol buk olsem hemia, Jeova mo ol man blong hem oli givim long yu blong soemaot se oli tingbaot laef blong yu long ol yia we oli kam. I no gat ples long buk ya blong tokbaot evri kwestin mo trabol blong yu. !Be i sua se buk ya i givhan long yu blong luksave moa se Baebol i fulap long waes we i no gat en blong hem! (2 Timoti 3:16, 17) Taem trabol i kasem yu, stadi gud long tabu buk ya Baebol. (Ol Proveb 2:4, 5) Sipos papa mama blong yu i stap onagud long God, hemia wan narafala stamba blong waes. Tufala i save givhan long yu long saed blong bilif, sipos yu talemaot long tufala ol samting we i stap long hat blong yu.

Antap long ol samting ya, yu no mas fogetem se Jeova God i save rod blong stretem evri samting. “Oltaem, hem i rere blong givhan long yumi long taem blong trabol.” Hem i save lidim yu long stret rod blong winim enikaen trabol. (Ol Sam 46:1) Taswe, ‘God i mekem yumi, mo naoia we yu yu yangfala yet, oltaem yu mas tingbaot hem.’ (Prija 12:1) Sipos yu mekem olsem, bambae yu mekem hat blong Jeova i glad tumas. (Ol Proveb 27:11) Olsem nao, bambae yu kasem laef we i no save finis long wan nambawan Paradaes. Hemia presen we God bambae i givim long ol fren blong hem.

Ol Kwestin Blong Tokbaot

◻ ?From wanem i impoten we yu kam fren blong God?

◻ ?Baebol i soemaot wanem long saed blong God?

◻ ?Yu yu save mekem olsem wanem blong haremgud blong ridim Baebol mo blong kasem gudfala frut from?

◻ ?Blong “talemaot tok ya” long saed blong bilif blong yu, yu mas mekem wanem? ?Yu yu wantem mekem olsem? ?From wanem?

◻ ?Olsem wanem ol miting oli givhan long yumi blong kam klosap long God? ?Olsem wanem yu save kasem plante gudfala samting from ol miting?

◻ ?Wanem ol blesing we yu kasem taem yu fren wetem God?

[Tok blong pija long pej 311]

?I rili tru se mi save kam klosap long God?

[Tok blong pija long pej 312]

Baebol hem i toktok we God i givim long ol man. Hem i tokbaot olsem wanem ol man oli stat, mo wanem fiuja blong yumi

[Bokis blong pija long pej 316, 317]

Ol Miting Oli Givhan Long Yumi Blong Kam Klosap Long God

“Mi mi faenem se taem mi joengud wetem olgeta we oli lavem Jeova, samting ya i givhan long mi blong stap klosap long hem.” Hemia tingting blong wan yangfala long Naejeria. Ol Witnes blong Jeova oli joen tugeta oltaem long ol Haos Kingdom blong olgeta. (Hibrus 10:23-25) Anita we i gat 16 yia blong hem i talem se: “Long Haos Kingdom, mi mi faenem ol trufala fren.”

Be, ol miting ya oli no jes blong joen wanples. Long Haos Kingdom, i gat faef miting evri wik we oli tijim ol man long Baebol. Oli givim save long saed blong plante samting: famle laef, profet tok blong Baebol, ol fasin, ol tijing, mo Kristin wok blong prij. Hemia sam nomo long ol save ya. Blong givimaot save ya, oli no mekem se miting i olsem sinema. Nating se i olsem, ol miting oli pulum intres blong ol man. Maet wan man i givim wan tok, no wan grup i storian tugeta. Maet oli askem kwestin long samfala mo mekem sam gudfala pleplei. Tiokratik Skul i wan nambawan samting we i trenem plante taosen man finis blong givim ol gudfala tok long fored blong ol narafala.

?Olsem wanem sipos yu stap kam long ol miting finis? Traehad blong kasem moa gudfala samting from ol miting. (1) Reregud: Anita i talem se: “Mi mi makemaot wan stret taem blong stadi long ol buk we mifala i yusum long ol miting.” Samting ya bambae i mekem i isi moa long yu blong (2) Joen long miting mo givim ansa: Taem Jisas i yangfala, hem i lesin gud long ol storian long saed blong Baebol long haos prea. Hem i askem kwestin tu, mo i givim ansa. (Luk 2:46, 47) Yu tu yu mas ‘strong moa blong holem ol trutok ya we yu harem finis.’ Blong mekem olsem, yu save raetem ol smosmol not, nao tingting i no save flae i go olbaot. (Hibrus 2:1) Taem oli askem kwestin long kongregesen, yu tu yu save givim ansa.

Wan narafala gudfala samting i blong (3) Yusum samting we yu lanem: Serem ol samting we yu lanem wetem ol narafala. Antap moa, folem ol samting we yu lanem long prapa laef blong yu, mo jenisim ol samting we yu nidim blong jenisim. Soemaot se trutok ‘i stap wok long laef blong yu.’—1 Tesalonaeka 2:13.

Putum ol miting long fasples. Sipos yu yu gat plante homwok blong mekem, traem finisim bifo long miting. Yangfala Simeon i talem se: “Long miting, mi mi laekem blong storian wetem evriwan go kasem we laswan man i aot. Be taem mi gat skul wok blong mekem, mi mas kambak long haos kwik.” Nating se yu folem wanem plan, be yu mas mekem bes blong yu blong go long olgeta miting. Oli impoten blong mekem bilif blong yu i kam bigwan.

[Tok blong pija long pej 315]

Yu mas ridim Baebol blong kam wan fren blong God

[Tok blong pija long pej 318]

“Mi save se enitaem we mi gat wan trabol, mi save lukluk i go long Jeova blong lidim mi, mo bambae hem i givhan”