Japta 38

?Fiuja Blong Mi Bambae i Olsem Wanem?

“LONG wol ya we i fulap long denja blong niuklia, mi mi fraet long fiuja.” Hemia tok blong wan yangfala blong Jemani, taem hem i givim wan tok long fored blong wan haeman blong politik long Jemani.

Maet fraet ya blong ded long wan niuklia faet, i stap spolem tingting blong yu tu long saed blong fiuja. Wan yangfala i askem se: “?From wanem mi mas traehad blong kasem ol gudfala mak long skul? Wan dei wol ya bambae i bosta.” Yes, long wan stadi blong ol skul pikinini, ol boe oli talem se bigfala samting we oli fraet moa long hem, hemia niuklia faet. Ol gel oli makem niuklia faet olsem namba tu samting we oli fraet long hem. Faswan samting long tingting blong olgeta, hemia fraet se “papa mama blong olgeta bambae oli ded.”

Yes, ol man oli fraet long niuklia faet, be i no trabol ya nomo we i save spolem fiuja. “Namba blong ol man long wol i stap kam antap bitim mak, man i stap yusum mo spolem ol samting we yumi nidim blong laef, mo oli stap sakem doti long win mo wota.” Ol samting ya wetem ol narafala trabol we i save kamaot i pulum dokta B. F. Skinner we i stadi long tingting blong man, blong i talem se: “Naoia i luk olsem se laef blong yumi evriwan i stap long denja.” Hem i gohed i se: “Mi mi no gat wan gudfala tingting long saed blong fiuja. Bambae yumi no save winim ol trabol blong yumi.”

Taem yumi luk we ol man blong hae save oli fraet long fiuja, yumi no sapraes se plante yangfala oli gat tingting ya se: “I gud yumi gohed, yumi kakae, yumi dring, from we tumora bambae yumi ded.” (1 Korin 15:32) Yes, sipos fiuja i dipen nomo long save blong ol man blong politik mo ol sayentis, i tru se bambae fiuja blong yu i nogud. ?From wanem? From we Jeremaea 10:23 i talem se: ‘I no gat man i save wanem samting bambae i kamtru long laef blong hem, mo i no gat man i save kam bos long laef blong hem.’

I no jes we man i no naf blong bos long laef blong hem. Makem se man i no “save” mekem olsem—hem i no gat raet blong bos long wol. Taswe, ol traehad blong hem oli no save karem gudfala frut. Hemia nao from wanem Jeremaea i askem long God, blong i mekem wan samting. Hem i se: “Plis yu stretem laef blong mifala, be bambae yu no mekem i strong tumas long mifala.” (Jeremaea 10:24) Samting ya i min se Man we i Wokem yumi, hem nao i bos long fiuja blong yumi. ?Be fiuja ya bambae i olsem wanem?

Tingting Blong God Long Saed Blong Wol—Mo Fiuja Blong Yu

Jes afta we God i wokem man mo woman, hem i talem long tufala se: “I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala. Mi mi putum yufala blong yufala i bos long ol fis, wetem ol pijin, mo ol narafala samting we i gat laef we oli stap long wol ya, i stat long olgeta we oli bigbigfala, i go kasem olgeta we oli smosmol.” (Jenesis 1:28) Olsemia nao bambae ol man oli gat janis blong stap long paradaes long wol ya.

Be, faswan man mo woman tufala i girap agensem rul blong God. Taswe, biaen, Solomon i talem se: “Taem God i mekem yumi, yumi stret nomo, be yumi nomo, yumi stap mekem laef blong yumi i paspas olbaot.” (Prija 7:29) Ol plan blong man oli mekem bigfala trabol i kamaot, oli givim trabol nomo, mo oli givim wan nogud fiuja long olgeta we oli kamaot biaen long olgeta.

?Samting ya i min se God i lego wol ya nomo blong i kam wan ples blong doti we i fulap long niuklia posen, mo se maet bambae i no moa save gat wan samting i laef long hem? !No gat! Hem i “wokem wol ya, mo i mekem i strong, blong i save stap longtaem. Taem hem i mekem, hem i no mekem blong i ples nating nomo, hem i mekem blong man i save stap long hem.” !Taswe tingting we hem i talemaot long saed blong fiuja blong wol ya i mas kamtru!—Aesea 45:18; 55:10, 11.

?Be wetaem mo olsem wanem bambae i kamtru? Traem ridim Luk japta 21. Long japta ya Jisas i talemaot ol trabol we oli kasem ol man finis long handred yia we i pas: ol wolwo, graon i seksek, ol sik, kakae i sot, fasin blong brekem loa i kasem evri ples. I no longtaem, ol tok blong Jisas bambae oli kam tru: “Taem ol samting ya oli stat kamtru, yufala i mas stanap stret, yufala i leftemap hed blong yufala, from we bambae i no longtaem, mi bambae mi kam blong sevem yufala, mi mekem yufala i fri. . . . Taem yufala i luk we ol samting ya oli kamaot, bambae yufala i save se niufala wol ya we God i king long hem, bambae i no longtaem hem i kamtru.”—Luk 21:10, 11, 28, 31.

Kingdom ya nao we fiuja blong yu i stanap long hem. Blong talem stret, kingdom ya i wan gavman, mo hemia nao samting we God bambae i yusum blong rulum wol. Kingdom gavman ya bambae i tekemaot wol ya long han blong ol man we oli rul long hem naoia. (Daniel 2:44) Bambae God i spolem “ol man ya we oli stap spolem wol,” mo bambae i sevem wol ya wetem ol man oli aot long han blong ol rabis man ya.—Revelesen 11:18; Prija 1:4.

Aninit long rul ya blong Kingdom blong God, sloslou ful wol bambae i kam paradaes. (Luk 23:43) Ol samting we oli sapotem laef long wol ya bambae oli kam stretgud olgeta bakegen. Ol man mo ol anamol bambae oli stap tugeta long pis. (Aesea 11:6-9) Ol faet mo ol tul blong faet bambae oli no moa stap. (Ol Sam 46:8, 9) Bambae i no moa gat ol man blong brekem loa, ol man we oli no gat haos, ol sik, mo hanggri. Ded tu bambae i finis. Ol man we oli laef long wol ya “bambae oli harem gud, from we oli stap gud, mo oli gat plante samting.”—Ol Sam 37:10, 11; 72:16; Aesea 65:21, 22; Revelesen 21:3, 4.

‘Traem Fastaem’ Ol Promes Blong God

!Laef blong olwe long paradaes—hemia nao fiuja we yu yu save kasem! Ating yu laekem tingting ya, be maet i hadwok long yu blong lego bilif ya se olgeta gudfala man bambae oli go long heven. No maet yu no bilif fulwan long Baebol. Yes, sam yangfala Witnes blong Jeova tu, maet oli sapraes we sam samtaem bilif blong olgeta i seksek. Tingbaot Michelle we papa mama blong hem tufala i Witnes. Hem i bilif fulwan se Baebol i tru, olsem we hem i bilif se taem naet i finis delaet i stap kamtru. Be, wan dei hem i sek se hem i no save from wanem hem i bilif long Baebol. Gel ya i talem se: “Ating mi mi bilif long Baebol from we papa mama blong mi i bilif long hem.”

Baebol i talem se: “Sipos man i no bilif strong long God, hem i no save mekem God i glad long hem.” (Hibrus 11:6) Be, bilif i no wan samting we yu kasem from we papa mama blong yu i gat. Blong kasem wan gudfala fiuja, yu tu yu mas wokem bilif we i stanap long ol trufala samting. Bilif i “soemaot long yumi we olgeta samting ya we yumi stap putum tingting blong yumi i strong long hem, olgeta oli tru.” (Hibrus 11:1) Baebol i talem se yu mas “traem olgeta samting fastaem.” The Living Bible i talem se, “jekem evri toktok blong meksua se hem i tru.”—1 Tesalonaeka 5:21.

Pruvum Se Baebol i Tru

Maet fastaem yu mas jekem sipos Baebol i rili “kamaot long God.” (2 Timoti 3:16) ?Olsem wanem yu save mekem olsem? God ya we i gat Olgeta paoa, hem wan nomo we ‘long stat blong olgeta samting, hem i save talemaot fastaem ol samting we biaen oli hapen.’ (Aesea 43:9; 46:10) Mo long Baebol, hem i mekem samting ya bakegen mo bakegen. Traem ridim ol profet tok long Luk 19:41-44 mo 21:20, 21 long saed blong Jerusalem we ol ami oli spolem. Mo i gat ol profet tok long Aesea 44:27, 28 mo 45:1-4 long saed blong Babilon we ol ami oli spolem. !Ol samting we i kamaot long ol yia we oli pas oli pruvum se Baebol i bin talemaot ol samting ya i stret nomo! Janine, we i gat 14 yia blong hem, i talem se: “Afta we mi stadi gud long sam profet tok blong Baebol, mi mi sapraes bigwan blong luk olsem wanem oli talemaot ol samting we oli kamtru.”

Ol stori blong bifo we oli stap long Baebol oli stret, Baebol i no giaman, hem i no haedem wan samting, mo i no gat sam tok long hem we i agensem ol narafala tok. Hemia sam moa samting we oli save mekem bilif blong yu long Baebol i kam strong.a ?Be olsem wanem yu save se mining blong ol tok blong Baebol we ol Witnes blong Jeova oli talem, hem i stret? Ol man Berea bifo oli no jes agri long ol tok we aposol Pol i talem blong eksplenem Baebol. No gat. ‘Evri dei, oli stap ridimgud ol tok blong Baebol, blong faenemaot se ol tok blong hem i tru no i no tru.’—Ol Wok 17:11.

I gud we yu tu yu stadi dip long ol tijing blong Baebol. Buk ya Save Blong Lidim Yu Long Laef We i No Save Finis (we Watchtower Bible and Tract Society of New York, Inc. i wokem) i eksplenem ol tijing ya long fasin we i klia nomo. Sipos papa mama blong yu i Witnes blong Jeova, tufala i save givhan long yu blong faenem ansa long ol kwestin we maet yu yu gat. Wan yangfala woman we nem blong hem Janel, i talem se: “Sipos i gat sam kwestin we oli mekem tingting blong yu i trabol, yu mas tok tru wetem papa mama blong yu. Askem kwestin sipos yu faenem se i hadwok blong bilif long wan samting.” (Ol Proveb 15:22) !Sloslou, bambae yu luksave se Jeova i rili blesem ol Witnes blong hem wetem nambawan save long trutok blong Baebol!

Wan yangfala we nem blong hem Prentice, i talem se: “Sam samtaem, tingting blong mi i stap foldaon from ol nogud samting we oli stap kamaot long wol. Long taem ya, mi ridim ol vas long Baebol olsem Revelesen 21:4. Oli givim samting long mi we mi save putum tingting blong mi i stap strong long hem.” Yes, strong bilif long ol promes blong God i sua blong jenisim tingting blong yu long saed blong fiuja. Bambae yu tingbaot fiuja wetem glad, i no wetem tingting we i trabol. Long laef blong yu naoia we maet yu harem se yu stap traehad blong nating nomo, bambae yu ‘putumgud plante gudgudfala samting, we i olsem fandesen blong laef blong yu, we i save stap strong oltaem. Nao bambae yu save kasem laef ya we i prapa wan.’—1 Timoti 6:19.

?Be blong kasem “laef ya we i prapa wan” i naf we yumi lanem mo bilif long ol tijing blong Baebol nomo? ?I gat sam moa samting we yumi mas mekem?

[Futnot]

Ol Kwestin Blong Tokbaot

◻ ?Ol yangfala oli fraet long wanem samting long fiuja?

◻ ?Wanem stamba tingting blong God long saed blong wol ya? ?From wanem yumi save bilif strong se tingting blong God i no jenis?

◻ ?Olsem wanem Kingdom bambae i mekem tingting blong God i kamtru long wol?

◻ ?From wanem i impoten se yu traem fastaem ol tijing blong Baebol blong luk sipos oli tru, mo olsem wanem yu save mekem olsem?

◻ ?Olsem wanem yu save pruvum se Baebol i kamaot long God?

[Tok blong pija long pej 306]

“Mi mi no gat wan gudfala tingting long saed blong fiuja. Bambae yumi no save winim ol trabol blong yumi.”—Dokta B. F. Skinner we i stadi long tingting blong man

[Tok blong pija long pej 307]

Man we i Wokem wol bambae i no letem ol man oli spolem wol blong yumi

[Tok blong pija long pej 309]

?Yu yu pruvum finis se Baebol i tru?