Japta 1

Tufala Mesej We i Kamaot Long Heven

OLGETA haf blong Baebol oli rili olsem wan mesej we i kamaot long heven. Papa blong yumi long heven i givim mesej ya long yumi blong tijim yumi. Be i gat tufala spesel mesej we, 2,000 yia finis, wan enjel we hem “i stap oltaem long fes blong God,” hem i karem tufala mesej ya i go. Nem blong enjel ya, Gabriel. Naoia yumi traem lukluk gud long ol samting we oli kamaot, taem enjel ya i mekem tufala impoten visit long wol.

Yia ya, hem i 3 B.K.T. Wan pris blong Jeova, nem blong hem Sekaraea, i stap long ol hil blong Judia, ating i no longwe tumas long Jerusalem. Hem i olfala nao, mo waef blong hem tu i olfala. Nem blong waef blong hem, Elisabet. Tufala i no gat pikinini. Hem i taem blong Sekaraea blong mekem wok blong pris insaed long haos blong God long Jerusalem. Wantaem nomo, enjel ya Gabriel i kamtru, i stanap long raetsaed blong olta blong bonem insens.

Sekaraea i fraet tumas. Be Gabriel i kwaetem tingting blong hem, i talem se: “Sekaraea yu no fraet. Hae God [Jeova, NW] i harem prea blong yu finis. Bambae woman blong yu Elisabet, hem i save karem wan pikinini boe blong yu. Yu yu mas putum nem blong hem, Jon.” Nao Gabriel i talemaot se Jon “bambae i wan haeman long fes blong Hae God [Jeova, NW].” Mo hem “bambae i mekemrere ol man, oli rere blong Jeova.” (NW)

Be Sekaraea i no save bilivim tok ya. Hem i no ting se hem wetem Elisabet tufala i save gat wan pikinini, from we tufala i olfala finis. Ale Gabriel i talem long hem se: “Yu yu no bilif long tok ya blong mi. Oraet, from samting ya, bambae yu yu no save toktok. Bambae yu no save talem wan samting, gogo kasem dei ya we promes ya bambae i kamtru.”

Long taem ya, ol man oli stap wet long Sekaraea afsaed long haos blong God. Oli no save from wanem hem i stap longtaem tumas insaed long haos blong God. Be taem hem i kamaot, hem i no save toktok long olgeta, hem i save mekem saen nomo long han blong hem. Nao oli save se hem i bin luk wan samting we God nomo i soemaot long hem.

Taem Sekaraea i finisim taem blong hem blong mekem wok blong pris long haos blong God, hem i gohom. Nao i no longtaem, samting we enjel i bin talem long hem, i kamaot tru—yes, Elisabet i gat bel. Nao long faef manis we hem i stap wet blong bonem pikinini, Elisabet i stap haed nomo long haos.

Biaen, Gabriel i kamtru bakegen. ?Long taem ya, hem i toktok long hu? Hem i toktok long wan yangfala woman we i no mared yet. Nem blong gel ya, Meri, mo ples blong hem, taon ya Nasaret. ?Hem i karem wanem mesej i kam long Meri? !Lesin gud nao! Gabriel i talem long Meri se: “God i mekem i gud tumas long yu. Nao bambae yu yu gat bel, mo bambae yu save bonem wan pikinini blong yu, mo bambae yu putum nem blong hem, Jisas.” Gabriel i gohed, i se: “Hem bambae i wan hae man, mo ol man bambae oli save singaot hem se Pikinini blong God ya we i Antap Tumas. . . . Nao hem bambae i king blong olgeta we oli kamaot long laen blong Jekob bifo, mo hem bambae i rul, gogo i no save finis.”

Gabriel i mas harem gud tumas blong karem tufala mesej ya i go. Taem yumi ridim moa long saed blong Jon mo Jisas, bambae i kam klia moa from wanem tufala mesej ya we i kamaot long heven i impoten tumas. 2 Timoti 3:16; Luk 1:5-33.

[Kwestin]

▪ ?Wanem tufala impoten mesej we oli kamaot long heven?

▪ ?Hu i karem tufala mesej ya? ?Mo hem i karem tufala mesej ya i go long hu?

▪ ?From wanem i strong blong bilif long tufala mesej ya?