Japta 47

Krae i Finis—Glad i Kam

TAEM Jaeras i luk we Jisas i mekem wan sik woman i gud bakegen, hem i bilif moa long paoa blong Jisas. Long dei ya, Jaeras i askem finis long Jisas blong kam long haos blong hem, from we gel blong hem we i gat 12 yia blong hem, kolosap i ded. Jaeras i laekem gel blong hem tumas. Nao wan samting i hapen we Jaeras i no wantem nating. Taem Jisas i stap toktok wetem woman, sam man oli kamtru, nao oli tok smol long Jaeras se: “Smol gel blong yu i ded finis. Livim. Yu no mekem trabol long tija ya bakegen.”

!Wantaem nomo, tingting blong Jaeras i foldaon! Traem tingbaot: Man ya i wan lida blong skul blong ol man Isrel. Ol man oli gat bigfala respek long hem. Be taem hem i harem we gel blong hem i ded, hem i no moa save mekem wan samting nating. Be Jisas i harem toktok blong olgeta. Ale, hem i leftemap tingting blong Jaeras, i talem long hem se: “Yu no harem nogud. Yu bilif long mi nomo.”

Nao Jisas i biaen long Jaeras, tufala i gobak long haos blong hem. Jaeras i harem nogud. Ale, oli kamtru long haos blong hem, nao Jisas i luk we plante man oli stap. Oli mekem plante noes tumas, oli stap singaot bigfala, oli stap kraekrae. Hem i go insaed long haos, nao i talem long olgeta se: “?From wanem yufala i stap mekem bigfala noes olsem? ?From wanem yufala i stap krakrae olsem? Gel ya i no ded, hem i stap slip nomo.”

Taem ol man oli harem tok ya, oli laf long hem, from we olgeta oli save gud se gel ya i ded finis. Be Jisas i talem long olgeta se gel ya i stap slip nomo. Hem i wantem soemaot long ol man ya se taem hem i yusum paoa we God i givim long hem blong mekem man i laef bakegen, i olsem we hem i wekemap man we i stap slip nomo.

Ale Jisas i sanem ol man oli go afsaed. Nao hem i tekem Pita, Jon mo Jemes, wetem papa mo mama blong gel ya, olgeta faef nomo oli go insaed long ples we gel i stap. Nao Jisas i holem han blong gel ya, i singaot long hem, i se: “Talita Kumi.” Mining blong tok ya se: “Smol gel, yu girap.” Wantaem nomo, gel ya i stanap, mo hem i wokbaot. Taem papa mama blong gel ya tufala i luk samting ya, tufala i sapraes tumas.

Nao Jisas i talem long olgeta se oli mas givim sam kakae long gel ya, mo hem i talem long Jaeras mo woman blong hem se tufala i no mas talemaot samting ya long ol man. Nating we hem i tok olsem long olgeta, be nyus blong samting ya i go olbaot, i kasem evri ples raonabaot. Hemia seken taem we Jisas i mekem man i laef bakegen. Matyu 9:18-26; Mak 5:35-43; Luk 8:41-56.

▪ ?Jaeras i harem wanem nyus? ?Olsem wanem Jisas i leftemap tingting blong hem?

▪ ?Taem oli kamtru long haos blong Jaeras, wanem i stap hapen?

▪ ?From wanem Jisas i talem se gel we i ded i stap slip nomo?

▪ ?Hu nao ol faef man we oli stap taem Jisas i mekem gel ya i laef bakegen long ded?