Japta 48

Jisas i Livim Jaeras, i Go Long Nasaret Bakegen

LONG dei ya, Jisas i mekem plante samting finis: Hem i aot long Dekapolis i kambak long narasaed blong bigfala lugun. Hem i mekem wan sik woman i kamgud bakegen, we sik blong woman i stap long hem oltaem long 12 yia, i no gat spel. Mo hem i mekem smol gel blong Jaeras we i ded i laef bakegen. Be dei ya i no finis yet. Taem Jisas i aot long haos blong Jaeras, i gat tu blaenman we tufala i stap folem hem, mo tufala i stap singaot bigfala se: “Yu Laen blong Deved, plis yu sore long mitufala.”

From we tufala ya i singaot Jisas se “Laen blong Deved,” tufala i soemaot se tufala i bilif we Jisas i gat raet blong sidaon long jea blong Deved. Yes, tufala i ting se hem i Mesaea we ol profet tok i bin tokbaot. Be i luk olsem we Jisas i no harem krae blong tufala ya. Maet hem i mekem olsem blong traem tufala, blong luk sipos bambae tufala i gohed blong askem hem, no no gat. Be yes, tufala i stap gohed. Tufala i folem Jisas go kasem haos we Jisas i stap long hem. Ale, taem Jisas i go insaed long haos, tufala i biaen long hem, tufala i go insaed tu.

Nao Jisas i askem long tufala, i se: “?Yutufala i bilif se mi save mekem samting ya?”

Tufala i talem se: “Yes, Masta.” Tufala i save se Jisas hem i naf blong mekem.

Ale Jisas i putum han blong hem long ae blong tufala, nao hem i talem se: “Bambae i olsem we yutufala i bilif.” !Wantaem nomo ae blong tufala i kamgud! Nao Jisas i tok strong long tufala, i se: “Bambae yutufala i no talemaot bisnes ya long ol man.” Be tufala i glad tumas, taswe tufala i no lesin long tok blong Jisas. Nao tufala i talemaot nyus blong Jisas olbaot long ples ya.

Taem tufala man ya i goaot, ol man oli tekem wan man i kam long Jisas. Man ya i no save toktok, from we i gat devel i stap long hem. Nao Jisas i ronemaot devel ya, mo man ya i stat toktok. Ol man oli sapraes tumas long ol merikel ya blong Jisas, oli talem se: “Neva man i luk wan samting olsem long Isrel samtaem.”

Be ol Farisi oli stap tu. Olgeta oli luk we Jisas i stap mekem ol merikel ya. Be from we oli no bilif, oli sakem rabis tok long hem bakegen long saed blong stampa blong ol merikel blong hem, se: “Hemia jif blong ol devel ya, we i stap givim paoa long man ya blong i ronemaot devel long man.”

I no longtaem biaen, Jisas i aot long ples ya, i gobak long ples blong hem, Nasaret, mo ol disaepol blong hem oli biaen long hem. Samwe long wan yia bifo, hem i go long haos prea long ples ya, nao hem i stap tijim ol man insaed. Fastaem ol man oli sapraes tumas long gudfala tok blong hem. Be biaen, olgeta oli harem nogud long tok blong hem mo oli traem kilim hem i ded. Nao from we Jisas i sore long ol man, hem i kambak bakegen long taon ya, blong traem givhan long ol man ples blong hem.

Long plante narafala ples, fulap man oli kam long Jisas. Be long ples ya, i no olsem. Long Sabat dei, hem i go insaed long haos prea blong hem i tij. Bighaf long ol man we oli harem tok blong hem oli sapraes tumas. Nao oli talem se: “!Man! ?Man ya i kasem waes ya olsem wanem? ?Hem i stap mekem ol merikel ya olsem wanem? Yumi save man ya finis. Hemia i pikinini blong man ya blong wokem haos, mo mama blong hem, Meri. Ol man ya, Jemes, mo Josef, mo Saemon, mo Judas, oli brata blong hem. Mo ol sista blong hem tu oli stap wetem yumi. ?Hem i kasem ol samting ya long weples?”

I olsem we oli talem se: ‘Jisas ya, hem i man ples blong yumi nomo. Yumi save hem taem hem i pikinini yet, mo yumi save ol famle blong hem tu. ?Olsem wanem man ya i save kam Mesaea?’ Nating we Jisas i gat bigfala waes mo i mekem plante merikel blong soemaot se hem i Mesaea, be olgeta oli no wantem hem. Ol famle blong hem tu, from we oli save gud hem, oli no bilif long hem. Taswe Jisas i talem long olgeta se: “Man we i profet, olgeta man oli save ona long hem. Ol man ples blong hem, wetem ol famle blong hem, olgeta ya nomo oli no save ona long hem.”

Yes, Jisas i sapraes we bilif blong olgeta i smol olsem. Taswe hem i no save mekem sam merikel long ples ya. Hemia nomo i mekem, i putum han blong hem long sam sikman, i mekem olgeta oli gud bakegen. Matyu 9:27-34; 13:54-58; Mak 6:1-6; Aesea 9:7.

▪ ?Taem tufala blaenman i singaot Jisas se “Laen blong Deved,” tufala i soemaot se tufala i bilif wanem?

▪ ?Ol man Farisi oli talem se hu i stampa blong paoa we Jisas i yusum blong mekem ol merikel ya?

▪ ?From wanem yumi save talem se Jisas i gat sore long ol man, taem hem i gobak bakegen long Nasaret blong givhan long ol man ples blong hem?

▪ ?Ol man Nasaret oli tingting olsem wanem long tok blong Jisas? ?From wanem?