!Ol Rabis Spirit Oli Save Kilim Man i Ded!

Setan wetem ol rabis enjel blong hem oli raf mo oli save spolem man. Bifo, Setan i kilim i ded ol anamol mo ol wokman blong gudfala man ya Job. Mo tu, hem i mekem “wan bigfala win” i girap, nao i spolem haos blong Job. Ol ten pikinini blong hem we oli stap long haos ya oli ded. Biaen, Setan i spolem Job wetem wan sik, hem i mekem we “ol soa i kam kavremapgud bodi blong Job, stat long hed blong hem i go kasem leg blong hem.”—Job 1:7-19; 2:7.

Long taem blong Jisas, ol rabis spirit oli mekem se sam man oli no moa save toktok mo lukluk. (Matiu 9:32, 33; 12:22) Oli mekem wan man i harem nogud tumas, gogo hem i katkatem bodi blong hem wetem ol ston. (Mak 5:5) Mo tu, oli go long wan pikinini mo oli mekem hem i singaot bigwan mo “bodi blong hem i stap seksek.”—Luk 9:42.

Tede, Setan wetem ol rabis enjel blong hem oli gohed blong kilim ol man. Blong talem stret, ol rabis fasin we Setan mo ol enjel blong hem oli stap mekem, oli kam antap bigwan stat long taem we oli sakemaot olgeta long heven. Long ol defren ples long wol, ol stori oli soemaot se ol rabis enjel oli wantem mekem man i harem nogud. Oli mekem sam man oli sik, mo oli mekem samfala oli drim nogud, mo oli no save slip gud long naet. Mo tu, oli mekem nogud fasin blong seks wetem samfala. Mo long sam narafala, oli wok long tingting blong olgeta gogo oli lusum hed, nao oli kilim narafala man i ded, no oli kilim olgeta wan i ded.

Lintina, wan woman Surinam i talem se, wan rabis spirit i kilim i ded 16 memba blong famle blong hem. Rabis spirit ya i mekem hem i harem nogud long bodi mo tingting blong hem blong 18 yia. Hem i talem se: “Ol rabis spirit oli laekem blong mekem man i harem nogud gogo hem i ded, nating se hem i no wantem.”

Be Jehova i save protektem ol man blong hem, taem Setan i agensem olgeta.—Ol Proveb 18:10.