Stadi 2

?God Hem i Hu?

?Hu ya trufala God, mo wanem nem blong hem? (1, 2)

?Hem i gat wanem kaen bodi? (3)

?Wanem ol bigfala fasin blong hem? (4)

?I stret we yumi yusum ol aedol mo pija blong mekem wosip long hem? (5)

?Wanem tufala rod blong kasem save long saed blong God? (6)

1. Ol man oli mekem wosip long plante samting. Be Baebol i talem se i gat wan TRUFALA God nomo. Hem i wokem olgeta samting long heven mo long wol. Hem i givim laef long yumi, taswe yumi mas mekem wosip long Hem nomo.​—⁠1 Korin 8:​5, 6; Revelesen 4:⁠11.

2. God i gat plante taetel. Be hem i gat wan trufala nem blong hem nomo. Nem ya hem i JEOVA. Long plante Baebol, oli karemaot nem blong God mo oli putum ol taetel olsem MASTA no GOD long ples blong hem. !Be ol man we oli raetem Baebol fastaem, oli putum nem blong Jeova i stap long hem bitim 7,000 taem!​—⁠Eksodas 3:15; Ol Sam 83:18.

3. Jeova i gat wan bodi, be i no olsem bodi blong yumi. Baebol i talem se: ‘God i wan Speret man.’ (Jon 4:24) Wan speret man i hae moa long yumi. I no gat wan man we i bin luk God samtaem. Jeova i stap long heven, be hem i save luk olgeta samting. (Ol Sam 11:​4, 5; Jon 1:18) Ale, ?wanem ya tabu speret? Hem i no wan man olsem God. Hem i paoa blong God.​—⁠Ol Sam 104:⁠30.

4. Baebol i soemaot stampa fasin blong Jeova. Hem i talem se lav, stretfasin, waes, mo paoa, oli ol bigfala fasin blong hem. (Dutronome 32:4; Job 12:13; Aesea 40:26; 1 Jon 4:⁠8) Baebol i talem tu se hem i gat sore, hem i kaengud, hem i fogivim man, hem i glad blong givim presen long narafala, mo hem i gat longfala tingting. Yumi mas mekem olsem ol pikinini we oli obei long papa blong olgeta, yumi mas traem folem fasin blong Jeova.​—⁠Efesas 5:​1, 2.

5. ?I stret blong bodaon mo prea long ol aedol, pija, no saen, long wosip blong yumi? !No gat! (Eksodas 20:​4, 5) Jeova i talem se yumi mas mekem wosip long hem nomo. Hem i no save serem ona we i blong hem nomo wetem wan narafala man no wan narafala samting. Ol aedol oli no gat paoa blong halpem yumi.​—⁠Ol Sam 115:​4-8; Aesea 42:8.

6. ?Olsem wanem blong save God moa? Wan rod, hemia blong lukluk olting we hem i bin wokem, mo tingting dip long ol samting we yumi lanem from. Ol samting we God i wokem oli soemaot long yumi se hem i gat bigfala paoa mo waes. Mo from ol samting ya, yumi luksave tu se hem i gat lav. (Ol Sam 19:​1-6; Rom 1:20) Wan narafala rod blong lanem moa long saed blong God, hemia tru long stadi blong Baebol. Insaed long Baebol, God i talemaot plante samting long saed blong ol fasin blong hem. Mo tu, hem i talemaot stampa tingting blong hem, mo wanem samting we hem i wantem yumi blong mekem.​—⁠Emos 3:7; 2 Timote 3:​16, 17.

[Tok blong pija long pej 5]

Yumi lanem plante long saed blong God from ol samting we yumi luk raonabaot long yumi mo from Baebol