Stadi 3
?Hu Ya Jisas Kraes?
?From wanem Jisas i karem nem ya ‘fasbon’ Pikinini blong God? (1)
?From wanem hem i gat nem ya “Waes Tok”? (1)
?From wanem Jisas i kam long wol olsem wan man? (2-4)
?From wanem hem i mekem ol merikel? (5)
?I no longtaem bambae Jisas i mekem wanem? (6)
1. Jisas i wan speret man long heven bifo we hem i kam long wol ya. Hem i faswan samting we God i wokem, taswe hem i karem nem ya se ‘fasbon’ Pikinini blong God. (Kolosi 1:15; Revelesen 3:14) Jisas i wan Pikinini nomo we God hem wan i wokem, i no gat man i givhan long hem. Biaen, Jeova i yusum Jisas bifo hem i kam long wol, olsem “nambawan man” blong givhan long Hem blong wokem olgeta narafala samting long heven mo long wol. (Proveb 8:22-31; Kolosi 1:16, 17) God i yusum hem tu olsem nambawan man blong talemaot ol tok blong Hem. From samting ya, Jisas i karem nem ya se “Waes Tok.”—Jon 1:1-3; Revelesen 19:13.
2. God i sanem Pikinini blong Hem i kam long wol, taem hem i tekem laef blong pikinini ya long heven mo putum i go long bel blong Meri. Taswe, Jisas i no gat wan papa long wol ya. Mo from samting ya, hem i no gat sin. God i sanem Jisas i kam long wol from trifala risen ya: (1) Blong tijim yumi long ol trutok long saed blong God (Jon 18:37), (2) blong stap tru long God long fasin we i stretgud olgeta, mo long rod ya hem i kam wan nambawan eksampel we yumi save folem (1 Pita 2:21), mo (3) blong givim laef blong hem olsem wan sakrifaes blong mekem yumi fri long sin mo ded. ?From wanem ol man oli nidim samting ya?—Matyu 20:28.
3. Taem faswan man Adam i brekem loa blong God, hem i mekem wanem we Baebol i kolem se, “sin.” Ale, God i givim panis blong ded long hem. (Jenesis 3:17-19) Hem i no moa naf blong kasem ol hae mak olsem God i wantem, taswe hem i no moa stretgud olgeta. Sloslou hem i kam olfala mo hem i ded. Adam i pasem sin i go long olgeta pikinini blong hem. From samting ya, yumi stap kam olfala, yumi kasem sik, mo yumi ded. ?Olsem wanem ol man oli save kam fri long ol trabol ya?—Rom 3:23; 5:12.
4. Jisas i wan man we i stretgud olgeta, olsem Adam. Be, defren long Adam, Jisas i obei long God fulwan nating se hem i kasem traem we i bigwan olgeta. From samting ya, hem i save givim laef blong hem we i stretgud olgeta, olsem wan sakrifaes blong tekemaot sin blong Adam. Hemia nao samting we Baebol i kolem “ransom.” Taswe, ol pikinini blong Adam oli save kam fri long panis ya blong ded. Olgeta man we oli bilif long Jisas, bambae God i save fogivim sin blong olgeta mo oli save kasem laef we i no save finis.—1 Timote 2:5, 6; Jon 3:16; Rom 5:18, 19.
5. Taem Jisas i stap long wol ya, hem i mekem ol sikman oli kamgud bakegen, hem i givim kakae long ol man we oli hanggri, mo hem i blokem bigfala win. Hem i mekem dedman i laef bakegen tu. ?From wanem hem i mekem ol merikel ya? (1) Hem i sore long ol man we oli stap trabol, mo hem i wantem givhan long olgeta. (2) Ol merikel ya oli pruvum se hem i Pikinini blong God. (3) Oli soemaot samting we bambae hem i mekem long olgeta man we oli obei, taem hem i rul olsem King antap long wol.—Matyu 14:14; Mak 2:10-12; Jon 5:28, 29.
6. Jisas i ded, mo biaen, God i mekem hem i laef bakegen olsem wan speret man, nao hem i gobak long heven. (1 Pita 3:18) Samtaem biaen, God i mekem hem i King. I no longtaem, bambae Jisas i finisim olgeta rabis fasin mo trabol we oli stap long wol ya.—Ol Sam 37:9-11; Proveb 2:21, 22.
[Tok blong pija long pej 7]
Long wok blong Jisas long wol ya, hem i tijim ol man, wokem ol merikel, mo givim laef blong hem from yumi