Yumi Lanem Samting Long Tok Blong God
?Hu Ya Jisas Kraes?
Wajtaoa ya i tokbaot ol kwestin we maet yu bin tingbaot, mo tu, i tokbaot weples long Baebol yu save faenem ansa blong ol kwestin ya. Ol Witnes blong Jehova oli glad blong tokbaot ol ansa ya wetem yu.
1. ?Hu ya Jisas Kraes?
Jisas i no sem mak olsem ol narafala man. Hem i laef long heven fastaem olsem wan spirit, bifo we hem i kamdaon long wol. (Jon 8:23) Jisas i faswan long olgeta samting we God i mekem, mo Jisas i givhan long God blong mekem olgeta narafala samting. Jisas nomo we Jehova hem wan i wokem, taswe Baebol i singaot hem se, “stret Pikinini blong God.” Jisas i Man Blong Toktok long saed blong God, taswe Baebol i singaot hem se “Tok blong God.”—Jon 1:1-3, 14; ridim Ol Proveb 8:22, 23, 30; Kolosi 1:15, 16, NW.
2. ?From wanem Jisas i kam long wol?
God i sanem Pikinini blong hem i kam long wol, taem hem i tekem laef blong pikinini ya long heven, i putum i go long bel blong wan gel Jiu we i no save man yet, nem blong hem Meri. Taswe stret Papa blong Jisas i no wan man long wol ya. (Luk 1:30-35) Jisas i kamdaon long wol ya blong (1) tijim ol man long trutok long saed blong God, (2) mekem samting we God i wantem, olsem eksampol we yumi save folem, mo (3) givim laef blong hem we i stret gud olgeta blong i “pem rod blong plante man oli go fri.”—Ridim Matiu 20:28; Jon 18:37.
3. ?From wanem yumi nidim we wan man i ded blong pemaot yumi?
Taem wan man i pemaot narafala, hem i mekem narafala ya i fri, i no moa slef. God i no mekem man blong bambae hem i kam olfala mo i ded. ?Olsem wanem yumi save samting ya? God i talem long fas man ya Adam se, sipos hem i mekem samting we Baebol i kolem sin, bambae hem i ded. Sipos Adam i no mekem sin, bambae hem i no ded samtaem. Nating we Adam i ded plante handred yia biaen nomo, be long taem ya we hem i brekem loa blong God, hem i stat long rod blong ded. (Jenesis 2:16, 17; 5:5) Adam i pasem sin i go long ol pikinini blong hem, wetem panis blong sin tu, hemia ded. Adam i “statem” fasin blong ded we i kasem olgeta man long wol. From samting ya, yumi nidim wan man we i naf blong pemaot yumi long sin mo ded.—Ridim Rom 5:12; 6:23.
4. ?From wanem Jisas i ded?
?Hu man we i naf blong pemaot yumi long sin mo ded? Taem yumi ded, yumi pem praes blong ol sin blong yumi wan. Be i no gat wan sinman we i naf blong pemaot ol sin blong narafala man.—Ridim Ol Sam 49:7-9.
From we Jisas i no kasem sin long wan papa long wol, hem i no ded from ol sin blong hem wan, be hem i ded from ol sin blong ol narafala. God i sanem Pikinini blong hem i kam, blong hem i ded blong sevem yumi. Hemia i olsem wan rod blong God i soemaot se hem i lavem tumas ol man long wol. Jisas tu i lavem yumi, taswe hem i obei long Papa blong hem, nao hem i givim laef blong hem from sin blong yumi.—Ridim Jon 3:16; Rom 5:18, 19.
5. ?Jisas i stap mekem wanem naoia?
Bifo, Jisas i mekem ol man we oli sik oli gud bakegen, ol dedman oli laef bakegen, mo olgeta we oli stap long trabol, hem i sevem olgeta. Ol samting ya we Jisas i mekem, oli soemaot ol samting we bambae hem i mekem bakegen long ol man we oli obei long God. (Luk 18:35-42; Jon 5:28, 29) Afta we Jisas i ded, God i mekem hem i laef bakegen long laef ya we i blong heven nomo. (1 Pita 3:18) Jisas i sidaon long raet saed blong God, i wet blong kasem paoa long Jehova, blong bambae hem i save rul olsem King antap long fulwol. (Hibrus 10:12, 13) Naoia Jisas i stap rul olsem King long heven, mo ol man blong hem we oli stap long wol, oli stap talemaot gud nius ya long fulwol.—Ridim Daniel 7:13, 14; Matiu 24:14.
I no longtaem, bambae Jisas i yusum paoa blong hem olsem King, blong finisim ol kaen trabol we i mekem man i safa, wetem ol man we oli stamba blong ol trabol ya. Plante milian man we oli bilif long Jisas mo oli obei long hem, bambae oli harem gud blong stap long paradaes long wol.—Ridim Ol Sam 37:9-11.
Blong save moa, lukluk japta 4 blong buk ya, we ol Witnes blong Jehova oli wokem.
[Tok blong pija long pej 11]
Plante milian man we oli bilif long Jisas mo oli obei long hem, bambae oli harem gud blong stap long paradaes long wol