Stadi 14
?Ol Wetnes Blong Jeova Oli Folem Wanem Plan Long Wok Blong Olgeta?
?Long taem blong yumi, ol Wetnes blong Jeova oli stat long wanem yia? (1)
?Olsem wanem ol Wetnes blong Jeova oli mekem ol miting blong olgeta? (2)
?Olsem wanem kongregesen i kasem mane we hem i nidim? (3)
?Hu i stap lukaot long ol wanwan kongregesen? (4)
?Wanem ol bigfala miting we oli stap mekem evri yia? (5)
?Wanem wok we oli stap mekem long hedkwota mo long ol branj ofis blong olgeta? (6)
1. Long taem blong yumi, ol Wetnes blong Jeova oli stat long ol yia 1870. Fastaem, nem blong olgeta, ol Baebol Studen. Be long 1931, oli karem nem ya we i kamaot long Baebol se, ol Wetnes blong Jeova. (Aesea 43:10) Long stat, oli smol nomo. Be sloslou, grup ya i gru gogo i gat plante milyan Wetnes. Olgeta ya oli bisi long wok blong prij long bitim 230 kantri.
2. Bighaf blong ol kongregesen blong ol Wetnes blong Jeova oli stap mekem miting tri taem long wan wik. Yu save kam joen long ol miting ya eni taem. (Hibrus 10:24, 25) Olgeta save we i kamaot long ol miting ya i stanap long Baebol. Ol miting oli stat mo oli finis wetem wan prea. Long bighaf blong ol miting ya, oli singsing “blong presem God” wetem fulhat blong olgeta. (Efesas 5:18, 19) Yu no pem blong go insaed long ol miting ya, mo i no gat kleksin.—Matyu 10:8.
3. Plante kongregesen oli mekem miting long ol Haos Kingdom. Hemia ol haos we oli no flas, ol Wetnes nomo oli bildim olgeta, mo oli no kasem pei from wok ya. Yu no save luk sam pija, kros, no enikaen samting olsem, insaed long ol Haos Kingdom ya. Mane blong pem ol samting long saed blong Haos Kingdom, hemia mane we ol man nomo oli givim olsem presen. Sipos man i wantem givim smol mane, i gat bokis long Haos Kingdom we hem i save putum presen mane long hem.—2 Korin 9:7.
4. Long ol wanwan kongregesen i gat ol elda, no ol man blong lukaot long kongregesen. Olgeta ya oli lukaot long wok blong tijim kongregesen. (1 Timote 3:1-7; 5:17) I gat sam man blong givhan we oli halpem ol elda. (1 Timote 3:8-10, 12, 13) Ol man ya oli no hae moa long ol narafala man long kongregesen. (2 Korin 1:24) Oli no kasem sam spesel taetel. (Matyu 23:8-10) Oli no werem ol klos we oli defren long ol narafala. Mo oli no kasem pei from wok we oli mekem. Ol elda oli glad blong givim olgeta samting we kongregesen i nidim long saed blong speret. Oli save leftemap tingting blong ol man mo lidim olgeta long taem blong trabol.—Jemes 5:14-16; 1 Pita 5:2, 3.
5. Ol Wetnes blong Jeova oli gat ol bigfala asembli evri yia. Long spesel taem olsem, plante kongregesen oli kam wanples blong harem ol advaes we i stanap long Baebol. Long ol asembli olsem, i gat wan spesel taem we ol nyufala disaepol oli tekem baptaes.—Matyu 3:13-17; 28:19, 20.
6. Hedkwota blong ol Wetnes blong Jeova long fulwol i stap long Nyu Yok. Long ples ya i gat Hed Kampani, wan grup blong elda we oli mekem wok blong Jeova plante yia finis. Oli lukaot long wok we i stap gohed long olgeta kongregesen blong wol. Mo tu, i gat bitim 100 branj ofis raon long wol. Long ol ples ya, i gat ol man blong wok we oli no kasem pei from wok blong olgeta. Oli prentem ol buk we oli tokbaot Baebol mo oli sanem olgeta i go long ol defren ples. Oli givim advaes mo mekem ol plan tu, blong lidim wok blong prij. I gud sipos yu visitim branj ofis we i stap kolosap long ples blong yu.